ދިވެހިރާއްޖޭގެ ތަރައްގީގައި އެންމެ އިތުބާރުކުރެވޭ ގައުމަކީ އިންޑިއާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މިބީދައިން ވިދާޅުވެފައި ވަނީ، އެމަނިކުފާނުގެ އެކްސް އެކައުންޓުގައި ހިއްސާކުރެއްވި ޕޯސްޓެއްގަ އެވެ. ރައީސްގެ މި ޕޯސްޓްގައި އެމަނިކުފާނު ވަނީ އިންޑިއާގެ 79 ވަނަ މިނިވަން ދުވަހުގެ ތަހުނިޔާ އެގައުމުގެ ރައީސް ދްރޫޕަދީ މުރުމޫއަށާއި ބޮޑުވަޒީރު ނަރެންދުރަ މޯދީގެ އިތުރުން އެގައުމުގެ ރައްޔިތުންނަށް ފޮނުއްވައިފަ އެވެ.

ރައީސްގެ ޕޯސްޓުގައި އިތުރަށް ވިދާޅުވެފައި ވަނީ ކުރިއަށް އޮތް ތަނުގައި އިންޑިއާއަށް އިތުރު ކާމިޔާބީއަށް އެދިވަޑައިގަންވާ ކަމަށެވެ. އަދި ހަމައެހެންމެ، އިންޑިއާ އާއި ރާއްޖެއާއި ދެ ގައުމުގެ ރައްޔިތުންގެ ބަދަހި ގުޅުމާއި ތަރައްގީގެ ޕްރޮޖެކްޓްތަކުން ދެ ގައުމުގެ ވަރުގަދަ ގުޅުން ރަމްޒުކޮށްދޭ ކަމަށް އެމަނިކުފާނުގެ ޕޯސްޓުގައި ވަނީ ބުނެފަ އެވެ.

ރާއްޖޭގެ 60 ވަނަ މިނިވަން ދުވަހާއި ގުޅިގެން ނިމިދިޔަ ޖުލައި މަހުގެ 25 ވަނަ ދުވަހު އިންޑިއާގެ ބޮޑުވަޒީރު ނަރެންދުރަ މޯދީ ވަނީ ރާއްޖެއަށް ރަސްމީ ދަތުރުފުޅެއް ވެސް ކުރައްވައިފަ އެވެ. މޯދީގެ މިދަތުރުފުޅުގެ ސަބަބުން ދެ ގައުމުގެ ގުޅުން އިތުރަށް ބަދަހިވެގެންދާނެކަމަށް ގިނަ ބަޔަކު ދެކެ އެވެ.

ރާއްޖެ އާއި އިންޑިއާ ދެމެދު ސިޔާސީ ގުޅުން ގާއިމުކޮށްފައި ވަނީ 1965 ވަނަ އަހަރުގެ ނޮވެމްބަރު މަހުގެ އެއް ވަނަ ދުވަހު އެވެ.