މަޖުބޫރުކޮށްގެން ފަލަސްތީނު ރައްޔިތުން ޣައްޒާގެ ބިމުން ބޭލުމަށްފަހު ސޫދާނަށް ބަދަލުކުރުން ހައްދުފަހަނައަޅާފައިވާ ބޮޑުވަޒީރު ބެންޖަމިން ނަތަންޔާހޫ ސޫދާން ސަރުކާރާއި އެކު މަޝްވަރާ ކޮށްފި ކަމަށް އެމެރިކާގެ އެސޯސިއޭޓެޑް ޕްރެސް (އޭޕީ) އިން ރިޕޯޓް ކޮށްފިއެވެ.
ނަން ހާމަ ނުކޮށް ތަފާތު ހަ މަސްދަރަކާއި ޙަވާލާދީ އެސޯސިއޭޓެޑް ޕްރެސް އިން ރިޕޯޓްކޮށްފައިވާ ގޮތުގައި އިސްރާއީލުން ވަނީ ފަލަސްތީނު މީހުން ޣައްޒާއިން އިރުމަތީ އެފްރިކާގެ ގައުމަށް ބަދަލުކުރުމަށް ހުށަހެޅި ހުށަހެޅުމާއި ގުޅިގެން ދެކުނު ސޫދާނާ އެކު ވަރަށް ފުޅާކޮށް މަޝްވަރާ ކޮށްފައެވެ.
އޭޕީން ފާހަގަކުރި ގޮތުގައި މިއީ ބައިނަލްއަޤްވާމީ ޤާނޫނުތަކާއި ޚިލާފު ކަމެކެވެ.
ނަމަވެސް މި ވާހަކަތައް ދެކުނު ސޫދާނުން ވަނީ ދޮގު ކޮށްފައެވެ. އެ ޤައުމުން ވަނީ މިއީ "އަސާސެއް ނެތް" އަދި އެ ޤައުމުގެ ރަސްމީ ސިޔާސަތާއި ޚިލާފު ރިޕޯޓްތަކެއް ކަމަށް ސިފަކޮށްފަ އެވެ.
ދެކުނު ސޫދާނުން މި ވާހަކަތައް އިންކާރު ކުރި ނަމަވެސް، އިސްރާއީލާއި ދެމެދު ޑިޕްލޮމެޓިކް ގުޅުން ވަނީ އިތުރުވެފަ އެވެ. އިސްރާއީލުގެ ޑެޕިއުޓީ ފޮރިން މިނިސްޓަރު ޝަރެން ހަސްކެލް ވަރަށް ފަހުން ދެކުނު ސޫދާނަށް ވެސް ވަޑައިގަތެވެ.
