ބ. ކަމަދޫގައި ސީޕްލޭންގެ ހިދުމަތް ފަށަން މޯލްޑިވިއަނުން ހޯކްސްއާއި އެކު އެއްބަސްވުމެއްގައި ސޮއިކޮށްފި އެވެ.

މޯލްޑިވިއަނާއި ހޯކްސްއާއި މި އެއްބަސްވުމުގައި ސޮއިކޮށްފައިވަނީ މިއަދު ހެނދުނު ކަމަދޫ ސުކޫލްގައި އެކަމަށްޓަކައި ބޭއްވި ހާއްސަ ރަސްމިއްޔާތެއްގަ އެވެ.

މޯލްޑިވިއަންގެ ފަރާތުން މި އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އިބްރާހިމް އިޔާސް އެވެ. އަދި ހޯކްސްގެ ފަރާތުން ސޮއި ކުރެއްވީ އެ ކުންފުނީގެ ޖެނެރަލް މެނޭޖަރު ހުސައިން އަމާން އެވެ.

ކަމަދޫގައި ސީޕްލޭންގެ ހިދުމަތް ފަށަން ސޮއިކުރުމުގެ ރަސްމިއްޔާތު ބާއްވާފައިވަނީ މިހާރު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ.

ކަމަދޫއަކީ ގެސްޓްހައުސް ވިޔަފާރީގައި ކުރިއަރާފައިވާ ރަށެއްކަމުން، އެރަށަށް ގިނަ ބަޔަކު އަދި ހާއްސަކޮށް ފަތުރުވެރިން އަބަދުވެސް ޒިޔާރަތްކުރެ އެވެ. މި ހިދުމަތާ އެކު އެރަށުގައި ޓޫރިޒަމް ފުޅާވެގެންދާނެ ކަމަށް ގިނަބަޔަކު ދެކެ އެވެ.

ރައީސްގެ މިދަތުރުފުޅުގައި ބ. އަތޮޅުގެ މީހުން ދިރިއުޅޭ ހުރިހާ ރަށަކަށް ވަޑައިގަތުމަށް ވަނީ ހަމަޖެހިފަ އެވެ. އެގޮތުން ބ. އަތޮޅު ކަމަދޫ، ކުޑަރިކިލު، ކެންދޫ، އޭދަފުށި، ތުޅާދޫ، ގޮއިދޫ، ފެހެންދޫ، ފުޅަދޫ، ހިތާދޫ، ކިހާދޫ، ދޮންފަނު، ދަރަވަންދޫގެ އިތުރުން މާޅޮހަށް ވަޑައިގަންނަވާނެ އެވެ. އެންމެ ފުރަތަމަ ވަޑައިގެންފައިވަނީ ބ. ކަމަދޫއަށެވެ.