ފުވައްމުލައް ސިޓީގެ އެތެރޭގެ މަގުތައް ޑިޒައިންކޮށް ހެދުމުގެ ދެވަނަ ފިޔަވަހީގެ މަސައްކަތް ބާރަށް ކުރިއަށްދާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން މިއަދު ހާމަކޮށްފި އެވެ. މި މަޝްރޫއަކީ ފުވައްމުލަކުގެ އެތެރޭގެ މަގުތަކުގެ ފެންހިންދާ ނިޒާމާއި، މަގުތަކުގައި ތާރު އެޅުމުގެ މަސައްކަތް ހިމެނޭ ބިޔަ މަޝްރޫއެކެވެ.

މިހާރު އެ މަޝްރޫއުގެ ދަށުން، މަގުތަކުގެ ފެން ހިންދުމުގެ ނިޒާމް ބައްޓަން ކުރުމުގެ ގޮތުން ސެޓްލްމެންޓް ޓޭންކް ބެހެއްޓުމުގެ މަސައްކަތާއި، ކޭބަލް ޖަންކްޝަން (ކަރަންޓް ކޭބަލް ގުޅުވާލާ ހޮޅި) ބެހެއްޓުމުގެ މަސައްކަތުގެ އިތުރުން ޔޫޕީވީސީ ހޮޅި (ފެންހިންދާ ހޮޅި) އެޅުމުގެ މަސައްކަތް ދަނީ ކުރިއަށެވެ. މީގެ އިތުރުން މަގުތަކުގެ ދެފަރާތަށް ބަހައްޓާ ކާބްސްޓޯން އުފެއްދުމުގެ މަސައްކަތް ވެސް މިހާރު ދަނީ ބާރަށް ކުރިޔަށެވެ.

އެ މަޝްރޫއުގެ ދަށުން ރާއްޖޭގެ ތިން ވަނަ އަށް އެންމެ ބޮޑު ސިޓީ ކަމުގައިވާ ފުވައްމުލަކުގެ ތާރު ނޭޅި ހުރި ކުދި މަގުތަކުގައި ތާރު އަޅާނެއެވެ. މިގޮތުން އެ މަސައްކަތުގެ ތެރެއިން 50 މަގެެއްގައި ތާރު އެޅުމަށް ހަމަޖެހިފައިވާއިރު އެއީ 12.7 ކިލޯ މީޓަރު ސަރަހައްދެކެވެ. މި މަޝްރޫއުގެ ސަބަބުން ސިޓީގެ އެތެރޭގެ ދަތުރުފަތުރުގެ ފަސޭހަވެ، ރައްޔިތުންނަށް ދިރިއުޅުމުގެ ފެންވަރު ރަނގަޅުވެގެންދާނެ ކަމަށް ލަފާކުރެވެ އެވެ.

ފުވައްމުލައް މަގު ހެދުމުގެ މަޝްރޫއުގެ ދެ ވަނަ ފިޔަވަހީގެ މަސައްކަތަކީ މިދިޔަ އަހަރުގެ ޖުލައި މަހުގެ ތެރޭގައި އެމްޓީސީސީއާ ހަވާލު ކުރު މަޝްރޫއެކެވެ. މިއީ ދެ އަހަރުގެ މުއްދަތުގެ ތެރޭގައި ނިންމުމަށް ހަމަޖެހިފައިވާ މަޝްރޫއަކަށްވާއިރު، މި މަޝްރޫއަށް 255.2 މިލިއަން ރުފިޔާ ހަރަދު ކުރާނެ އެވެ.

މި މަޝްރޫއުގެ ދަށުން ފެން ހިންދާ ނިޒާމް ގާއިމު ކުރުމާއި 650 ކޭބަލް ޖަންކްޝަން ބޮކްސް ވަޅުލުމާއި 13،964 އަކަ މީޓަރުގެ ސަރަހައްދެއްގައި ޕޭވްމަންޓް ހެދުމާއި 24،345 މީޓަރުގެ ކަބް ސްޓޯން ހަރު ކުރުމާއި ގަސްހަރު ކުރާ ޕިޓްސް ވަޅުލުން ހަމަޖެހިފައިވާ ކަމަށް އެެމްޓީސީސީން މީގެ ކުރިން މައުލޫމާތު ދީފައި ވެ އެވެ. އޭގެ އިތުރުން 633 މަގު ބައްތި ހަރު ކުރުމާއި މަގުމަތީ ނިޝާން ހަރު ކުރުމާއި ކަފިހި ހުރަސް ކުރެހުމާއި ސްޕީޑް ބްރޭކަރު ހަރު ކުރުމުގެ މަސައްކަތް ވެސް މި މަޝްރޫއުގައި ހިމެނެ އެވެ.

ފުވައްމުލަކު މަގުތައް ހެދުމުގެ ފުރަތަމަ ފިޔަވަހީގެ ދަށުން ވަނީ އެ ސިޓީގެ ރިންގރޯޑް ހިމެނޭހެން ބޮޑެތި 31 މަގެއްގައި ތާރު އަޅައި ނިންމާފައިވާކަން ފާހަގަކޮށްލެވެ އެވެ. އެމްޓީސީސީން ކުރިއަށް ގެންދިޔަ އެ މަޝްރޫއުގެ އަމަލީ މަސައްކަތް 2020 ވަނަ އަހަރުގެ ތެރޭގައި ފަށައި، ފުރަތަމަ ފިޔަވަހީގެ ދަށުން އެ ސިޓީގައި 95،000 އަކަ މީޓަރަށް ވުރެ ބޮޑު ސަރަހައްދެއްގައި ތާރު އެޅި އެވެ.