ނިރުބަވެރި އިސްރާއީލުގެ ބާރުގެ ދަށަށް ޣައްޒާ ސިޓީ ގެންދިއުމަށް އިސްރާއީލުގެ ކެބިނެޓުން ފާސްކުރުމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެކަން ކުށްވެރިކުރައްވައިފި އެވެ.
މިކަމާއި ގުޅިގެން މިއަދު ރައީސް އެކްސްގައި އިނގިރޭސި ބަހުން ލިޔުއްވާ ހިއްސާކުރެއްވި ޕޯސްޓެއްގައި ވިދާޅުވެފައިވަނީ އިސްރާއީލުގެ ބާރުގެ ދަށަށް ޣައްޒާ ސިޓީ ގެންދިއުމަށް އިސްރާއީލުން ކުރަމުންދާ މަސައްކަތް ކުއްވެރިކުރައްވާ ކަމަށެވެ. އަދި އިސްރާއީލުގެ ނިރުބަވެރި މި އަމަލަކީ ބައިނަލްއަގުވާމީ އަދި އިންސާނީ ގާނޫނުތަކާ ވެސް ހިލާފު އަމަލުތަކެއް ކަމަށާއި، މިކަމުގެ ސަބަބުން ފަލަސްތީނު ރައްޔިތުންގެ މިނިވަންކަން އެއްކޮށް ގެއްލިގެން ދާނެ ކަމަށެވެ.
އަދި އިސްރާއީލުގެ މި އަމަލުތަކުގެ ސަބަބުން ހިފާފައިވާ ފަލަސްތީނުގެ ބިންތަކުގައި ތިބި ފަލަސްތީނުގެ ރައްޔިތުންނަށް އިތުރު ދަތިތަކާ ކުރިމަތިލާންޖެހުމުގެ އިތުރުން ސަރަހައްދީ އަމާންކަމާއި ހަމަޖެހުން ވެސް ގެއްލޭނެކަމަށް ރައީސް ވަނީ ވިދާޅުވެފަ އެވެ. އަދި މިކަމަކީ ރާއްޖެއިން ބަލައިނުގަންނާނެ އަމަލެއްކަން ފާހަގަކުރައްވާ ރައީސް ވިދާޅުވީ ރާއްޖެއިން އަބަދުވެސް ފަލަސްތީނުގެ ރައްޔިތުންގެ ހައްގުގައި ވަކާލާތުކުރާނެ ކަމަށެވެ.
ފަލަސްތީނުގެ ރައްޔިތުންނާއި ދެކޮޅަށް އިސްރާއީލުން ހިންގާ ނިރުބަވެރި އަމަލުތައް ކުއްވެރިކުރައްވާ ރައީސް ވަނީ ބައިނަލްއަގުވާމީ ޖަމުއިއްޔާ ޖަމާއަތްތަކަށް ގޮވާލައްވާފަ އެވެ.
އިސްރާއީލުގެ ބާރުގެ ދަށަށް މުޅި ޣައްޒާ ސިޓީ ގެންގޮސް އެތަނުގައި ވަކި ދައުލަތެއް ހިންގަން އިސްރާއީލުގެ ކެބިނެޓުން މިއަދު ނިންމާފައިވާއިރު، 2023 ވަނަ އަހަރުގެ އޮކްޓޫބަރު މަހުގެ ހަތް ވަނަ ދުވަހުން ފެށިގެން މިއަދާ ހަމައަށް އިސްރާއީލުން ޣައްޒާ ސިޓީއަށް ދެމުން އަންނަ ހަމަލާތަކުގައި މިހާތަނަށް 61،000 އަށްވުރެ ގިނަ ފަލަސްތީނު ރައްޔިތުން ޝަހީދުކޮށްލާފައިވާ ކަމަށް ޣައްޒާގެ ހެލްތު މިނިސްޓްރީން ވަނީ ހާމަކޮށްފަ އެވެ.
