ސަހާބީންނަށް ބަދުބަސް ބުނުމަކީ އަގީދާ ފާސިދުކަމުގެ ދަލީލެއްކަމަށް މިއަދުގެ ހުކުރު ހުތުބާގައި ބުނެފި އެވެ.

މިއަދުގެ ހުކުރު ހުތުބާގައި ބުނެފައިވާ ގޮތުގައި ﷲގެ ރަސޫލާއަށް ފަހު އަހަރެމެން އެންމެ ބޮޑަށް މަތިވެރިކުރަންޖެހޭ ބަޔަކީ އެކަލޭގެފާނުގެ ލޮބުވެތި އާލުބައިތުންނާއި ސަހާބީންނެވެ.

އަހަރެމެން ވާންޖެހޭނީ އެބޭކަލުން މާތްކޮށް އެބޭކަލުން ދެކެ ލޯބިވާ އެބޭކަލުން ދެއްކެވި ރިވެތި ނަމޫނާގައި ހިފައި އަދި އެބޭކަލުންނަށް ފުރައްސާރަކުރާ މީހުންގެ ކިބައިން ބަރީއަވެގެންވާ ބަޔަކު ކަމުގައި ކަމަށް ހުކުރު ހުތުބާގައި ވަނީ ބުނެފަ އެވެ.

ހުތުބާގައި ބުނެފައިވާ ގޮތުގައި ރަސޫލާގެ ސަހާބީންނަކީ އެންމެ މާތް އަދި އިސްލާމް ދީނުގެ ކަންކަން އެންމެ ބޮޑަށް ފަހުމުވެ ވަޑައިގަތް ބޭކަލުންނެވެ. އަދި ހަމައެހެންމެ، އިސްލާމް ދީން އަހަރެމެންނާއި ހަމައަށް ފޯރުކޮށްދެއްވީ އެބޭކަލުންކަން ފާހަގަކުރައްވާ ހުތުބާގައި ބުނެފައިވަނީ އެބޭކަލުންނަށް ބަދުބަސް ބުނުން އެމީހެއްގެ އަގީދާ ފާސިދުކަމުގެ ދަލީލަކަށް ފުދޭކަމަށެވެ. އެފަދަ މީހުން ބޭނުންވަނީ އެބޭކަލުންގެ މައްޗަށް އަހަރެމެންގެ ހިތް ނުބައިކުރުވައި އަހަރެމެން ދީނާ ދުރުކުރުވުމަށްކަމަށް ހުތުބާގައި ވަނީ ބުނެފަ އެވެ.

ރަސޫލާއަށް ފަހު އެންމެ މަތިވެރިވެގެންވާ ބޭކަލަކީ އިސްލާމީ އުންމަތުގެ އެންމެ ފުރުތަމަ ހަލީފާ އަބޫބަކުރުގެ ފާނު ކަމަށާއި އެކަލޭގެފާނަށް ފަހު އުމަރުގެ ފާނު ކަމަށް ހުތުބާގައި ބުންޏެވެ. އަދި އުމަރުގެފާނަށް ފަހު އުސްމާނުގެފާނު ކަމަށާއި އެކަލޭގެފާނަށް ފަހު އަލީގެފާނު ކަމަށެވެ. މިކަމަށް މުޅި އިސްލާމީ އުންމަތް އިއްތިފާގުވެފައިވާކަމަށާއި އަހަރެމެންގެ ހުތުބާތަކުގައި އަބަދުވެސް އެ ހަތަރު އެބޭކަލުންނަށް ހެޔޮ ދުއާ ކުރާކަމަށް ވަނީ ހުކުރު ހުތުބާގައި ބުނެފަ އެވެ.

މިއަދުގެ ހުކުރު ހުތުބާގައި ބުނެފައިވަނީ ސުންނަތް ޖަމާއަތުގެ އަހުލުވެރިންގެ އަގީދާއަކީ ރަސޫލާއަށް ފަހު އެކަލޭގެފާނުގެ ލޮބުވެތި އާލުބައިތުންނާއި ސަހާބީން މަތިވެރިކުރުން ކަމަށެވެ. މިކަމާއި ހިލާފުވާ ކޮންމެ މީހަކީ ބާތިލު ފިކުރުގެ އަހުލުވެރިންކަމަށްވުމުން ސުންނަތް ޖަމާއަތުގެ އަހުލުވެރިންގެ އަގީދާގައި އަހަރެމެންގެ ފައިތިލަތައް ސާބިތުކުރަންޖެހޭކަމަށް ހުކުރު ހުތުބާގައި އިތުރަށް ވަނީ ބުނެފަ އެވެ.