އުނގެނުމުގައި ހާއްސަ އެހީއަށް ބޭނުންވާ ދަރިވަރުންނަށް ކިޔަވައިދޭ މުދައްރިސުން ތަމްރީނުކުރުމުގެ ކޯސް އިއުލާންކޮށްފި އެވެ.

އުނގެނުމުގައި ހާއްސަ އެހީއަށް ބޭނުންވާ ދަރިވަރުންނަށް ކިޔަވައިދޭ މުދައްރިސުން ތަމްރީނުކުރުމުގެ ކޯސް އިއުލާންކުރުމަށް އިއްޔެ ބޭއްވި ރަސްމިއްޔާތު ޝަރަފްވެރިކޮށްދެއްވީ ތައުލީމާ ބެހޭ ވަޒީރު ޑރ. އިސްމާއިލް ޝަފީއު އެވެ.

މިކަމާއި ގުޅިގެން ތައުލީމީ ވުޒާރާއިން ބުނެފައިވާ ގޮތުގައި ޑިޕްލޮމާ ލެވެލްގެ މި ކޯސް ކުރިއަށް ގެންދިއުމަށް ހަމަޖެހިފައިވަނީ ދިވެހިރާއްޖޭގެ އިސްލާމީ ޔުނިވާސިޓީ އަދި ވިލާ ކޮލެޖް ގުޅިގެންނެވެ. މިއީ އެއް އަހަރުދުވަހުގެ މުއްދަތަށް ދެ ސެމިސްޓާއަކަށް ބަހާލައިގެން ކުރިއަށްގެންދާ ކޯހެއްކަމަށް ތައުލީމީ ވުޒާރާއިން ވަނީ ބުނެފަ އެވެ.

މި ކޯހުގައި ބައިވެރިވުމުގެ ޝަރުތުތަކުގެ ތެރޭގައި، އޭ ލެވަލް ދެ މާއްދާއިން ފާސްވެފައިވުން ނުވަތަ އެމްއެންކިޔުއެފް ލެވަލް ހަތަރެއްގެ ކޯހެއް ފުރިހަމަކޮށްފައިވުން ހިމެނެ އެވެ. މިކޯހުގައި ބައިވެރިވާ ދަރިވަރުންނަށް ހިލޭ ކިޔެވުމުގެ ފުރުސަތު މިނިސްޓްރީން ހުޅުވާފައިވާއިރު ކޯހުގެ ކޮންމެ ބައިވެރިއަކަށް 1,500 ރުފިޔާގެ އެލަވަންސް އެއް ދިނުމަށް އެ ވުޒާރާއިން ވަނީ ނިންމާފަ އެވެ.

ތައުލީމީ ވުޒާރާއިން އިތުރަށް ބުނެފައިވާ ގޮތުގައި ކޮންމެ ޖިންސެއްގެ ކޮންމެ އުމުރުފުރައެއްގެ މީހަކަށް ވެސް މި ކޯހުގައި ބައިވެރިވެވޭނެ އެވެ.

ތައުލީމީ ވުޒާރާއިން އުނގެނުމުގައި ހާއްސަ އެހީއަށް ބޭނުންވާ ދަރިވަރުންނަށް ކިޔަވައިދޭ މުދައްރިސުން ތަމްރީނުކުރުމުގެ ކޯސް އިއުލާންކޮށްފައި މިވަނީ އުނގެނުމުގައި ހާއްސަ އެހީއަށް ބޭނުންވާ ދަރިވަރުންނަށް ކިޔަވައިދޭ 600 މުދައްރިސުން ބޭނުންވާކަމަށް ތައުލީމާ ބެހޭ ވަޒީރު ޑރ. އިސްމާއިލް ޝަފީއު ވަނީ މީގެ ކުރިން ވިދާޅުވެފައި ވަނިކޮށެވެ.