^{ނަތަންޔާހޫ އައިޑީއެފްގެ އިސް ވެރިންނާއި މަޝްވަރާކުރަނީ: އޭނާގެ ވެރިކަން ވައްޓާލަން މަސައްކަތްކުރާތީވެ އެ ތަޙްޤީޤު މިހާރު ވަނީ ފަށާފަ. (ފައިލް ފޮޓޯ)}

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ ވެރިކަން އަސްކަރީ ބަޣާވާތަކުން ވައްޓާލަން އަސްކަރިއްޔާގެ ތެރެއިން މަސައްކަތް ފަށައިފި ކަމަށް ނަތަންޔާހޫގެ ދަރިކަލުން ޔާއިރު ނަތަންޔާހޫ ބުނުމާއި އެކު އިސްރާއީލުގެ އަސްކަރިއްޔާގެ ތެރޭގައި ތަޙްޤީޤެއް ހިންގަން ފަށައިފިއެވެ.

ސޯޝަލް މީޑިއާގައި ޔާއިރު ތުހުމަތު ކުރި ގޮތުގައި ނަތަންޔާހޫގެ ވެރިކަން ވައްޓާލުމަށް ބަޣާވާތެއް ގެންނަން އުޅެނީ އައިޑީއެފްގެ ޗީފް އޮފް ސްޓާފް ލެފްޓިނެންޓް ޖެނެރަލް އީޔަލް ޒާމިރު އިސްކޮށް ހުރެގެންނެވެ.

އޭނާ މި ތުހުމަތުތައް ކޮށްފައިވަނީ ޣައްޒާ ހިފަން ނަތަންޔާހޫ އަމުރުކުރުމުން އެކަމާއި ޖެނެރަލް ޒާމިރު އާއި ހައްދުފަހަނަ އެޅި މުޖުރިމު ނަތަންޔާހޫ އާއި ދެމެދު ދެބަސްވުންތަކެއް އުފެދިފައިވާ ދަނޑިވަޅެއްގައެވެ.

^{ބަޣާވާތުން ނަތަންޔާހޫ ދުރުކޮށްލަން އުޅޭތީ އައިޑީއެފް ތެރޭގައި ދަނީ ތަޙްޤީޤެއް ހިންގަމުން / ފޮޓޯ: އައިޑީއެފް}

ޖެނެރަލް އީޔަލް ޒާމިރު އައިޑީއެފްގެ އެ މަޤާމަށް އައްޔަންކުރީ ޑިފެންސް މިނިސްޓަރު ކަޓްޒްއެވެ. މަޢުލޫމާތު ލިބެމުންދާ ގޮތުގައި ނަތަންޔާހޫ ވަނީ ޑިފެންސް މިނިސްޓަރާއި ވެސް މިހާރު ބައްދަލު ކޮށްފައެވެ.

އައިޑީއެފް އިން މި ފަހުން ކުރި ހަނގުރާމަ ތަކުގައި އެންމެ އިސް ރޯލެއް ކުޅުނީ ވެސް ޒާމިރެވެ. ޣައްޒާ، ލުބުނާން، ސީރިއާ، އަދި އީރާނާއި ދެކޮޅަށް ހިންގި ޖަރީމާ ތަކުގައި ލީޑްކުރީ އޭނާ އެވެ.

އިސްރާއީލުގެ އަސްކަރިއްޔާގެ ތެރޭގައި ބައިބައިވުން އުފެދިފައިވާއިރު މައްސަލަ ހައްލު ކުރުމަށް ނަތަންޔާހޫ އާއި ޑިފެންސް މިނިސްޓަރު ކަޓްޒް ދަނީ މަސައްކަތް ކުރަމުންނެވެ.

އިސްރާއީލުން ޢަމަލުކުރަމުންދާ ސިޔާސަތަކީ އެ ޤައުމުގެ އެތެރޭގައި ހިނގާ މިފަދަ ކަންކަން ސިއްރު ކުރުމަށް އަބަދުވެސް މަސައްކަތް ކުރުމެވެ. އަސްކަރިއްޔާގެ ތެރޭގައި މައްސަލައެއް އުޅުނަސް، އަދި ހަނގުރާމައެއްގައި އިސްރާއީލަށް ލިބޭ ގެއްލުންތައް ވެސް އަބަދުވެސް އެމީހުން ސިއްރު ކުރެއެވެ.