ހުސްވެފައިވާ އުއްތަމަ ފަނޑިޔާރުގެ މަގާމަށް އައްޔަންކުރަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފޮނުއްވާފައިވާ ސުޕްރީމް ކޯޓުގެ ކުރީގެ ފަނޑިޔާރު އަބްދުލްޣަނީ މުހައްމަދު އައްޔަން ކުރުމަށް ރައްޔިތުންގެ މަޖިލީހުން މިއަދު ފާސްކޮށްފި އެވެ.
އެ މަގާމަށް ޣަނީ އައްޔަނުކުރަން ފެންނަ ކަމަށް މަޖިލީހުން ފާސްކުރީ ވޯޓުގައި ބައިވެރިވި 62 މެންބަރުންގެ އިއްތިފާގުންނެވެ.
އުއްތަމަ ފަނޑިޔާރުގެ މަގާމު ހުސްވެފައިވަނީ އެ މަގާމުގައި އެންމެ ފަހުން ހުންނެވި އަހުމަދު މުއުތަސިމް އަދުނާން މިދިޔަ މަހު އެ މަގާމުން ރިޓަޔާ ކުރެއްވުމުންނެވެ. އެ މަގާމަށް ޣަނީގެ އިތުރުން އިތުރު ދެބޭފުޅަކުވެސް ކުރިމަތިލެއްވިއެވެ. އެއީ ފެމިލީ ކޯޓުގެ ގާޒީ އަބްދުﷲ މުހައްމަދާއި ހައިކޯޓުގެ ކުރީގެ އިސް ފަނޑިޔާރު ޝުޖާއު އުސްމާނެވެ.
ޖޭއެސްސީން ކުރިއަށްގެންދިޔަ އިންޓަވިއުތަކަށް ފަހުގައި މާކްސް ދީފައިވާ ގޮތުން އުއްތަމަ ފަނޑިޔާރަކަށް ޣަނީ އައްޔަން ކުރަން ރައީސް އަށް ލަފާއަރުވަން "ހައިލީ ރިކޮމެންޑެޑް" ވަނީ ލިބިވަޑައިގެންފައެވެ. އަދި އަބްދުﷲ އަށް "ރިކޮމެންޑެޑް" ލިބިވަޑައިގެންނެވި އިރު، ޝުޖާއު އަށް ލިބިވަޑައިގެންނެވީ ތިންވަނަ އެވެ.
ޣަނީ އަކީ 2000 ވަނަ އަހަރުން ފެށިގެން ޖުޑިޝަރީގައި މަސައްކަތް ކުރެއްވި ބޭފުޅެކެވެ. މަދަނީ ކޯޓުގެ ގާޒީ ކަމަށް ފަހު ހައިކޯޓުގެ އިސް ފަނޑިޔާރުކަން އަދި ފަހުން ސުޕްރީމް ކޯޓުގެ ފަނޑިޔާރުކަންވެސް ޣަނީ ވަނީ ކުރައްވާފައެވެ. ޖޭއެސްސީގެ ރައީސްކަންވެސް ޣަނީ ކުރައްވާފައިވާއިރު މިވަގުތު އޭނާ ހުންނެވީ ޓެކްސް އެޕީލް ޓްރައިބިއުނަލްގެ ރައީސްގެ މަގާމުގައެވެ.
