ގާނޫނަށް ގެނެވޭ އިސްލާހުތަކަކީ ދިވެހި ގައުމާއި ރައްޔިތުންނަށް ފައިދާހުރި އިސްލާހުތަކެއްތޯ ބަލަންޖެހޭކަމަށް އިނގުރައިދޫ ދާއިރާގެ މެމްބަރު އިބްރާހީމް ފަލާހު ވިދާޅުވެއްޖެ އެވެ.
ފަލާހު މި ބީދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަފުޅުދައްކަވަމުންނެވެ. އެގޮތުން ގާނޫނަށް ގެންނަންޖެހޭ އިސްލާހުތަކަކީ ސިޔާސީ ނަޒަރަކުންނަށްވުރެ ބޮޑަށް އެ އިސްލާހުތަކަކީ ރައްޔިތުންނަށް އޭގެން ފައިދާހުރި ކަމެއްތޯ ބެލުން މުހިއްމުކަމަށް އޭނާގެ ވާހަކަފުޅުގައި ވަނީ އިތުރަށް ފާހަގަކުރައްވާފަ އެވެ.
މިއަދުގެ ޖަލްސާގައި ވާހަކަފުޅުދައްކަވަމުން ފަލާހު އިތުރަށް ވިދާޅުވެފައިވަނީ ކައުންސިލްތަކުގެ ދައުރަކީ ފަސް އަހަރު ދުވަހުގެ ދައުރެއް ކަމުގައިވަނީނަމަ ހަތަރު އަހަރުދުވަހު މަސައްކަތްކުރުމަށްފަހު ބާކީ އެއް އަހަރަށް ވީމާ ކައުންސިލުގެ ބޮޑެތިކަންކަން ނިންމުން އެއީ ރަނގަޅު ގޮތެއް ނޫންކަމަށެވެ. އަދި މި އިސްލާހު ވެރިކަމުގެ ނިޒާމަށް ވެސް މިފަދަ ކަންކަން ނުކުރެވޭނެގޮތަށް ގާނޫނު އިސްލާހުކުރަންޖެހޭ ކަމަށް ފަލާހު ވަނީ ވިދާޅުވެފަ އެވެ.
އެގޮތުން އެމްޑީޕީން ވެރިކަމުގައި އޮތް ދުވަސްވަރު އަޅާފައިވާ ބައެއް ފިޔަވަޅުތަކަށް ފާޑުވިދާޅުވަމުން ފަލާހު ވިދާޅުވީ އެއްކަމަކީ އޭރުގެ ސަރުކާރުން، ރައީސުލްޖުމްހޫރިއްޔާއަށް ލިބިދީފައިވާ ބާރުގެ ތެރެއިން ރިޔާސީ އިންތިހާބާއި ދިމާކޮށް ވޯޓު ހޯދުމުގެ ނިޔަތުގައި ދައުލަތަށް 11 ބިލިއަން ރުފިޔާގެ ގެއްލުން ލިބޭވަރުގެ ބިންތަކެއް ހިލޭ ބަހާލިކަން ފާހަގަކުރައްވާފައިވެ އެވެ.
އައު ގާނޫނުތަށް މަޖިލީހަށް ހުށަހަޅަން ވާނީ އިންތިހާބުތަކާއި ގުޅުވައިގެން ނޫންކަމަށް ވެސް ފަލާހު ވަނީ ވިދާޅުވެފަ އެވެ.
