ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް އިސްލާހު ގެނައުމަށް މަޖިލީހަށް ބިލެއް ހުށަހަޅައިފި އެވެ.

ގާނޫނު ނަމްބަރު 7/2010 އަށް އިސްލާހު ގެނައުމަށް މިއަދުގެ ޖަލްސާގައި ސަރުކާރުގެ ފަރާތުން މި ބިލު މަޖިލީހަށް ހުށަހަޅުއްވާފައިވަނީ ފުވައްމުލަކު ދެކުނު ދާއިރާގެ މެމްބަރު އިބްރާހީމް ހުސައިން އެވެ.

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ގެންނަން މި ބިލުގެ ދަށުން ހުށަހަޅާފައިވާ އިސްލާހުތަކުގެ ތެރޭގައި އެ ގާނޫނުގެ 70 ވަނަ މާއްދާގެ (ށ) ގެ ދަށުން އުފައްދާ ލޯކަލް އޮތޯރިޓީ ކުންފުނިތަކުން ކުރާ ވިޔަފާރީގެ މަސައްކަތްތަކަކީ ވަކިކަހަލަ ޝަރުތުތަކެއް ފުރިހަމަވާ މަސައްކަތްތަކެއް ކަމުގައި ވާންޖެހޭނެކަމަށް މިބިލުގައި ވަނީ ފާހަގަކޮށްފަ އެވެ. ގާނޫނުގެ 70 ވަނަ މާއްދާގެ (ބ) ގެ ފަހަތަށް ދެ އަކުރު އިތުރުކުރަން ވަނީ ނިންމައިފަ އެވެ. އެއީ (ޅ) އަދި (ކ) އެވެ.

އެގޮތުން މި ގާނޫނުގެ 70 ވަނަ މާއްދާގެ (ޅ) އަށް އިތުރުކުރުމަށް ބިލުގައި ފާހަގަކޮށްފައިވާ ކަންތައްތަކުގެ ތެރޭގައި:

1. އެ މަސައްކަތަކީ ލޯކަލް އޮތޯރިޓީ ކުންފުނި ނިސްބަތްވާ ރަށުގައި ނުވަތަ ރަށްތަކުގައި އަމިއްލަ ފަރާތްތަކުން ކުރަމުންދާ އިގްތިސާދީ މަސައްކަތެއް ނުވަތަ ވިޔަފާރިއެއް ކަމުގައި ނުވުން.
2. އެ މަސައްކަތަކީ ރަށުގެ ނުވަތަ ރަށްތަކުގެ އުމްރާނީ ތަރައްގީއަށް ކޮންމެހެން ކުރަން ޖެހިފައިވާ މަސައްކަތެއް ކަމުގައިވުން.
3. އެ މަސައްކަތުގެ އިންވެސްޓްމެންޓް އަދަދު 10 މިލިއަން ރުފިޔާއަށްވުރެ ބޮޑުވުން

އަދި މި ގާނޫނުގެ 70 ވަނަ މާއްދާގެ (ކ) އަށް އިތުރުކުރުމަށް ބިލުގައި ފާހަގަކޮށްފައިވާ ގޮތުގައި މި ގާނޫނަށް އިސްލާހު ގެނެސް މި ގާނޫނަށް އަމަލުކުރަން ފަށާތާ 90 ދުވަހުގެ ތެރޭގައި އެފަދަ ވިޔަފާރީގެ ހަރަކާތްތައް ހުއްޓާލަންޖެހޭނެއެވެ.

މި ގާނޫނުގެ 75 ވަނަ މާއްދާގެ (ނ) ގެ ފަހަތަށްވެސް އަކުރެއް އިތުރުކުރަން ވަނީ ހުށަހަޅުއްވައިފަ އެވެ. އެގޮތުން މި މާއްދާގެ (ށ)ގެ (9) ވަނަ ނަމްބަރު އަދި (12) ވަނަ ނަމްބަރު މާއްދާގައި، ސަރުކާރުން ރައްޔިތުންނަށް ފޯރުކޮށްދޭ އަސާސީ ހިދުމަތްތައް ފޯރުކޮށްދިނުމުގެ ބޭނުމަށް އެކި ފަރާތްތަކަށް ދޫކޮށްފައިވާ ބިމުން ނުވަތަ އިމާރާތުން ކުއްޔެއް ނުނެގޭނެ ކަމަށް މިބިލުގައި ވަނީ ފާހަގަކޮށްފަ އެވެ.

މި ގާނޫނުގެ 79 ވަނަ މާއްދާގެ (ނ) އިސްލާހުކުރަން ވަނީ ހުށަހަޅުއްވައިފަ އެވެ. އެގޮތުން މި މާއްްދާގެ (ހ) ގެ (1) ވަނަ މާއްދާގައި ބަޔާންކުރާ އާމްދަނީ ކައުންސިލްތަކަށް ދޫކުރަންވާނީ އެއްވެސް ގާނޫނެއްގެ ދަށުން ދައުލަތައް ދައްކަންޖެހޭ އެއްވެސް ޓެކުހެއްވާނަމަ، އެ ޓެކުހަށްވާ ފައިސާއާއި، މި ގާނޫނުގެ 69-1 ވަނަ މާއްދާގައި ބަޔާންކުރާ އާންމު ހިދުމަތްތަކަށް ކައުންސިލްތަކުން ދައްކަންޖެހޭ ފައިސާއެއް ނުދައްކާތާ ހަ މަސްދުވަހަށްވުރެ ގިނަ ދުވަސް ވެފައިވާނަމަ، އެ ފައިސާއެއް އުނިކުރުމަށްފަހު ބާކީވާ އަދަދުކަމަށް މި ބިލުގައި ވަނީ ފާހަގަކޮށްފަ އެވެ.

މީގެ އިތުރުންވެސް މި ގާނޫނުގެ 100 އަދި 144 އަށް އިތުރު އިސްލާހުތަކެއް ގެނައުމަށް މި ބިލުގައި ވަނީ ހިމަނާފަ އެވެ. މިއަދުގެ މަޖިލީހުގައި މި ބިލަށް ބަހުސްކުރަން ވަނީ ފަށައިފަ އެވެ.