ނުރައްކާތެރިކޮށް ވެހިކަލް ދުއްވުން ޖިނާއީ ކުށަކަށް ހެދުމަށް އިސްލާހު ހުށަހަޅައިފި އެވެ.

ގަލޮޅު ދެކުނު ދާއިރާގެ މެމްބަރު މީކާއިލް އަހްމަދު ނަސީމް ހުށަހަޅުއްވާފައިވާ ގާނޫނު ނަންބަރު 9/2014 ގެ އިބްތިދާއީ ބަހުސް މިއަދުގެ މަޖިލީހުގައި ކުރިއަށް ގެންގޮސްފި އެވެ.

މީކާއިލް ވިދާޅުވީ މި އިސްލާހުގެ ސަބަބުން ބިރުވެރިކަން އުފެދޭ ފަދަ ގޮތަކަށް ނުވަތަ މީހެއްގެ ފުރާނަ އަށް ގެއްލުމެއް ކުރިމަތި ވެދާނެ ކަމާއި މެދު ފަރުވާލެއް ނެތް ގޮތަކަށް ވެހިކަލް ދުއްވުމާއި، އެހެން މީހެއްގެ ހަށިގަނޑަށް ބޮޑު އަނިޔާއެއް ލިބިދާނެގޮތަށް ނުވަތަ މަރުގެ ބިރު ކުރިމަތިވާނެ ގޮތަށް ފަރުވާލެއް ނެތި ކުރާ އަމަލެއް ގޮތުގައި މި އިސްލާހުގެ ސަބަބުން ބަލާނެކަމަށެވެ.

އަދި ނުރައްކާތެރިކޮށް ވެހިކަލް ދުއްވުން ކުށެއް ކަމުގައި ކަނޑައެޅުމަށް ގާނޫނުލްއުގޫބާތަށް މަައްދާއެއް މި ބިލުން ތައާރަފް ކުރެވޭނެ ކަމަށް ވެސް ވިދާޅުވި އެވެ.

މީކާއިލް އިތުރަށް ކަންބޮޑުވުން ފާޅުކުރީ މިހާރު އޮންނަ ގޮތުން މީހަކަށް އަނިޔާއެއް ނުލިބޭނަމަ ނުވަތަ މަރުނުވާނަމަ ކުށެއްކަމަށް ނުބަލާ ކަމަށެވެ. ނަމަވެސް މި ބިލް ގެ ސަބަބުން މީހަކަށް އަނިޔާއެއް ވިޔަސް ނުވިޔަސް މީހުންގެ ފުރާނަ އަށް ނުރައްކާތެރި ވާގޮތަށް ދުއްވުމާއި، ނުބައި މަގުތަކުން ދުއްވުން ފަދަ ހުރިހާ ކަމަކަށްވެސް ވަކި އަދަބެއް ކަނޑައެޅިގެން ދާނެ ވިދާޅުވި އެވެ.

މީގެ އިތުރަށް މެމްބަރު ދިން ލަފައަކީ މި މައްސަލަތަކާއި މެދު ހޭލުންތެރިކުރުމަށް ކައުންސިލްތަކުގެ ބަޖެޓުން ވަކި ވަރެއް ކަނޑައަޅަން ޖެހޭކަމަށެވެ.

މި ބިލުގެ ދަށުން ގާނޫނުލް އުގުބާތުގައި ކުށެއް ގޮތުގައި އިތުރުކުރާ މާއްދާއަކީ ބިރުވެރިކަން އުފެދޭ ފަދަ ގޮތަކަށް ނުވަތަ މީހެއްގެ ފުރާނަ އަށް ގެއްލުމެއް ކުރިމަތި ވެދާނެ ކަމާއި މެދު ފަރުވާލެއް ނެތް ގޮތަކަށް ވެހިކަލް ދުއްވުމާއި، އެހެން މީހެއްގެ ހަށިގަނޑަށް ބޮޑު އަނިޔާއެއް ލިބިދާނެގޮތަށް ނުވަތަ މަރުގެ ބިރު ކުރިމަތިވާނެ ގޮތަށް ފަރުވާލެއް ނެތި ކުރާ އަމަލެވެ.

ނުރައްކާތެރިކޮށް އެއްގަމު އުޅަނދު ދުއްވުމުގެ ކުށް ކަނޑައެޅުމުގައި ހިމަނާފައިވާ ބައެއް ކަންތައްތަކީ:

1. އެ މީހެއްގެ ނަފްސުގެ ރައްކަލަށް ނުވަތަ މަގުތަކުގެ ބޭނުންކުރާ މީހުންގެ ރައްކާތެރިކަމަށް ފަރުވާލެއް ބެލެހެއްޓުމެއްނެތި، ނުރައްކާތެރިކޮށް ދުއްވުމުގެ ގޮތުގައި ބެލެވޭނެ.
2. ބާރަށް ދުއްވުމާއި، ނުރައްކާތެރިކޮށް އޯވަޓޭކް ކުރުމާއި، ލައިސަންސް ނެތި ދުއްވުމާއި ގާނޫނާ ހިލާފު އެއްވެސް ގޮތަކަށް ދުއްވައިފިނަމަ އަދަބު ކަނޑައެޅުން.
3. ގާނޫނުގެ ދަށުން އެކުލަވާލާފައިވާ ގަވާއިދުތަކުގެ ދަށުން ކަނޑައެޅިފައިވާ އެންމެ މަތީ ބާރުމިނަށްވުރެ ބާރަށް ދުއްވުން.

މި އިސްލާހުގެ ދަށުން ނުރައްކާތެރިކޮށް ވެހިކަލް ދުއްވުމުގެ ކުށުގެ ދަރަޖައަކީ ޖިނާއަތުގެ ހަތަރު ވަނަ ދަރަޖައިގެ ކުށެކެވެ.