މުސްލިމުންގެ އެންމެ މާތް މުޤައްދަސް ތިންވަނަ މިސްކިތް ކަމަށްވާ މާތްވެގެންވާ މަސްޖިދުލް އަޤްޞާ އަށް ޔަހޫދީންގެ 1250 އަށް ވުރެ ގިނަ ކާފަރުން މިއަދު ވަދެ، ލަވަ ކިޔައި ނަށައި ޑަންސުކޮށް ހަދައިފިއެވެ.
ހައްދުފަހަނަ އެޅި އިސްރާއީލުގެ ކަނާތުފިޔައިގެ ޤައުމީ ސަލާމަތާއި ބެހޭ މިނިސްޓަރު އިޓަމާ ބެން ގްވީރު އިސްކޮށް ހުރެ މަސްޖިދުލް އަޤްޞާގެ ޙުރުމަތް ކަނޑައިލުމަށްފަހު ބުނީ، އެމީހުން މިސްކިތަށް ވަނީ ނަމާދު ކުރުމަށް ކަމަށާއި އަދި ޙަމާސް ބަލިވުމުން އެކަމުގެ އުފާ ފާޅުކުރުމަށެވެ.
މަސްޖިދުލް އަޤްޞާގައި ޔަހޫދީންނަށް ނަމާދު ކުރުމާއި ކާފަރުންގެ ދީނީ ކަންކަން ކުރުމަށް އޮންނަނީ މަނާ ކޮށްފައެވެ. އޭނާ ބުނީ އެ ގޮތަށް މުސްލިމުންނަކަށް ޔަހޫދީންގެ ދީނީ އަޅުކަން ކުރުމަށް މަނާ ކުރެވިގެން ނުވާނެ ކަމަށެވެ.
ޤުދުސްގެ އިސްލާމީ ވަޤްފުން ކަށަވަރުކޮށްދިން ގޮތުގައި ޔަހޫދީން މިއަދު އަޤްޞަ އަށް ވަދެގަތީ އިސްރާއީލުގެ ޒައެނިސްޓު ހަތިޔާރު އެޅި ސިފައިންގެ އެހީތެރިކަމާއެކު ފުލް ސެކިއުރިޓީގައެވެ.
ނުލަފާ ބޮޑުވަޒީރު ނަތަންޔާހޫގެ އޮފީހުން ބުނީ ޔަހޫދީންނަށް އަޤްޞާ މިސްކިތުގެ ގޯތިތެރޭގައިވާ ޓެމްޕަލް މައުންޓަށް ޒިޔާރަތް ކުރެވޭނެ ކަމަށެވެ.
މިއީ ބެލެވޭ ގޮތުގައި “ޑޯމް އޮފް ދަ ރޮކް” ހުންނަ ތަނެވެ. މިތަނަކީ ޔަހޫދީންގެ ފުރަތަމަ ފައްޅި ހުރި ތަން ކަމަށް އެ މީހުން ޤަބޫލުކުރެއެވެ. މިއީ ޔަހޫދީ ދީނުގައި އެންމެ މާތް ތަނެވެ. ޔަހޫދީންނަށް އެތަނަށް ޒިޔާރަތް ކުރެވޭނެ ކަމަށާއި ނަމަވެސް، މުސްލިމުންނާއި މެދު އަރައިރުންވެ ތަޅާފޮޅަން ޖެހިދާނެތީވެ އިސްރާއީލު ސަރުކާރުން އަންގާފައިވަނީ އެތަނުގައި ޔަހޫދީން ނަމާދު ނުކުރުމަށެވެ. ނަމަވެސް ޔަހޫދީންގެ ގިނަ ޖަމާއަތްތަކުން ބުނަނީ އެ ތަނުގައި ނަމާދު ކުރުމަކީ ޔަހޫދީންގެ ދީނީ ވާޖިބެއް ކަމަށާއި، އެތަނުގައި ނަމާދު ކުރުމުގެ ހައްގު ހޯދައި ދިނުމަށެވެ.
