ހައި ކޯޓުގެ ފަނޑިޔާރު ކަމަށް ކުރިމަތިލި މުހައްމަދު ޝަހީދު، އޭނާގެ ނަން އަނބުރާ ނަގައިފި އެވެ.
ޝަހީދު އޭނާގެ ނަން އަނބުރާ ގެންގޮސްފައި މިވަނީ އާންމުންގެ ގިނަ ބައެއްގެ ފާޑުކިޔުން އޭނާއަށް އަމާޒުވެފައިވާ ދަނޑިވަޅެއްގަ އެވެ. އެގޮތުން ހައިކޯޓުގެ ފަނޑިޔާރުގެ މަގާމަށް ޝަހީދު އައްޔަން ކުރަން ހުއްޓުވުމުގެ ގޮތުން ސިވިލް ކޯޓަށް ހުށަހަޅާފައިވާ މައްސަލަ މިހާރު ވަނީ ބަލައިގެންފަ އެވެ. މި މައްސަލަ ސިވިލް ކޯޓަށް ހުށަހަޅުއްވާފައިވަނީ ކުރިން ޕީޖީ އޮފީހުގެ ވަކީލެއްގެ ގޮތުގައި މަސައްކަތް ކުރެއްވި ބޭފުޅެއްކަމަށްވާ އަހުމަދު ނައުޝާދު އެވެ.
ސިވިލް ކޯޓުން އެ މައްސަލަ މިހާރު ބަލައިގަނެފައިވާ އިރު، ޝަހީދު ހައި ކޯޓުގެ ފަނޑިޔާރުކަމަށް އައްޔަނުކުރާ ރަސްމިއްޔާތު ޖުޑީޝަލް ސާވިސް ކޮމިޝަން (ޖޭއެސްސީ) އިން މިރޭ ބޭއްވުމަށް ވަނީ ނިންމައިފަ އެވެ.
Advertisement
ފާހަގަކޮށްލަންޖެހޭ ގޮތުގައި ހައި ކޯޓުގެ ފަނޑިޔާރު ކަމުގެ މަގާމަށް ދެ ބޭފުޅަކު ވަނީ ކުރިމަތިލައްވައިފަ އެވެ. އެ ދެބޭފުޅުންނަކީ ޢަބްދުﷲ ޖަމީލް މޫސާ އަދި މުޙައްމަދު ޝަހީދު އެވެ. އެ ދެބޭފުޅުން ފަނޑިޔާރުކަމުގެ މަގާމަށް އައްޔަންކުރުމަށް ނިންމާފައިވަނީ ނިމިދިޔަ ޖުލައި މަހުގެ 30 ވަނަ ދުވަހުގެ ރޭ ބޭއްވުނު ޖޭއެސްސީގެ 27 ވަނަ ބައްދަލުވުމުގަ އެވެ.
ޝަހީދު ހައި ކޯޓުގެ ފަނޑިޔާރުކަމަށް ކުރިމަތިލުމުގެ ކުރިން ހުރީ މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީގެ ޑެޕިއުޓީ މިނިސްޓަރުގެ މަގާމުގަ އެވެ.
