މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ 20ވަނަ އަހަރީ ދުވަސް ފަހާގަކުރުމަށް "ރަން ރީނދޫ"ގެ ނަމުގައި ހިނގުމާއި ދުވުމުގެ ހަރަކާތެއް ކުރިއަށް ގެންގޮސްފި އެވެ.

މި ހަރަކާތް ބާއްވާފައިވަނީ ހުޅުމާލޭ ސެންޓްރަލް ޕާކް ވަށައިގެން އޮންނަ ބަގީޗާ ހިނގުން މަގުގަ އެވެ. މި ހަރަކާތުގައި އެމްޑީޕީގެ އިސް ބޭފުޅުން ވަނީ ބައިވެރިވެވަޑައިގެންފަ އެވެ. އެގޮތުން ކުރީގެ ރައީސް އިބްރާހިމް މުހައްމަދު ސާލިހާއި ކުރީގެ ނައިބު ރައީސް ފައިސަލް ނަސީމްގެ އިތުރުން އެ ޕާޓީގެ ޗެއަރ ޕާސަން ފައްޔާޒް އިސްމާއީލް ވަނީ ބައިވެރިވެ ވަޑައިގެންފަ އެވެ.

މިއަދު ހަވީރު 17:00ގައި ފެށި މި ހަރަކާތުގައި 300 އެއްހައި މީހުން ބައިވެރިވެފައިވެއެވެ. އެމްޑީޕީން މި ހަރަކާތް ފަށާފައިވަނީ ހާއްސަ ދަންމަރަކާއެކު އެވެ. މި ދަންމަރާއި ގުޅޭ ގޮތުން އެމްޑީޕީން ބުނެފައިވަނީ، ވޭތުވެދިޔަ 20 އަހަރު ދިވެހިންނަށާއި ރާއްޖެ އަށް ކޮށްދީފައިވާ އެކިއެކި ހިދުމަތްތައް އަދި ގެނެސްދީފައިވާ ތަރައްގީ ރަމްޒު ކޮށްދޭނެ ދަންމަރެއް ކަމަށެވެ.

އެމްޑީޕީން ބުނެފައިވާ ގޮތުގައި ހއ. ތުރާކުނުން ފެށިގެން އައްޑޫސިޓީއަށް، އަންނަ އަހަރުގެ އޭޕްރީލް މަހުގެ ކުރިން މި ހަރަކާތް ކުރިއަށް ގެންގޮސް ނިންމާލުމަކީ އެ ޕާޓީގެ އަމާޒެއްކަމަށް އެމްޑީޕީން ބުނެއެވެ.

އެޕާޓީން އެންމެ ފުރުތަމަ މި ހަރަކާތް ބާއްވަން ނިންމާފައިވަނީ މިދިޔަ ޖުލައި މަހުގެ 18 ވަނަ ދުވަހު ހުޅުމާލޭ ސެންޓްރަލް ޕާކް ވަށައިގެން އޮންނަ ބަގީޗާ ހިނގުން މަގުގަ އެވެ. އެއަށްފަހު އެ ހަރަކާތް މިދިޔަ ޖުލައި މަހުގެ 25 ވަނަ ދުވަހު އާޓިފިޝަލް ބީޗުން ފެށުމަށް ވެސް އެ ޕާޓީން އެފަހަރު ނިންމި އެވެ. އެ ހަރަކާތަކީ ސިޔާސީ ހަރަކާތެއް ކަމަށް ބުނެ ސަރުކާރުން އެ ހަރަކާތް ކުރިއަށް ގެންދިއުމަށް ހުރަސް އަޅަމުންދާކަމަށްބުނެ އެ ޕާޓީން މީގެ ކުރިން ވަނީ ސަރުކާރަށް ދޮގު ތުހުމަތުތަކެއް ވެސް ކޮށްފަ އެވެ.