ނ. ވެލިދޫ އޮޑިދޯނި ފަހަރަށް ހާއްސަ ސަރަހައްދުގެ ބިންހިއްކުމުގެ މަސައްކަތް އެއްކޮށް ނިންމާލައިފި އެވެ.

މި މަސައްކަތަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނ އަތޮޅަށް ނިމިދިޔަ ޖުލައި މަހު ކުރެއްވި ދަތުރުފުޅުގައި ފައްޓަވާދެއްވި މަސައްކަތެކެވެ.

މި މަޝްރޫއުގެ އަމަލީ މަސައްކަތް ފަށާފައިވަނީ މިދިޔަ ޖުލައި މަހުގެ 23 ވަަނަ ދުވަހު އެވެ. ބިން ހިއްކުމުގެ މަސައްކަތް އަމަލީގޮތުން އެރަށުގައި އިފްތިތާހުކޮށްދެއްވީ އިމާރާތްކުރުމާ ގެދޮރުވެރިކަމާ ބިނާރާ ބެހޭ ވަޒީރު ޑރ. އަބްދުﷲ މުއްތަލިބެވެ.

މި މަސައްކަތް ސަރުކާރުން ހަވާލުކޮށްފައިވަނީ މޯލްޑިވްސް ކޮންޓްރެކްޓިން ކޮމްޕެނީ ލިމިޓެޑް (އެމްޓީސީސީ) އާއި އެވެ. ޖުމުލަ ނުވަ ދުވަހުން 2،7 ހެކްޓަރުގެ ސަރަހައްދެއް އެމްޓީސީސީން ވަނީ ހިއްކާ ނިންމާލައިފަ އެވެ.

އެމްޓީސީސީން ހާމަކޮށްފައިވާ ގޮތުގައި މިހާރު މި މަސައްކަތުގެ ދަށުން މިހާރު ކުރިއަށްދަނީ ހިއްކި ސަރަހައްދު ހިމާޔަތްކުރުމުގެ މަސައްކަތް ކަމަށެވެ. އެގޮތުން އެ ސަރަހައްދު ހިމާޔަތްކުރުމަށް 443 މީޓަރުގެ ސަރަހައްދެއްގައި ޖިއޯބޭގް ޖެހުމުގެ މަސައްކަތް މިހާރު ކުރަމުން އަންނަ ކަމަށް އެމްޓީސީސީން ވަނީ ބުނެފަ އެވެ.

ސަރުކާރުން އެމްޓީސީސީއާއި މި މަސައްކަތް ހަވާލުކޮށްފައިވަނީ ޖުމުލަ 33.6 މިލިއަން ރުފިޔާ އަށެވެ. އަދި މި މަސައްކަތަކީ ހަތް މަސް ދުވަހުގެ ތެރޭގައި ނިންމާގޮތަށް ހަމަޖެހިފައިވާ މަސައްކަތެކެވެ.

ރައީސް ވެލިދޫއަށް ކުރެއްވި ދަތުރުފުޅުގައި، އެރަށުގައި އިތުރު ތިން މަޝްރޫއުއެއްގެ މަސައްކަތް ވަނީ ފަށައިފަ އެވެ. އެއީ އެރަށުގައި ގާއިމުކުރާ ފުލުހުންގެ މަރުކަޒުގެ މަސައްކަތާއި، އެރަށު ކޮމިއުނިޓީ ޑްރަގް ރިހެބިލިޓޭޝަން ސެންޓަރުގެ މަސައްކަތުގެ އިތުރުން، އެރަށުގައި ތަރައްގީކުރާ ހޮސްޕިޓަލްގެ މަސައްކަތެވެ.

މި އަހަރާއި ކުރިއަށް އޮތް 2026 ވަނަ އަހަރަކީ އުމްރާނީ ގިނަ މަޝްރޫއުތަކެއް ފެށިގެންދާނެ ދެއަހަރު ކަމަށް ރައީސް ވަނީ މީގެ ކުރިން ވިދާޅުވެފަ އެވެ.