އިސްރާއީލުގެ ޤަތުލުޢާއްމު ފެށި ފަހުން ޣައްޒާގައި 18500 އަށް ވުރެ ގިނަ ކުޑަކުދިން ޝަހީދުކޮށްލައިފި ކަމަށް ޣައްޒާގެ ހެލްތު މިނިސްޓްރީގެ ރެކޯޑްތަކުން ދައްކައިފިއެވެ.

މިނިސްޓްރީގެ ރެކޯޑްތަކުން ދައްކާ ގޮތުގައި ގިނަ ކުދިން ޝަހީދުކޮށްލާފައި ވަނީ އުމުރުގެ އެންމެ ކުރީކޮޅުގައެވެ.

ބައެއް ކުދިން ޝަހީދުކޮށްލީ އުފަންވިތާ ގަޑިއެއްހާއިރު ފަހުން އިސްރާއީލުން ބިން އަޅައިގެންނެވެ.

މިނިސްޓްރީން އާންމުކުރި ހިސާބުތަކުން ދައްކާ ގޮތުގައި އުފަންވި ދުވަހު މަރުވި ނުވަ ތުއްތު ކުދިންނާއި ފުރަތަމަ ދުވަހު މަރުވި ފަސް ތުއްތު ކުދިންނާއި ދެވަނަ ދުވަހު ފަސް ތުއްތު ކުދިންނާއި ތިން ވަނަ ދުވަހު އަށް ކުދިން ހިމެނެ އެވެ.

މީގެ އިތުރުން އެއްމަހުގެ 88 ކުދިންނާއި، ދެމަހުގެ 90، އަދި ތިން މަހުގެ 78 ކުދިން ވެސް ހިމެނެ އެވެ.

އިސްރާއީލު ސިފައިން ވަނީ 2023 ވަނަ އަހަރުގެ އޮކްޓޯބަރު މަހުގެ ހަތް ވަނަ ދުވަހުން ފެށިގެން ޣައްޒާއަށް ހަމަލާދީ ނަސްލު ނައްތާލުމަށް ހިންގި ޖަރީމާ ތަކުގައި ފަލަސްތީނުގެ 60،200 އަށް ވުރެ ގިނަ މީހުން ޝަހީދުކޮށްލާފައި ކަމަށް މަސްދަރުތަކުން ބުނެއެވެ. ޙަމާސް އިން ބުނާ ގޮތުގައި އެއްލައްކައަށް ވުރެ ގިނަ މީހުން ޝަހީދުކޮށްލާފައިވެއެވެ.

ހޯމަ ދުވަހު އިސްރާއީލުގެ ހައްގުތަކާ ބެހޭ ޖަމާއަތްތަކެއް ކަމަށްވާ ބީ’ޓްސެލެމް އާއި ފިޒިޝަންސް ފޯ ހިއުމަން ރައިޓްސް-އިސްރާއީލުން ވަނީ ފަލަސްތީނުގެ ނަސްލު ނިޒާމީ ގޮތެއްގައި ނައްތާލުމާއި އެ ސަރަހައްދުގެ ސިއްހީ ނިޒާމު ގަސްތުގައި ފުނޑުފުނޑު ކޮށްލާފައިވާ ކަމަށާއި އިސްރާއީލުން ޣައްޒާގައި ނަސްލު ނައްތާލާ ކަމަށް ތުހުމަތުކޮށްފައެވެ.

މިދިޔަ ނޮވެމްބަރު މަހު އިންޓަނޭޝަނަލް ކްރިމިނަލް ކޯޓުން ވަނީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި އޭނާގެ ކުރީގެ ޑިފެންސް މިނިސްޓަރު ޔޯއަވް ގަލަންޓް ހައްޔަރު ކުރުމުގެ އަމުރު ވެސް ނެރެފަ އެވެ.