ދުންފަތުގެ ބާވަތްތައް ރާއްޖެ އެތެރެކުރާއިރު ސިއްހަތުގެ އިންޒާރު ޕެކޭޖުގެ ބޭރުގައި ނުޖަހާނަމަ ފިޔަވަޅު އަޅާނެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން މިއަދު ނެރުނު ނޫސްބަޔާނެއްގައި ބުނީ ދުންފަތުގެ ބާވަތްތައް ޕެކޭޖުކޮށް ލޭބަލް ޖެހުމަށް ގާނޫނު ނަންބަރު 15/2020 "ދުންފަތް ކޮންޓްރޯލް ކުރުމާބެހޭ ގާނޫނު" އަދި އެ ގާނޫނުގެ ދަށުން އާއްމު ކޮށްފައިވާ "ދުންފަތް ކޮންޓްރޯލް ކުރުމާ ގުލޭ އާއްމު ގަވާއިދު" (ނަންބަރު R-21/2025) ގެ ފަސްވަނަ ބާބު ބަޔާންކުރާ ގޮތުގައި ރާއްޖެ އެތެރެކުރާ ދުންފަތުގެ ބާވަތްތަކާއި ރާއްޖޭގައި ވިއްކާ ދުންފަތުގެ ބާވަތްތައް ހިމެނޭ އުފެއްދުންތައް ހުންނަންވާނެ ވަކީ ގޮތްތަކެއް ކަނޑައަޅާފައިވާ ކަމަށެވެ.
ދުންފަތުގެ ބާވަތްތައް ޕެކޭޖުކޮށް ލޭބަލް ޖެހުމާ ގުޅޭގޮތުން ތައްޔާރުކޮށްފައިވާ "ޑިޒައިން އެންޑް ލޭއައުޓް ރިކުއަމަންޓްސް ފޯ ހެލްތު ވާނިންގް" ގެ ފުރަތަމަ އިސްލާހު 2025 ވަނަ އަހަރުގެ ޖުލައި މަހުގެ 29 ވަނަ ދުވަހު ގެޒެޓުކޮށްފައިވާކަން ވެސް އެޗްޕީއޭއިން ފާހަގަކޮށްފައިވެ އެވެ.
އެޗޕީއޭއިން ބުނީ އެ އުސޫލަށް އިތުރުކުރެވުނު ބައިތަކުގެ ތެރޭގައި ހީޓެޓް ޓޮބެކޯ ޕްރޮޑަކްޓްސް އާއި ނިކޮޓިން ޕައުޗު ހިމެނޭ ކަމަށެވެ. އަދި ދުންފަތުގެ އެއްވެސް ބާވަތެއް ރާއްޖެ އެތެރެ ކުރެވޭނީ ސިއްހަތުގެ އިންޒާރު ސީދާ ޕެކޭޖުގެ ބޭރަށް ޗާޕުކޮށްގެން ކަމަށް އެޗްޕީއޭއިން ބުންޏެވެ.
އެޗްޕީއޭއިން ބުނީ މިގޮތަށް އަމަލުކުރަން ފަށާނީ އަންނަ އަހަރުގެ ޖަނަވަރީ މަހުގެ 28 ވަނަ ދުވަހު ކަމަށެވެ.
އެ ތާރީހަށްފަހު، އުސޫލުގައިވާ ގޮތް ނޫން ގޮތަކަށް ޕެކެޓުކޮށް ލޭބަލްކޮށްފައިވާނަމަ ގާނޫނާއި ގަވާއިދުގެ މަތިން އަމަލު ކުރެވޭނެ ކަމަށް އެޗްޕީއޭއިން ވަނީ ބުނެފައެވެ.
ރާއްޖެއަކީ ދުންފަތުގެ އިސްތިއުމާލުކުރުމުގެ ނުރައްކަލުން ސަލާމަތްވެފައިވާ ގައުމަކަށް ހެދުމަށް ރައީސް ޑރ. މުހައްމަދު މުއިއްޒު ގެންދަވަނީ ހަރުދަނާ ފިޔަވަޅުތަކެއް އަޅުއްވަމުންނެވެ. އެގޮތުން ރާއްޖެއަށް ވޭޕްގެ ބާވަތްތައް އެތެރެކުރުމާއި، ވިއްކުމާއި ބޭނުންކުރުން ވެސް ވަނީ މަނާކޮށްފައެވެ. އަދި 2007 ވަނަ އަހަރުގެ ޖަނަވަރީ މަހުގެ 1 ވަނަ ދުވަހުން ފެށިގެން އުފަންވެފައިވާ އަދި އޭގެ ފަހުން އުފަންވާ ހުރިހާ ކުދިންނަށް ދުންފަތުގެ ބާވަތްތައް ގަތުމާއި، ވިއްކުމާއި، އިސްތިޢުމާލު ކުރުން މަނާ ކުރަން ނިންމާފައިވާއިރު، މި ނިންމުން ތަންފީޒުކުރަން ފަށާނީ އަންނަ ނޮވެންބަރު މަހުގެ އެކަކުން ފެށިގެންނެވެ.
ރާއްޖޭގައި ދުންފަތުގެ އިސްތިއުމާލުކުރުން މަދުކުރުމަށް ސަރުކާރުން ކުރިއަށްގެންދަވާ މަސައްކަތްތަކުގެ ތެރެއިން، ދުންފަތުގެ އިސްތިއުމާލުކުރުން އެއްކޮށް ހުއްޓާލާ ރަށްރަށުގެ އާބާދީގެ ކޮންމެ ރައްޔިތަކަށް ހާއްސަ އިނާޔަތެއް ދެއްވުމާއި ގުޅޭގޮތުން ދިރާސާއެއް ހެއްދެވުމަށްވެސް ރައީސް ވަނީ ވަޒީރުންނަށް އަންގަވާފަ އެވެ.
