ރާއްޖޭގެ ކުޅިވަރުގެ ކާމިޔާބީތައް އަރުޝީފުކުރުމުގެ މަސައްކަތަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވިސްނުންފުޅުގެ ދަށުން ކުރަންފެށި މަސައްކަތެއް ކަމަށް ކުޅިވަރާއި ހަށިހެޔޮކަމާއި ބެހޭ ވަޒީރު އަބުދުالله ރާފިއު މިއަދު ވިދާޅުވެއްޖެ އެވެ.
މި މަސައްކަތް ފެށިއިރު ގިނަ އުނދަގޫތަކަކާ ކުރިމަތިވި ކަމަށާއި، ކުޅިވަރާ ބެހޭ ވުޒާރާގައިވެސް މިފަދަ މައުލޫމާތުތަކެއް ފެންނަން ނެތުމަކީ ދިމާވި ބޮޑު ދައްޗެއް ކަމަށް ވަޒީރު ފާހަގަކުރެއްވި އެވެ. ރާއްޖެއަށް ކުޅިވަރުގައި ލިބިފައިވާ ކާމިޔާބީތަކާއި، މިފަދަ މައުލޫމާތު އެއްތަނަކުން ފެންނަން ނެތްކަމަށާއި، ހުރި ތަންތަނުގައިވެސް ހުރީ ވަރަށް މަދު މައުލޫމާތެއް ކަމަށް ކުޅިވަރު ވަޒީރު ވިދާޅުވި އެވެ.
މިހާރު މި މައުލޫމާތުތައް ހޯދަމުން ގެންދަނީ އެކި މީހުންގެ އަތުން ވަރަށް އުނދަގުލުން ކަމަށް ވީނަމަވެސް، މި މައުލޫމާތުތައް ފެންނަން ހުރުމަކީ ވަރަށް މުހިންމު ކަމެއް ކަމަށް ވަޒީރު ބަޔާންކުރެއްވި އެވެ.
"އަޅުގަނޑު ދަންނަވާނީ އަޅުގަނޑުމެންގެ ކުޅިވަރުގެ ދިގު ރާސްތާ ޕްލޭންގެ ދަށުން ކުޅިވަރުގެ ޖީލުތައް ބިނާ ކުރުމަށް ވަރަށް މުހިންމު ކަމެއް ކަމުގައި،" ވަޒީރު ވިދާޅުވި އެވެ.
ހާއްސަކޮށް ކުޅިވަރުގެ ވުޒާރާއިން މި މައުލޫމާތުތައް ފެންނަން ހުރުމަކީ ވަރަށް މުހިންމު ކަމެކެވެ. އެއީ މިހާރުގެ ޒުވާން އެތުލީޓުންނަށް ރާއްޖެއަށް ހިދުމަތްކޮށްފައި ތިބި އެތުލީޓުންގެ މައުލޫމާތާއި، އެ ކާމިޔާބީ ހޯދުނު ގޮތްތައް އިނގެންޖެހޭނެތީ އެވެ.
"މޮޅެތި އެތުލީޓުންނަށް އެ ކާމިޔާބީތައް ހޯދުނީ ކިހިނެތްތޯ. ކޮބާތޯ އެ ސަކްސަސް ފޯމިއުލާއަކީ. އަދި ހަމަ އެއާއެކު ކުޅިވަރަށް ހިދުމަތްކޮށްފައި ތިއްބެވި ބޭފުޅުން އެބޭފުޅުންގެ މަސައްކަތްތައްވެސް އެނގުމަކީ ވަރަށް މުހިންމުކަމެއް ކަމަށް އަޅުގަނޑު ދެކެން،" ވަޒީރު ވިދާޅުވި އެވެ.
ސަބަބަކީ ކުޅިވަރެއް ކުރިއަރައިގެން މި ދަނީ އެކި ރޮނގުރޮނގުން ވަރަށް ގިނަ ބަޔަކު މަސައްކަތްކޮށްގެން ކަމަށެވެ. އެތުލީޓުންނާއި، އެތުލީޓުންނަށް އެކި ގޮތްގޮތުން އެހީތެރިވެދޭން ތިބޭ މީހުންނާއި، ރާއްޖޭގައި މި ދާއިރާތަކުން މަސައްކަތްކޮށްފައި ތިބި މީހުން ކަންކަން ކޮށްފައި ހުރި ގޮތް އެނގެންޖެހޭ ކަމަށްވެސް ވަޒީރު ވިދާޅުވި އެވެ.
މުޅި އުމުރު ކުޅިވަރުގެ ދާއިރާއަށް ހިދުމަތްކުރުމުގައި ހޭދަކުރި މީހުންގެ އެ ޝައުގުވެރިކަން އަލުން ގެންނަންޖެހޭ ކަމަށާއި، ކަމެއް ކާމިޔާބުވަނީ އެކަމެއް ކުރާ ހިތުން ކުރީމަކަން ކުދިންނަށް އިނގެންޖެހޭ ކަމަށް ވަޒީރު ވަނީ ހާމަކުރައްވާފަ އެވެ.
