ސިވިލް ސާވަންޓުންގެ މުސާރަ ބޮޑުކުރުމަށްޓަކައި ކުރަންޖެހޭ މަޝްވަރާތައް ވަރަށް ހަލުވިކަމާއެކު ކުރިއަށްދާކަމަށް ސިވިލް ސާވިސް ކޮމިޝަނުގެ ރައީސް މުހައްމަދު ނާސިހު ވިދާޅުވެއްޖެ އެވެ. މިކަން ނާސިހު ހާމަކުރެއްވީ، ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާއިން އިސްނަގައިގެން "އަހަރު މެދު މުރާޖާ"ގެ ނަމުގައި ކުރިއަށްގެންދާ ބައްދަލުވުން ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.

މި ރަސްމިއްޔާތުގައި ވާހަކަދައްކަވަމުން ސިވިލް ސާވިސް ކޮމިޝަނުގެ ރައީސް މުހައްމަދު ނާސިހު ވިދާޅުވީ، މުވައްޒަފުން ކުރާ މަސައްކަތް ހަރުދަނާކުރުމުގައި އެކި ސެކްޝަންތަކުގެ ވެރިން، މުވައްޒަފުންގެ މަސައްކަތް މުރާޖާކުރުން މުހިންމު ކަމަށެވެ. އަދި ހަށިގަނޑަށް ލުއިވާނެ ގޮތަށް މަސައްކަތްތައް ވަކި ތާވަލަކަށް ބައްޓަންކުރުން މުހިންމުކަމަށްވެސް ނާސިހު ފާހަގަކުރެއްވި އެވެ.

ނާސިހު ވިދާޅުވީ، ސިވިލް ސާވަންޓުންގެ މުސާރަ ބޮޑުކުރުމަށްވެސް މިހާރު ގިނަ މަސައްކަތްތަކެއް ކުރައްވާ ކަމަށެވެ. އެ ގޮތުން ޕޭ ކޮމިޝަނާ ބައްދަލުކޮށް، ޕޭ ކޮމިޝަނުން އެކިއެކި ވުޒާރާތަކާ މިހާރު ބައްދަލުކުރަމުންދާކަމަށް އޭނާ ވިދާޅުވި އެވެ. މިއަހަރުގެ ތެރޭގައި ހުރިހާ ސިވިލް ސާވަންޓުންގެ މުސާރަ ބޮޑުވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާނުކުރައްވާފައިވާތީ، އެކަމުގެ މަޝްވަރާތައް ވަރަށް ފުޅާ ދާއިރާއެއްގައި ކުރެވެމުންދާކަމަށް ނާސިހު ވިދާޅުވި އެވެ.

"ސިވިލް ސާވަންޓުންގެ މުސާރަ ބޮޑުވަމުން އަންނައިރު، ޑިއުޓީ ގަޑީގައި މަސައްކަތްކުރުމަށް އިސްކަންދޭންޖެހޭ. ވީހާވެސް ގިނަ ވަގުތު އޮފީހުގައި ހޭދަކުރަންވާނެ. ޑިއުޓީ ގަޑީގައި މަސައްކަތް ނުކޮށް، އޯވަޓައިމް ހޯދުމަށް ގަޑީގެ ބޭރުން މަސައްކަތްކުރުމަކީ އެހައި ރަނގަޅުކަމެއް ނޫން." ނާސިހު މިކަމުގެ މުހިންމުކަން ފާހަގަކުރެއްވި އެވެ.

ޕޭހަމަނައިޒޭޝަން މަސައްކަތުގެ ތެރެއިން ސިވިލް ސާވިސްއާއި ކައުންސިލްތަކުގެ މުވައްޒަފުންގެ މުސާރަ މިއަހަރު ބޮޑުވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާނުކުރެއްވީ މިއަހަރުގެ ފެބްރުއަރީ މަހުގެ ހަ ވަނަ ދުވަހު އެވެ.

ސަރުކާރުން މިއަހަރުގެ ބަޖެޓު ހުށައެޅިއިރު، ޕޭ ހާމަނައިޒޭޝަންއަށް ނުވަތަ އެކި ދާއިރާތަކުން މުސާރަ އެއް ހަމަކުރުމަށް 500 މިލިޔަން ރުފިޔާ ވަނީ ހިމަނާފައެވެ. މިގޮތުން މުސާރަ ބޮޑުކުރެވޭ ދާއިރާތަކުގެ ތެރޭގައި ޖުޑީޝަރީއާއި ސިވިލް ސާވިސް ހިމެނޭނެކަމަށް ސަރުކާރުން ހާމަކުރެއްވިއެވެ.