ރާއްޖޭގައި މިވަގުތު ހުންނެވި ލަންކާގެ ކުރީގެ ރައީސް މަހިންދަ ރާޖަ ޕަކްސަގެ ދަރިކަލުން ނަމާލް ރާޖަޕަކްސާ ހައްޔަރު ކުރުމަށް ސްރީ ލަންކާގެ ކޯޓަކުން މިއަދު އަމުރު ނެރެފިއެވެ.
ހަމްބަންޓޯޓާ މެޖިސްޓްރޭޓް ކޯޓުން ކުރީގެ ޔޫތު މިނިސްޓަރު ނަމާލް ރާޖަޕަކްސާ ހައްޔަރު ކުރުމުގެ އަމުރު ނެރުނީ އޭނާ އާއި ދެކޮޅަށް އުފުލާފައިވާ މަނީ ލޯންޑަރިން އާއި ކޮރަޕްޝަންގެ ދައުވާ ތަކުގެ އަޑުއެހުން ތަކަށް ކޯޓަށް ހާޒިރު ވެފައި ނުވާތީއެވެ.
ލަންކާގެ ޚަބަރުތައް ބުނާ ގޮތުގައި އެ ކޯޓުން އެ އަމުރު ނެރުނީ ލަންކާގެ ޤާނޫނުގެ ދަށުން އެންޓި ކޮރަޕްޝަން ވޮޗްޑޮގްސް އާއި ފައިނޭންޝަލް ކްރައިމްސް އިންވެސްޓިގޭޝަން ޑިވިޝަން (އެފްސީއައިޑީ) ގެ ޕްރެޝަރާއި ގުޅިގެންނެވެ.
ޕްރޮފެޝަނުން ޤާނޫނީ ވަކީލް އަދި ކުރީގެ މަޖިލީހުގެ ކުރީގެ މެމްބަރުކަން ވެސް ކުރެއްބި ނަމާލް ރާޖަޕަކްސާގެ މައްޗަށް، އޭނާގެ ބައްޕަގެ ވެރިކަމުގައި ޒުވާނުންގެ ހަރަކާތުގެ ތެރެއިން 70 މިލިއަން ރުޕީސް ހޯދައިދިން މައްސަލަ އަކާއި، ނުޙައްޤު ފައިސާގެ މުޢާމަލާތްތަކާއި ރިޝްވަތު ދިނުމާއި އިންސާފު ޤާއިމް ކުރުމަށް ހުރަސް އެޅުމުގެ ތުހުމަތުތަކެއް ވެސް ވަނީ އުފުލާފަ އެވެ.
ނަމާލް ރާއްޖެ އައީ ސްރީލަންކަން އެއާލައިންސްގެ ފްލައިޓް ޔޫއެލް101 ގައި ކައިވެނި ޕާޓީ އަކަށް ކަމަށް ރައީސް އަނޫރާ ކުމާރާ ޑިސަނަނަޔަކެ ވެސް ވަޑައިގެންނެވި ފުލައިޓުންނެވެ.
ލަންކާގެ ނިމިދިޔަ ރިޔާސީ އިންތިޚާބުގައި ނަމާލް އާއި އަނޫރާ އެކަކު އަނެކަކާއި ދެކޮޅަށް ވާދަކުރި ނަމަވެސް، ނަމާލް ގެންދަވަނީ މިހާރުގެ ސަރުކާރުގެ އިސް ފަރާތްތައް ހިމެނޭ ގޮތަށް އެކި ޕާޓީތަކުގެ މެންބަރުންނާއި އެކު އެކުވެރި ގުޅުމެއް ބާއްވަމުން ކަމަށް ލަންކާގެ މީޑިއާ ބުނެއެވެ.
