ދައުލަތަށް ގިނަ ދުވަހު ހިދުމަތްތަކެއް ކޮށްދެއްވި ސޯބިރު އަވަހާރަވެއްޖެ އެވެ.
60 ވަނަ މިނިވަން ދުވަހުގެ ޖަލްސާގައި ނިޝާން އިއްޒުއްދީން އިއްޒަތުގެ ޝަރަފު ލިބިވަޑައިގެން ސޯބިރު އަވަހާރަވީ މިއަދު އެވެ.
ސޯބިރު އަވަހާރަވެފައިވަނީ ކެންސަރު ބައްޔަށް ފަރުވާ ކުރައްވަމުންދާތާ ގިނަ ދުވަސްތަކެއް ފަހުން ޓްރީޓޮޕް ހޮސްޕިޓަލުގަ އެވެ.
ސޯބިރު އަވަހާރަވުމުގެ ހިތާމައިގައި ދިވެހި ރާއްޖޭގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ އެކްސަގައި ޕޯސްޓެއްކޮށް ވިދާޅުވީދިވީ ރާއްްޖެއިން ޖަޕާނަށް ކަނޑައަޅާފައި ހުރި ސަފީރު ހަސަން ސޯބިރު ދެމިއޮތުމުގެ އާލަމަށް ދަތުރު ކުރެއވި އަޑު އެއްސެވީ ފުން ހިތާމައާއެކުކަމަށެވެ.
ސޯބިރަކީ ރާއްޖޭގެ އިގުތިސާދާ ބެހޭ ހުރިހާ ދާއިރާއެއްގައި ދިގު މުއްދަތެއް ވަންދެން ހިދުމަތް ކުރެއްވި ބޭފުޅެކެވެ. އެ ދާއިރާތަކުގެ ތެރޭގައި ޓޫރިޒަމާއި މަސްވެރިކަމާއި ދަނޑުވެރިކަން ހިމެނެ އެވެ. އަދި ރާއްޖޭގެ ތަރައްގީގެ މަޝްރޫއުތައް ރޭއްވެވުމާއި ހިންގެވުމުގައްޔާއި ހާރިޖީ ދާއިރާގައި އޭނާ ކުރައްވާފައިވާ އަގުހުރި ހިދުމަތްތަކާއި މިހާރު ވެސް އެ ދާއިރާގައި ކުރައްވަމުން ގެންދަވާ މަސައްކަތްތައް ފާހަގަކޮށްލެވެ އެވެ.
ސޯބިރު ދިވެހި ދައުލަތަށް ހިދުމަތް ކުރައްވަން ފެށްޓެވީ، ފެބްރުއަރީ 7, 1973 ގަ އެވެ. އޭނާގެ މަސައްކަތްތަކުގެ ތެރެއިން އެންމެ ފާހަގަކޮށްލެވޭ އެއް ކަމަކީ، ނޭޝަނަލް ޕްލޭނިން އޭޖެންސީގައި ކުރެއްވި މަސައްކަތެވެ. ނޭޝަނަލް ޕްލޭނިން އޭޖެންސީ އުވައިލައްވައި، 1982 ގައި މިނިސްޓްރީ އޮފް ޕްލޭނިން އެންޑް ޑިވެލޮޕްމަންޓް އުފެއްދެވުމާ ގުޅިގެން އެ މިނިސްޓްރީގެ ތަފާތު މަގާމުތައް ވެސް އޭނާ އަދާކުރެއްވި އެވެ.
