ޣައްޒާގައި ޙަރަކާތްތެރިވި ޔަހޫދީ ޒަޔަނިސްޓް ފައުޖުގެ އިސް ކޮމާންޑަރުން ހިމެނޭހެން 16 މީހަކަށް ހީޓްސްޓްރޯކް ޖެހިގެން ހޮސްޕިޓަލުގައި އެޑްމިޓްކޮށް ފަރުވާ ދެމުން އެބަ ދާކަމަށް އިސްރާއީލުގެ މީޑިއާ އިން ބުނެފި އެވެ.
ދާދި ދެންމެ އިޒްރޭލުގެ މީޑިއާ އިން ބުނީ ޣައްޒާގެ ދެކުނުގައި ހުކުރު ދުވަހު އިސްރާއީލުގެ 16 ސިފައިންނަށް ހީޓް ސްޓްރޯކް ޖެހިފައިވާ ކަމަށާއި އެ ސަރަހައްދުގައި އިންތިހާއަށް ހޫނު ގަދަ ކަމަށެވެ. އަދި ހީޓްސްޓްރޯކް ޖެހުނު އެންމެންނަކީ ވެސް ފިރިހެނުން ކަމަށާއި، އެކަކު ފިޔަވައި ދެން ތިބި 15 މީހުންގެ ޙަލު ސީރިއަސް ކަމަށެވެ.
ފާހަގަ ކޮށްލެވޭ ކަމަކީ، ހެނދުނު 10 އިން ފެށިގެން ރޭގަނޑު 8 ޖެހުމާއި ހަމަޔަށް ޣައްޒާގައި ހިންގާ ޤަތުލުޢާންމުގެ އޮޕަރޭޝަންތައް މެދުކަނޑައިލި ކަމަށް ރޭ އިޒްރޭލުން ބުނެފައިވާ ކަމެވެ. އިޒްރޭލު ސިފައިން ބުނީ އެގޮތަށް ނިންމީ ޣައްޒާ ރައްޔިތުންނަށް ކާނާގެ އެހީ ފޯރުކޮށް ދިނުމަށެވެ. ނަމަވެސް، ބެލެވޭ ގޮތުގައި އިޒްރޭލުން އެގޮތަށް ނިންމީ ދުވާލުގެ ވަގުތު ހޫނު ގަދަވުމުގެ ސަބަބުން އެމީހުންނަށް ޞިއްޙީ މައްސަލަތަކާއި ދިމާވާތީ އެވެ.
މިދުވަސްވަރު ރޭގަނޑު 8 ޖަހާ އިރު ވެސް ޣައްޒާގެ ހޫނުމިން އުޅެނީ 30 ޑިގްރީ ސެލްސިއަސްގަ އެވެ.
ހީޓްސްޓްރޯކް ޖެހުނު 16 ސިފައިން ފާއިތުވި 72 ގަޑިއިރުތެރޭގައި އުޅުނީ އެއްގަމުމަގުން ޣައްޒާގެ ރައްޔިތުންނަށް ޙަމަލާ ދިނުމަށާއި “ރޫޓީންގ ކޮންޓްރޯލް”ގަ އެވެ. ދުވާލު ވަގުތުތަކުގައި ޣައްޒާގެ ފިނިހޫނުމިން ގާތްގަނޑަކަށް 36 ޑިގްރީ ސެލްސިއަސް އަށް އަރައެވެ.
އިސްރާއީލް ޑިފެންސް ފޯސަސް (އައިޑީއެފް) އިން ވަނީ ހޫނުގަދަވުމުގެ ސަބަބުން ޖުލައި 29 އާ ހަމައަށް ހުރިހާ ތަމްރީނުތަކެއް ހުއްޓާލާނެ ކަމަށް ވެސް އިޢުލާން ކޮށްފަ އެވެ.
