ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާއި އެއްގޮތަށް ރައްޔިތުންގެ އަމިއްލަ ޖީބުން ހަރަދު ނުކޮށް އައިނު ލިބޭ ފިހާރަ މިއަދު ހުޅުވައިފިއެވެ.
އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ގާއިމުކުރި އައިނު ފިހާރަ މިއަދު ހުޅުވައިދެއްވީ ރައީސް އެވެ.
ރައްޔިތުންނަށް އަގުހެޔޮކޮށް ފެންވަރު ރަނގަޅު އައިނު ފޯރުކޮށްދިނުމަށްޓަކައި ސަރުކާރުން އައިނުގެ ވިޔަފާރިއަށް ވަންނަން ނިންމިކަން ރައީސް އިއުލާނު ކުރެއްވި މިދިޔަ މެއި މަހުގެ 31 ވަނަ ދުވަހު އެވެ.
Advertisement
ރައީސް އޭރު ވިދާޅުވީ، ބައެއް ވިޔަފާރިވެރިން ރައްޔިތުންގެ އަތުން ބޮޑެތި އަގުތައް ނަގަމުންދާތީ، އެކަން ހުއްޓުވުމަށްޓަކައި މާލެ ސިޓީ ގްރޫޕް އޮފް ހޮސްޕިޓަލްސްއިން އައިނުގެ ވިޔަފާރި ފަށާނެ ކަމަށެވެ. އެމަނިކުފާނު ވަނީ ޖޫން މަހުގެ އެކަކުން ފެށިގެން، އައިނަށް އާސަންދައިން ދޫކުރާ މިންވަރު 1000 ރުފިޔާއިން 2000 ރުފިޔާއަށް ވެސް ބޮޑުކޮށްދެއްވާފައެވެ.
މިއަދު ބޭއްވި ރަސްމިއްޔާތުގައި ވާހަކަދައްކަވަމުން މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް އަބްދުލްރައްޒާގް ހަލީމް ވިދާޅުވީ ދެ މަސް ދުވަހުގެ ތެރޭގައި އައިނު ފިހާރައިގެ މަސައްކަތް ނިންމާފައިވަނީ އެޑްވާންސް މެޝިނަރީތައް ގާއިމްކޮށްގެން ކަމަށެވެ. އެ މެޝިންތަކުގެ އެހީގައި ލޮލުގެ ޕްރެޝަރު ބެލޭނެގޮތާއި، ލޯކޮމާ އަވަހަށް ދެނެގަތުމުގެ ގާބިލުކަން ލިބިގެންވާކަމަށް އަބްދުލްރައްޒާގް ވިދާޅުވިއެވެ. އަދި އެތަނުން އައިނު ހެއްދުމަށް ނަންބަރު ނެގުމާއި، އައިނު ހެއްދުމުގެ ހިދުމަތް ލިބިގެންދާނެ ކަމަށް އަބްދުލްރައްޒާގް ވިދާޅުވިއެވެ.
އަބްދުލްރައްޒާގް ވިދާޅުވީ ހުޅުމާލޭގެ ރައްޔިތުންނަށް މި ހިދުމަތް ފަހިކޮށްދިނުމަށްޓަކައި އަންނަ އޮގަސްޓް މަހުގެ ތެރޭގައި ހުޅުމާލެ ހޮސްޕިޓަލުގައި މި ހިދުމަތް ގާއިމްކޮށް، ހިދުމަތްދޭން ފައްޓަވާނެ ކަމަށެވެ. އަދި މި ހިދުމަތް އަތޮޅުތެރޭގެ ރީޖަނަލް ހޮސްޕިޓަލުތަކުން ވެސް ކުރިއަށް އޮތް ދުވަސްތަކުގައި މި ހިދުމަތް ފޯރުކޮށްދިނުމަށް މަސައްކަތް ކުރައްވާނެ ކަމަށް އަބްދުލްރައްޒާގް ވިދާޅުވިއެވެ.
އާސަންދައިގެ ތެރެއިން 2,000 ރުފިޔާއާ ހަމައަށް ހިލޭ އައިނު ހެއްދުމުގެ ފުރުސަތު ދިވެހި ރައްޔިތުންނަށް މިއަދު ފަހިވެގެން ގޮސްފައިވާއިރު، ރައްޔިތުންގެ ސިއްހަތަށް އިސްކަންދެއްވާކަން ރައީސް އަންނަނީ ތަކުރާރުކުރައްވަމުންނެވެ. އަދި ވިޔަފާރިވެރިން ރައްޔިތުންނަށް ދެރަ ނިކަމެތިކަން ދިނުމުގެ އާދަ ނައްތާލުމަށް އެމަނިކުފާނު އަންނަނީ މަސައްކަތް ކުރައްވަމުންނެވެ.
މިހާރު އާންމުކޮށް ނަންބަރު އައިނެއް ހެދުމަށް 4,000 އާއި 6,000 ރުފިޔާއާ ދެމެދުގެ އަދަދެއް ހަރަދުކުރަން ޖެހެއެވެ. ސަރުކާރުން މިފަދަ ފިޔަވަޅުތައް އަޅަމުން އަންނަނީ މިފަދަ މަތީ އަގުތަކުން ރައްޔިތުންނަށް ލުޔެއް ހޯދައިދިނުމަށެވެ.
