ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލް އިފްތިތާހު ކުރުމަކީ ރާއްޖޭގެ ތަރައްގީއަށް ލިބުނު ފާހަގަކޮށްލެވޭ ކާމިޔާބީއެއް ކަަމަށާއި އެއާޕޯޓަކީ ރާއްޖޭގެ އިގްތިސާދީ މިނިވަންކަމުގެ އެންމެ މުހިންމު ތަނބުކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ވެލާނާ އިންޓަނޭޝަނަލް އެއާޕޯޓު ރަސްމީކޮށް ހުޅުވުމަށް މިރޭ ބޭއްވި ތާރީހީ ކުލަގަދަ ރަސްމިއްޔާތުގައި ވާހަކަދައްކަވަމުން ރައީސް ވިދާޅުވީ ވެލާނާ އެއާޕޯޓުގެ އާ ޕަސެންޖަރު ޓާމިނަލުގެ މަސައްކަތް އަވަސްކޮށް ރާއްޖޭގެ 60 ވަނަ މިނިވަން ދުވަހާ ގުޅުވައިގެން ހުޅުވުމަށް އެމަނިކުފާނު ނިންމެވީ ވަރަށް ހާއްސަ ސަބަބެއް އޮތުމުން ކަމަށެވެ. އެގޮތުން، ރާއްޖޭގެ މިނިވަންކަން ދެމެހެއްޓުމުގައި އިގްތިސާދީ މިނިވަންމަކީ މުހިންމު ކަމެއް ކަމަށާއި ރާއްޖޭގެ އިގުތިސާދީ މިނިވަންކަމުގެ އެންމެ މުހިންމު ތަނބަކީ ވެލާނާ އެއާޕޯޓުކަމަށް ވިދާޅުވި އެވެ. އަދި އެއާޕޯޓުގެ އެންމެ މުހިންމު ތަނބަކީ އަލަށް ހުޅުވުނު ޓާމިނަލް ކަމަށްވެސް ރައީސް ވިދާޅުވި އެވެ.
ރައީސް ވިދާޅުވީ މިރެއަކީ ވަރަށް ތާރީހީ ރެއެއް ކަމަށާއި ކާމިޔާބީއަކީ ވަރަށް ބުރަ މަސައްކަތުން ހާސިލްވި އެއްޗެއްކަމަށެވެ. މި ބޮޑު މަސައްކަތް ހަގީގަތަކަށް ހެދުމުގައި ބައިނަލްއަގުވާމީ ތަރައްގީގެ އެކުވެރިންގެ ފަރާތުން ލިބުނު އެހީތެރިކަން ވަރަށް މުހިންމު ކަމަށް ރައީސް ވިދާޅުވި އެވެ.
މި ޓާމިނަލް ބިނާކުރުމަށް މާލީ އެހީތެރިކަން ފޯރުކޮށްދެއްވި ސައުދީ ފަންޑް ފޯ ޑިވެލޮޕްމަންޓް، ކުވައިތު ފަންޑް، އަބޫދާބީ ފަންޑް ފޯ ޑިވެލޮޕްމަންޓް އަދި އޮޕެކް ފަންޑަށް ރައީސުލްޖުމްހޫރިއްޔާ ވަނީ ވަރަށް ބޮޑަށް ޝުކުރުއަދާކުރައްވާފަ އެވެ. މީގެ އިތުރުން، މި ފަންޑުތަކުގެ ގައުމުތަކުގެ ލީޑަރުންނަށް ވެސް ރައީސް ވަނީ ޝުކުރު ދަންނަވާފައެވެ. އެބޭފުޅުންގެ އެހީތެރިކަން ފޯރުކޮށްދެއްވީ ވަރަށް ލުއިގޮތްތަކަށް ލޯނުގެ ގޮތުގަ އެވެ.
ރައީސް ވިދާޅުވީ މި މަޝްރޫއަށް ދިވެހި ބަޖެޓުން ކުރި ހޭދައަށްވުރެ އިތުރަށް ބޭނުންވި ހުރިހާ އެހީތެރިކަމެއް ބޭރުގެ މި ހަތަރު ފަންޑުން ދެއްވި ކަމަށާއި 10 އަހަރު ދުވަސްވަންދެން ގިނަ ބަޔަކު ކުރެއްވި މިންނެތް މަސައްކަތުގެ ފޮނި ނަތީޖާ ފެނިގެންދާ ކަމަށެވެ.
މީގެ އިތުރުން ރައީސް އިތުރަށް ވިދާޅުވީ ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލަކީ އާ ފެށުމެއް ކަމަށާއި މިއާއެކު ރާއްޖެ އެތައް ހަރުފަތެއް ކުރިއަރައިގެންދާނެ ކަމަށެވެ. އަދި އާ ޓާމިނަލާއެކު ރާއްޖޭގެ އިގްތިސާދު ފުޅާކޮށް، ކުރިއަރައިގެންދާނެ ކަމަށާއި މިފަދަ ކަންކަމުގައި ދިވެހިން ގުޅިގެން މަސައްކަތްކޮށް ކޮންމެ ރައްޔިތަކުވެސް އަބަދުވެސް އިސްކުރަންވީ އަމިއްލަ މަސްލަހަތަށްވުރެ ގައުމުކަމަށް ރައީސުލްޖުމްހޫރިއްޔާ ވިދާޅުވިއެވެ.
ޓާމިނަލް ބޭނުން ކުރަން ފަށާއިރު ފުރަތަމަ ހިދުމަތް ދޭނީ ގައުމީ އެއާލައިނަށެވެ. ނަމަވެސް ސެޕްޓެމްބަރު މަހުގެ ނިޔަލަށް އޯރެޓް ޕްރޮސެސް ނިންމައި ވެލާނާ އެއާޕޯޓު ބޭނުންކުރާ ހުރިހާ އެއާލައިންތަކަށް ހިދުމަތްދޭން ފަށާނެ ކަމަށް އެމްއޭސީއެލް އިން ވަނީ ބުނެފަ އެވެ.
