ޣައްޒާގައި ހިންގާ ޤަތުލުޢާންމާއި ދެކޮޅަށް އުރުދުން (ޖޯޑަން)ގެ ވެރިރަށް އައްމާނުގައި އިއްޔެ ބޭއްވި މުޒާހަރާ އެޤައުމުގެ ފުލުހުންނާއި ސަލާމަތީ ބާރުތަކުން ނުކުމެ އަނިޔާވެރިކަމާއެކު ހުއްޓުވައި އިސްކޮށް އުޅުނު ބައެއް މީހުން ހައްޔަރުކޮށްފި އެވެ.
އުރުން އަކީ އެމެރިކާއާއި އިސްރާއީލުގެ ގާތް ޢަރަބި ޤައުމެކެވެ. އިސްރާއީލާއެކު ޞުލްޙައިގެ މުއާޙަދާއެއްގައި ސޮއިކުރި ޢަރަބި ދެވަނަ ޤައުމެވެ. އިސްރާއީލުގެ ޙިމާޔަތަށް ބުރޫ ނާރާނެ ގޮތަށް މަސައްކަތް ކުރުމާއި އެކު، އިސްރާއީލަށް އަމާޒުވާ ޙަމަލާތަކުން އިސްރާއީލު ދިފާޢު ކުރުމަށް މަސައްކަތް ކުރާނެތީވެ އެމެރިކާގެ ސަރުކާރުން އަހަރަކު 1.45 ބިލިއަން ޑޮލަރަށް ވުރެ ގިނައިން އުރުދުން އަށް ފައިސާ ދެއެވެ.
އުރުދުންގެ އަޒްރާޤުގައި އެމެރިކާގެ އެތައް ސަތޭކަ ސިފައިން ޤާއިމްވެގެން ވެސް ތިބެއެވެ. އަދި އެތަނުގައި “މުވައްފާޤު ސަލްޓީ އެއަރ ބޭސް” ގެ ނަމުގައި ވަރަށް ވަރުގަދަ މިލިޓަރީ ބޭހެއް އެމެރިކާއިން ހަދާފައި ވެއެވެ. ބޭނުމަކީ މެދުއިރުމަތީގައި އެމެރިކާގެ ބާރު ގަދަކުރުމެވެ.
އިސްރާއީލުން ޣައްޒާ ޙިޞާރުކޮށްގެން އުޅޭތީވެ އެކަމާއި ދެކޮޅަށް އުރުދުންގެ ރައްޔިތުން އިއްޔެ މުޒާހަރާކުރީ ޞުލްޙަވެރިކަމާއި އެކުގައި ކަމަށް މުޒާހަރާގެ ބައިވެރިންނާއި ޙަވާލާދީ ޚަބަރުތައް ބުނެއެވެ. މީގެ ކުރީގެ މުޒާހަރާތަކާއި އަޅަބަލާއިރު އިއްޔެގެ މުޒާހަރާގައި މީސްކޮޅު މަދުވި ނަމަވެސް އުރުދުން ފުލުހުން ޢަމަލުކޮށްފައި ވަނީ ވަރަށް ހަރުކަށިކަމާއެކުގައި ކަމަށް ނުރަސްމީ ޚަބަރުތައް ބުނެއެވެ.
އުރުދުން ސަރުކާރުގެ ޚަބަރުފަތުރާ ޗެނަލަކުން ބުނީ މުޒާހަރާ ރޫޅައިލީ ބައިނަލްއަޤްވާމީ ގޮތުން ޙިމާޔަތް ދޭންޖެހޭ އެމްބަސީތައް ކައިރިޔަށް މުޒާހަރާގެ ބައިވެރިން އެއްވުމުންނެވެ.
އުރުދުންގެ މީހަކު ސޯޝަލްމީޑިއާގައި އަޕްލޯޑުކުރި ވީޑިއޯ އިން ފެންނަ ގޮތުގައި އުރުދުންގެ ވެރިރަށް ޢައްމާނުގައި ހުންނަ އިސްރާއީލް އެމްބަސީ ހުންނަ ސަރަޙައްދަށް އެއްވި މީހުންގެ ގަޔަށް ކަރުނަގޭސް ޖަހައި މުގުރުން ތަޅައި އަނިޔާކޮށް ހައްޔަރުކުރިއެވެ. މީގެއިތުރުން ލައިވް ކަވަރޭޖް ހުއްޓުވުމަށްޓަކައި އެ ސަރަޙައްދުން އިންޓަނެޓްވެސް ކަނޑާލާފައިވާކަން ފާހަގަ ކުރެވެއެވެ.
މިދިޔަ މަސްތަކުގައި އުރުދުންގައި ފަލަސްތީނަށް ތާއީދުކުރާ އެތައް ސަތޭކަ ބަޔަކު ބަންދުކޮށްފައިވާއިރު އޭގެ ތެރޭގައި ސްކޫލްތަކުގެ ދަރިވަރުންނާއި ނޫސްވެރިންނާއި މަދަނީ ޖަމިއްޔާތަކުގެ މެމްބަރުން ހިމެނޭކަން ފާހަގަ ކުރެވެއެވެ.
