އިންޑިއާއިން ރާއްޖޭގެ ދިފާއީ ބާރަށް 72 ވެހިކަލް ހަދިޔާކޮށްފިއެވެ.
މި ވެހިކަލްތައް ހަދިޔާކުރައްވާފައިވަނީ އިންޑިއާގެ ބޮޑުވަޒީރު ނަރެންދްރަ މޯދީ ރާއްޖެއަށް ކުރައްވަމުން ގެންދަވާ ދަތުރުފުޅުގެ ތެރެއިން ދެ ގައުމުގެ ދެމެދު މުހިންމު ދާއިރާތަކުން އެއްބަސްވުން ބަދަލުކުރުމަށް މިއަދު ބޭއްވެވި ރަސްމިއްޔާތުގައެވެ.
އިންޑިއާއިން މިތަކެތި ހަވާލުކޮށްދެއްވީ ބޮޑުވަޒީރު ނަރެންދުރަ މޯދީއެވެ. އަދި މިތަކެތީގެ ރަމްޒީ ތަޅުދަނޑިއާ ހަވާލުވެވަޑައިގަތީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއެވެ.
އިންޑިއާއިން ހަދިޔާ ކުރި ވެހިކަލްތައް
- 27 ގޮނޑީގެ 8 ބަސް
- 10 ޕިކަޕް
- 10 ކުދި ވޭން
- 10 ވޭން
- 5 ލޮރީ
- 8 ޓްރެކްޓަރ
- 4 ޓިޕަރ ޑަމްޕް ޓްރަކް
- 4 ބެކްހޯ ލޯޑަރ
- 2 ކެރޭން
- 6 މިނީ އެކްސްކަވޭޓަރު
- 5 އެކްސްކަވޭޓަރު
އިންޑިއާއަކީ އެކި ދާއިރާތަކުން ރާއްޖެއަށް އަބަދުވެސް އެހީތައް ވަމުން އަންނަ ގައުމެކެވެ. އިގްތިސާދީ ތަރައްގީ، ދިފާއީ ދާއިރާ، ވިޔަފާރި އާއި ވުނަކުރުން، އަދި މޫސުމީ ބަދަލުތަކުގެ ދާއިރާއިން އެއް ގައުމު އަނެއް ގައުމަށް ދޭ އެއްބާރުލުން އިތުރުކުރެވިދާނޭ ގޮތްތަކާ މެދު ދެ ގައުމުގެ ދެމެދުގައި މިއަދު ވަނީ ރަސްމީ މަޝްވަރާތައްވެސް ކުރިއަށްގެންގޮސްފައެވެ.
ރައީސް ޑރ. މުއިއްޒުގެ ދައުވަތަކަށް އިންޑިއާގެ ބޮޑުވަޒީރު ނަރެންދްރަ މޯދީ ކުރައްވާ މި ދަތުރުފުޅަކީ އެމަނިކުފާނު ތިންވަނަ ދައުރަކަށް މަގާމާއި ހަވާލުވެވަޑައިގެންނެވުމަށްފަހު، ރާއްޖެއަށް ކުރައްވާ ފުރަތަމަ ދަތުރުފުޅެވެ.
މި ދަތުރުފުޅަކީ ރާއްޖޭގެ 60 ވަނަ މިނިވަންދުވަހާއި ދެ ގައުމުގެ މެދުގައި ސިޔާސީ ގުޅުން ގާއިމުކުރިތާ 60 އަހަރު ފުރޭ މުނާސަބާ ފާހަގަކުރެވޭ ތާރީހީ ދަތުރުފުޅެކެވެ.
