ފަތުރުވެރިކަމާއި ތިމާވެއްޓާ ބެހޭ ވުޒާރާއިން ކުރިއަށް ގެންދާ، ދިވެހިރާއްޖޭގައި ފަސް މިލިއަން ގަސް އިންދުމުގެ މަޝްރޫޢުގައި އިންޑިއާގެ ބޮޑުވަޒީރު ނަރެންދްރަ މޯދީ ބައިވެރިވެވަޑައިގެންފިއެވެ.
ފަތުރުވެރިކަމާއި ތިމާވެއްޓާ ބެހޭ ވަޒީރު ތޯރިގް އިބްރާހިމް ވިދާޅުވީ ފަސް މިލިއަން ގަސް އިންދުމުގެ މަޝްރޫއުގެ ދަށުން ބޮޑުވަޒީރު މޯދީ ގަހެއް އިންދެވުމަކީ ލިބޭ ވަރަށް ބޮޑު އުފަލެއް ކަމަށެވެ. އަދި މި މަޝްރޫއުގެ މަގުސަދަކީ، އެއްބައިވަންތަކަން އިތުރުކޮށް، ރާއްޖޭގެ ފެހިކަން އިތުރުކުރުން ކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ މި މަޝްރޫއަކީ މޯދީގެ އިސްނެންގެވުމުގެ ދަށުން ކުރިއަށްގެންދާ ”އޭކް ޕެޑް މާ ކޭ ނާމް“ އާވެސް ގުޅޭ މަޝްރޫއެއް ކަމަށެވެ.
މި ހަރަކާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެސް ބައިވެރިވެވަޑައިގެން ގަހެއް އިންދެވިއެވެ. އަދި އެންމެނަށް ފެހި އަދި ދެމެހެއްޓެނިވި މުސްތަގުބަލެއް ގާއިމްކޮށްދެއްވުމަށް އެކުގައި މަސައްކަތް ކުރައްވާނެކަމުގެ ޔަގީންކަން އެމަނިކުފާނު ދެއްވިއެވެ.
ފަސް މިލިއަން ގަސް އިންދުމުގެ މަޝްރޫއަކީ ރައީސްގެ އިންތިހާބީ ވައުދުފުޅުތަކުގެ ތެރެއިން 2023 ވަނަ އަހަރުގެ ޖޫން މަހުގެ ފަސްވަނަ ދުވަހު ފައްޓަވާފައިވާ މަޝްރޫއެކެވެ. މި މަޝްރޫއުގައި ރަށު އަދި އަތޮޅު ކައުންސިލްތަކާއި، އަމިއްލަ ކުންފުނިތަކާއި، އަދި މަދަނީ ޖަމްއިއްޔާތައް އަންނަނީ ބައިވެރިވަމުންނެވެ.
މި މަޝްރޫއަކީ ކޮޕް28 ގެ ބައިނަލްއަގުވާމީ މަހާސިންތާގައި ރައީސް އިއުލާނުކުރެއްވި މަޝްރޫއެކެވެ. މި މަޝްރޫއުގެ މައިގަނޑު މަގުސަދަކީ ރާއްޖޭގެ ތިމާވެށި ރައްކާތެރިކޮށް، ދެމެހެއްޓެނިވި ގޮތެއްގައި ގައުމު ތަރައްގީކުރުމެވެ.
