ސިންގަޕޫރުގެ ސެންޓްރަލް ނާކޮޓިކްސް ބިއުރޯގެ ސީނިއާ އޮފިސަރުންގެ ޓީމަކުން ދިވެހި ފުލުހުންނަށް ސެޝަންތަކެއް ނަގައިދީފި އެވެ.
ފުލުހުން މިއަދު ބުނީ އެ ޓީމަކީ މަސްތުވާތަކެތީގެ މައްސަލަތަކުގެ އޮޕަރޭޝަންސް އަދި އިންވެސްޓިގޭޝަން ދާއިރާގެ ތަޖުރިބާހުރި ޓީމެއް ކަމަށެވެ.
މި މަހު 21 އިން 24 އަށް ކުރިއަށް ގެންދިޔަ އެ ސެޝަންތަކުގައި، ކޮންޓްރޯލް ޑެލިވަރީ އޮޕަރޭޝަންތަކާ ގުޅޭ މައުލޫމާތު ހިއްސާކޮށްފައިވާ ކަމަށާއި މަސްތުވާތަކެއްޗާ ބެހޭ މައްސަލަތަކުގެ ފައިސާއާ ގުޅުންހުރި މައްސަތައް ތަހުގީގުކުރާނެ ގޮތުގެ މުހިންމު މައުލޫމާތުތަކެއް ވެސް ހިއްސާކޮށްފައިވާ ކަމަށް ފުލުހުން ބުންޏެވެ.
Advertisement
އެ ސެޝަންތަކުގެ ތެރެއިން ކޮންޓްރޯލް ޑެލިވަރީ ސެޝަންގައި, ފުލުހުންގެ ޑްރަގް އެންފޯސްމަންޓުގެ އޮޕަރޭޝަންސްގެ މުވައްޒަފުންގެ އިތުރުން ގޭންގު ކްރައިމް އެންފޯސްމަންޓުގެ މުވައްޒަފުންނާއި ކައުންޓާ ނާކޮޓިކްސް އިންޓެލިޖެންސްގެ މުވައްޒަފުން ބައިވެރިވި ކަމަށް ފުލުހުން ބުންޏެވެ.
ފުލުހުން ބުނީ ފައިނޭންޝިއަލް އިންވެސްޓިގޭޝަން ސެޝަންގައި, ޑްރަގް އެންފޯސްމަންޓުގެ އިންވެސްޓިގޭޝަން މުވައްޒަފުންނާއި އެނަލިސްޓުންގެ އިތުރުން އިކޮނޮމިކް ކްރައިމްސް އާއި ގޭންގް ކްރައިމް އެންފޯސްމަންޓް އަދި ކައުންޓާ ނާކޮޓިކްސް އިންޓެލިޖެންސްގެ އިންވެސްޓިގޭޝަން އޮފިސަރުންނާއި އެނަލިސްޓުން ބައިވެރިވި ކަމަށެވެ.
ސިންގަޕޫރުގެ ސެންޓްރަލް ނާކޮޓިކްސް ބިއުރޯގެ ސީނިއާ އޮފިސަރުންގެ ޓީމުން، ފުލުހުންގެ ކަމާ ގުޅުންހުރި ބަހާތަކާއެކު މަޝްވަރާ ބައްދަލުވުމެއް ބާއްވާފައިވާ ކަމަށް ވެސް ފުލުހުން ބުންޏެވެ.
ޝަހީދު އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގައި މިދިޔަ ހޯމަ ދުވަހު ބޭއްވި އެ ބައްދަލުވުމުގައި ސެންޓްރަލް އިންވެސްޓިގޭޝަން ކޮމާންޑް ހެޑް އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފާއި ޑްރަގް އެންފޯސްމަންޓުގެ ސީނިއާ މެނޭޖްމަންޓް އަދި ކައުންޓާ ނާކޮޓިކްސް އިންޓެލިޖެންސްގެ ވެރިން ބައިވެރިވެވަޑައިގެންނެވި އެވެ.
ފުުލުހުން ބުނީ އެ ބައްދަލުވުމުގައި، މަސްތުވާތަކެއްޗާ ގުޅޭ މައްސަލަތަކުގައި ފުލުހުންނާއި ޑްރަގް އެންފޯސްމަންޓް އަދި ސެންޓްރަލް ނާކޮޓިކްސް ބިއުރޯ ގުޅިގެން ކުރެވިދާނެ މަސައްކަތްތަކާއި އެ މަސައްކަތުގައި ދެ ފަރާތުން ފޯރުކޮށްދެވޭނެ އެހީތެރިކަމާ ގުޅޭ ގޮތުން މަޝްވަރާކުރެއްވި ކަމަށެވެ. އަދި މަސްތުވާތަކެއްޗާ ގުޅޭ މައްސަލަތަކުގެ އޮޕަރޭޝަނަލް އަދި އިންވެސްޓިގޭޝަންއާ ގުޅޭ ތައުލީމާއި ތަމްރީނުގެ ފުރުސަތުތަކާ ގުޅޭ ގޮތުން ވެސް މަޝްވަރާކުރެއްވި ކަމަށް ފުލުހުން ބުންޏެވެ.
