މި އަހަރުގެ ފުރަތަމަ ހަ މަސް ތެރޭގައި އިއްދައިގެ ހަރަދާއި އަނބިދަރިންގެ ހަރަދަށް 44 މިލިއަން ރުފިޔާ ސާބިތުކޮށްދީފައިވާ ކަމަށް ފެމިލީކޯޓުން ހާމަކޮށްފި އެވެ.

ފެމެލީ ކޯޓުން އިއްޔެ ހާމަ ކުރި މި އަހަރުގެ ތަފާސްހިސާބުތަކުން ދައްކާގޮތުން، ކޯޓުގެ ގަޒިއްޔާތަކާއި ގުޅިގެން 24 މިލިއަން ރުފިޔާ ބަލައިގަނެ، މިދިޔަ އަހަރު ބަލައިގެން ފައިސާ ހިމެނޭގޮތަށް 25 މިލިއަން ރުފިޔާ ރައްދުކޮށްދެވުނު ކަމަށް ވަނީ ފާހަގަ ކޮށްފަ އެވެ.

މި މުއްދަތު ތެރޭގައި 1،226 ކައިވެނި ކޮށްދެވިފައިވާއިރު، 588 ވަރިވެސް ކޮށްދެވިފައިވާކަމަށް އެ ތަފާސްހިސާބުތަކުން ދައްކައެވެ. އަދި އޭގެ އިތުރުން 19 ދިވެހި ބިދޭސީ ކައިވެނި ވެސް ކޮށްދީފައިވާކަމަށް ތަފާސްހިސާބުތަކުން ދައްކަ އެވެ. މީގެ އިތުރުން ރާއްޖެއިން ބޭރުގައި ކޮށްފައިވާ 113 ކައިވެނި ވެސް ވަނީ ރަޖިސްޓްރީ ކޮއްދީފަ އެވެ.

އަދި ކައިވެންޏަށް ހޭލުންތެރިކުރުމުގެ ޕްރޮގްރާމުގައި 1،580 މީހުން ބައިވެރިވެފައިވާއިރު، އޭގެ ތެރޭގައި 815 ފިރިހެނުން އަދި 765 އަންހެނުން ހިމެނެ އެވެ.

މި އަހަރުގެ ފުރަތަމަ ހަ މަސް ތެރޭގައި ފެމިލީ ކޯޓަށް 1،024 މައްސަލަ ހުށަހެޅިފައިވެ އެވެ. އޭގެ ތެރެއިން 1،009 މައްސަލަ ނިންމައިފައިވާއިރު އާއިލީ މައްސަލަތަށް ހައްލުކުރުމާއި ބެހޭ ބަޔަށް 80 މައްސަލަ ހުށަހެޅުނެވެ. އަދި 69 މައްސަލައަށް ސުލްހަވެރި ހައްލެއް ހޯދައިދެވުނުކަމަށްވެސް އެ ތަފާސްހިސާބުތަކުން ހާމަވެ އެވެ.

އަދި ގެވެށި އަނިޔާއިން ރައްކާތެރި ކުރުމާއި ކުޑަކުދިންގެ ހައްގުތަކާއި ގުޅޭ އަމުރުތަށް ހިމެނޭގޮތުން ޖުމްލަ 55 އަމުރު ނެރެވުނުކަމަށް ފެމިލީ ކޯޓުން ވަނީ ހާމަކޮށްފަ އެވެ. ކޯޓަށް ހާޒިރުވުމަށް އަންގާ 5،767 އަމުރު ފޮނުވިފައިވާނެކަމަށްވެސް ވަނީ ހާމަކޮށްފަ އެވެ.

ފެމިލީ ކޯޓުން މިދިޔަ ހަފްތާގައި ދަރިންގެ ހަރަދަށް ފައިސާ ނުދައްކާ މީހުންނާއި މެދު އަޅާ ފިޔަވަޅެެއްގެ ގޮތުގައި، އެ މީހުންގެ ފޮޓޯ ހާމަކުރަންވެސް ވަނީ ފަށައިފަ އެވެ.

މިދިޔަ އަހަރުވެސް ފެމެލީ ކޯޓުން ވަނީ 97 މިލިއަނަށްވުރެ ގިނަ ރުފިޔާއަށް ސާބިތުކޮށްދީފައި އެވެ.