ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ދަރިކަލުން އުމައިރު މުހައްމަދު މުއިއްޒާއި ގުޅުވައި ދޮގު ވާހަކަތައް ދައްކައި، އޭނާގެ ކަރާމާތާއި ރައްކާތެރިކަން ނަގާލި މައްސަލައިގައި، އެ ވާހަކަތަކުގެ ފުރިހަމަ ޒިންމާ އެމްޑީޕީގެ ޗެއާޕާސަން ފައްޔާޒް އިސްމާއީލް ނަންގަވަން ޖެހޭނެ ކަމަށް ފެމިލީ ކޯޓުން މިއަދު ހުކުމްކޮށްފި އެވެ. މި މައްސަލަ ކޯޓަށް ހުށަހަޅާފައިވަނީ ރައީސްގެ އަނބިކަނބަލުން ފަސްޓް ލޭޑީ ސާޖިދާ މުހައްމަދުގެ ފަރާތުންނެވެ.
މި މައްސަލަ ފެންމަތިވެފައިވަނީ މިދިޔަ މާޗް މަހުގެ ތެރޭގައި އެމްޑީޕީން މާލޭގައި ބޭއްވި ސިލްސިލާ މުޒާހަރާތަކެއްގެ ތެރޭގައި އެ ޕާޓީގެ އެކްޓިވިސްޓުން ކަމަށްވާ މަރިޔަމް ޒުބައިރު (މަންދި) އާއި އަހްމަދު ސަލީމް (މާޒް ސަލީމް) އުމައިރަށް ނިސްބަތްކޮށް ހަގީގަތާ ހިލާފު ވާހަކަތައް ދެއްކުމާ ގުޅިގެންނެވެ. ޒުވާނުން "ބިޑި އޮޅަން" ޖެއްސީ ރައީސްގެ ދަރިކަލުން ވޭޕް ބޯން ފެށުމުން ކަމަށް ބުނެ މަންދީ ވަނީ ރައީސްގެ ދަރިކަރުން ކަރާމާތް ނަގާލާ ވާހަކަތައް ދައްކާފަ އެވެ.
ފެމިލީ ކޯޓުން މިއަދު އިއްވި ހުކުމުގައި ވަނީ މި ވާހަކަތަކުގެ ސަބަބުން އުމައިރުގެ ނަފްސަށާއި ފުރާނައަށް ނުރައްކާވެދާނެ ހާލަތަކަށް މަގުފަހިވެ، އޭނާގެ ކިޔެވުމާއި މުސްތަގުބަލަށް ބޮޑެތި ގެއްލުންތަކެއް ކުރިމަތިވެދާނެ ކަމަށެވެ. މީގެ ކުރިން މި މައްސަލަ ސިވިލް ކޯޓުން ބެލިއިރު، ސިވިލް ކޯޓުން ވެސް ވަނީ މަންދީގެ ވާހަކަތަކުގެ ސަބަބުން ރައީސްގެ ދަރިކަލުންގެ އަބުރަށް ހުތުރު އަރާފައިވާ ކަމަށް ކަނޑައަޅާފަ އެވެ.
މިއަދު އޮތް އަޑުއެހުމުގައި ފެމިލީ ކޯޓުގައި ވަކިވަކިން ހުށަހަޅާފައި އޮތް ދެ މައްސަލަ އަށް ވެސް ހުކުމް ކޮށްފައި ވެއެވެ. އުމައިރުގެ އާއިލާގެ ފަރާތުން މި މައްސަލައިގައި ވަކާލާތު ކުރާ ކުރީގެ ބަންޑާރަ ނައިބު އައިޝަތު އާޒިމާ ޝަކޫރްގެ ރެހެންދި ޗެމްބާސް އިން ނެރުނު ބަޔާނެއްގައި ބުނެފައިވަނީ މަންދީ އާއި ސަލީމް ދެއްކި ވާހަކަތައް އުމައިރަށް ނިސްބަތްވާކަން ސާބިތުވާ ކަމަށާއި، އެ ވާހަކަތަކުން އުމައިރުގެ ރައްކާތެރިކަމާއި ކަރާމާތަށް ގެއްލުންދީފައިވާ ކަމަށެވެ.
އަދި މަންދީ އާއި ސަލީމް ދެއްކި ވާހަކަތަކަށް އެމްޑީޕީ އަދި ޗެއާޕާސަން ފައްޔާޒް އިސްމާއީލް ޒިންމާވާން ޖެހޭނެ ކަމަށާއި، އެ ދެ މީހުންގެ ވާހަކަތައް ހުއްޓުވުމުގެ ބަދަލުގައި ފައްޔާޒް އެކަންކަމަށް ހިތްވަރުދީފައިވާ ކަމަށް އެ ބަޔާނުގައިވެ އެވެ. މި ހުކުމުގެ ދަށުން މަންދީ އާއި ފައްޔާޒްގެ ފަރާތުން ގެއްލުމުގެ ބަދަލު ހޯދުމުގެ ހައްގު އުމައިރަށް ލިބިގެންވާ ކަމަށް ކަނޑައަޅާފައިވީ ނަމަވެސް، ރައީސް އާއި ފަސްޓް ލޭޑީ ބަދަލު ހޯދުމަށް މަސައްކަތްޕުޅު ނުކުރައްވާނެ ކަމަށް ވެސް ވަނީ ބަޔާނުގައި ބުނެފައިވެ އެވެ. އަދި ސިވިލް ކޯޓުން ކުރި ހުކުމުގައި ވެސް ބަދަލު ހޯދުމަށް މަސައްކަތް ކުރައްވާފައި ނުވާ ކަމަށް އެ ބަޔާނުގައި ވަނީ ފާހަގަކޮށްފައިވެ އެވެ.
"އެހެނީ މިއީ އެއްވެސް ހާލެއްގައި ގެއްލުމުގެ ބަދަލު ހޯދުމަށް ކުރެއްވި ދައުވާއެއް ކަމުގައި ނުވެފައި، އެއާ ހިލާފަށް ދަރިކަލުންގެ ރައްކާތެރިކަން ގެއްލިގެންދާ ހިސާބަށް ދިއުމުން ކުރެއްވި ދައުވާއެއް ކަމުގައިވާ ކަމެވެ. އަދި ސިޔާސީ ހަނގާކުރުމާއި ހަމަލާތަކުން ކުޑަކުދިން ރައްކާތެރިކުރެއްވުމަށް ކުރެއްވި ދައުވާއެއް ކަމުގައި ދަންނަވެމެވެ،" ރެހެންދި ޗެމްބާސްގެ ބަޔާނުގައި ބުނެފައިވެ އެވެ.
ކުޑަކުދިންގެ ކަރާމާތަށް ގެއްލުން ލިބޭ މައްސަލަތަކުގައި ޖޫރިމަނާ ކުރުމާއި ފިޔަވަޅު އެޅުމުގެ ބާރު ކަމާ ބެހޭ މިނިސްޓްރީއަށް ލިބިގެންވާ ކަމުގައި ހުކުމްގައިވާ ކަމަށް އެ ބަޔާނުގައި ލިޔެފައިވެ ވެއެވެ.
