ރަޝިޔާ އާއި ޔުކްރެއިނާއި ދެމެދު ސުލްހައިގެ އާ މަޝްވަރާތަކެއް މާދަމާ ތުރުކީގައި ބޭއްވުމަށް ހަމަޖެހިފައިވާ ކަމަށް ޔުކްރެއިންގެ ރައީސް ވޮލޮޑިމިއަރ ޒެލެންސްކީ ވިދާޅުވެއްޖެއެވެ.
ބުދަ ދުވަހު އޮންނަ ބައްދަލުވުމުގެ ކުރިން ރައީސް ޒެލެންސްކީ ހާމަކުރެއްވި ގޮތުގައި، އަސީރުން ބަދަލުކުރުމާއި ބެހޭ ގޮތުން، އެ ގައުމުގެ ގައުމީ ސަލާމަތީ އަދި ދިފާއީ ކައުންސިލްގެ ސެކްރެޓަރީ ރަސްޓެމް އުމެރޮވްއާ އެކު ވަނީ މަޝްވަރާ ކުރައްވާފައެވެ.
ރަޝިއާގެ ދައުލަތުގެ ނިއުސް އެޖެންސީ އާރް.އައި.އޭ. ރިޕޯޓްކޮށްފައިވާ ގޮތުގައި، މި މަޝްވަރާތައް ބޭއްވުމަށް ހަމަޖެހިފައި ވަނީ ޖުލައި މަހުގެ 24 ވަނަ ދުވަހާއި 25 ވަނަ ދުވަހު ކަމަށް ބައެއް މަސްދަރުތަކުން ވަނީ ބުނެފައެވެ.
Advertisement
ޔުކްރެއިން މިފަދަ މަޝްވަރާތަކުގެ ތިންވަނަ ބުރަކަށް ތައްޔާރުވަމުން ދާއިރު، ޒެލެންސްކީ ވަނީ އިސްކަންދޭ ބައެއް ކަންކަން ހާމަކުރައްވާފައެވެ. މި ކަންކަމުގެ ތެރޭގައި ރަޝިޔާއާ ދެކޮޅަށް ހިންގާ ބައިނަލްއަޤްވާމީ ދަތިކުރުމުގެ ފިޔަވަޅުތައް އިތުރުކުރުމާއި، އިތުރު ވައިގެ ދިފާއީ ނިޒާމްތައް ހޯދުމާއި، ޑްރޯންގެ ސަޕްލައި އިތުރުކޮށް އެފަދަ ކަންކަމަށް ފައިނޭންސް ހޯދުން ހިމެނެއެވެ. ޒެލެންސްކީ ވިދާޅުވީ ޔުކްރެއިން އަށް މިހާތަނަށް ދުވަހަކުވެސް ނުލިބޭ ފަދަ ބައިނަލްއަޤްވާމީ އެހީތެރިކަމެއް ލިބިފައިވާ ކަމަށާއި، ނަމަވެސް އާ މޮޑެލްތަކެއް ބޭނުންވާ ކަމަށެވެ.
"މިހާރު އިސްކަންދެނީ ޑްރޯންތަކަށް، ހުރިހާ ބާވަތެއްގެ ޑްރޯންތަކަށް،" ޒެލެންސްކީ ވިދާޅުވިއެވެ.
ފްރީޒްކޮށްފައި ހުރި ރަޝިއާގެ ފައިސާ އަށް އިޝާރާތް ކުރައްވަމުން ޒެލެންސްކީ ވިދާޅުވީ، އެ ފައިސާ ޔުކްރެއިންގެ ދިފާއީ ކަންކަމަށް ބޭނުންކުރުމަށް އިސްކަން ދިނުމަށް ގޮވާލައްވާ ކަމަށެވެ.
ޒެލެންސްކީ އިތުރަށް ވިދާޅުވީ، ނޭޓޯ އާއި ޔޫރަޕިއަން ޔޫނިއަންއިން ބޭރުންވެސް ޔުކްރެއިންގެ ގުޅުންތައް ވަރަށް ވަރުގަދަ ކަމަށެވެ. މިގޮތުން ޔުކްރެއިން-އުތުރު ޔޫރަޕް، ޔުކްރެއިން-ދެކުނު އިރުމަތީ ޔޫރަޕް އަދި ކްރައިމިއަން ޕްލެޓްފޯމް ފަދަ ގުޅުންތައް ފާހަގަ ކުރައްވައި، ތުރުކީއާ އޮތް ޚާއްސަ ގުޅުމުގެ މުހިންމުކަންވެސް ފާހަގަ ކުރެއްވިއެވެ.
