ނޭޓޯ ބޯޑަރު ބުޑަށް ރަޝިޔާއިން ހަމަލާ ދީފި

ރަޝިޔާއިން ޔޫކްރެއިންގެ ހުޅަނގު ބޯޑަރު ކައިރިއަށް ދިން ވަރުގަދަ ޑްރޯން ޙަމަލާއެއް، ނޭޓޯ ގެ މެންބަރު ޤައުމެއް ކަމަށްވާ ޕޮލެންޑް ބޯޑަރު ކައިރިއަށް އަރައިފިއެވެ. މި ޙަމަލާ އަމާޒުވެފައިވަނީ ޔޫކްރެއިނާއި ޕޮލެންޑް ގުޅުވައިދޭ އެންމެ މުހިންމު އެއް ބޯޑަރު ކްރޮސިން ކަމުގައިވާ ޔަހޮދިން-ޑޮރޮހުސްކް ސަރަޙައްދަށެވެ. 

މި ޙަމަލާގެ ސަބަބުން އެ ސަރަޙައްދުގެ ދަތުރުފަތުރުގެ ޚިދުމަތްތައް ހުއްޓި، ބޯޑަރުގެ އޮޕަރޭޝަންތައް (ވަގުތީ ގޮތުން) މެދުކަނޑާލައިފިއެވެ.

މި ޙަމަލާގައި ޔަހޮދިންގައި ހުރި ތެޔޮ ސްޓޭޝަނެއްގައި ރޯވެ، އެ ސަރަޙައްދުގައި ޕާކުކޮށްފައި ހުރި ގިނަ އަދަދެއްގެ މުދާ އުފުލާ ލޮރީތަކަކަށް ބޮޑެތި ގެއްލުންތަކެއް ވެފައިވެއެވެ. މީގެ އިތުރުން ޕޮލެންޑްގެ ވޯސޯއަށް ދަތުރުކުރަން ތައްޔާރުވެފައި އޮތް ފަސިންޖަރުން އުފުލާ ރޭލަކަށްވެސް މި ޙަމަލާގައި ގެއްލުން ލިބުނެވެ.

ރަޝިޔާގެ ދިފާއީ ވުޒާރާއިން ބުނީ މި ޙަމަލާ އަމާޒުކުރީ ވިލާތުގެ ޤައުމުތަކުން ޔޫކްރެއިނަށް ފޮނުވާ އަސްކަރީ މުދާ ރައްކާކުރާ ތަންތަނަށް ކަމަށެވެ.

ނޭޓޯގެ ގަވާއިދު ބުނާ ގޮތުން މެންބަރު ގައުމަކަށް ހަމަލާ ދީފިނަމަ އެ ގައުމެއްގެ ދިފާއުގައި ނޭޓޯ ނުކުންނާނެއެވެ.