މާލޭގެ މީހެއްގެ އަތުން ފައިސާ ފޭރުނު ބަޔަކު ހައްޔަރުކުރަން އުޅުމުން ފުލުހުންނަށް ހަމަލާދީ މާރާމާރި ހިންގައިފި އެވެ. 

ފުލުހުން މިއަދު ބުނީ ހެންވޭރު ލޮނުޒިޔާރަތް މަގުގައި މީހަކަށް ތޫނު އެއްޗަކުން ބިރުދައްކައި، ތަނަކަށް ވައްދައި އޭނާގެ އެކައުންޓުގައު ހުރި ފައިސާ (200ރ.) ޓްރާންސްފާކުރުވި މައްސަލައެއް ރޭ 11:57 ހާއިރު ރިޕޯޓްކޮށްފައިވާ ކަމަށެވެ.

އެ ރިޕޯޓާ ގުޅިގެން ފުލުހުން އެތަނަށް އެޓެންޑުވި އިރު، ފޭރުނު ކަމަށް ތުހުމަތުކުރެވޭ މީހުން އެ ސަރަހައްދުގެ ގެއެއްގައި ތިބިކަމުގެ މައުލޫމާތު ލިބުމާ ގުޅިގެން އެ ގެއަށް ފުލުހުން ވަންނަން އުޅުމުން ފުލުހުންނާއި ކުރިމަތިލައި މާރާމާރި ހިންގާފައިވާ ކަމަށް ފުލުހުން ބުންޏެވެ.

ފުލުހުން ބުނީ ފުލުހުންނަށް ހަމަލާދީ، މާރާމާރި ހިންގައި ފުލުހުންގެ ދައުރު އަދާކުރުމަށް އެމީހުން ހުރަސްއެޅުމުން ބާރުގެ ބޭނުންކޮށްގެން ދެ މީހަކު ހައްޔަރުކޮށްފައިވާ ކަމަށެވެ.

އެ ދެ މީހުން ހައްޔަރުކުރީ ފޭރުމުގެ ތުހުމަތާއި ފުލުހުންގެ ދައުރު އަދާކުރުމަށް ހުރަސްއެޅިކަމުގެ ތުހުމަތުގައި ކަމަށް ފުލުހުން ބުންޏެވެ.

އެ މައްސަލައާ ގުޅިގެން ހައްޔަރުކޮށްފައި ވަނީ ނ. ވެލިދޫ، ފަރީސާ މަންޒިލް، ހަސަން ލުޖެއިން މުހައްމަދު، 23 އާއި މާލެ، ހ. ކަނޑުފިނިގެ، މުހައްމަދު ޝަފީއު، 55 އެވެ.

ފުލުހުން ބުނީ ހައްޔަރުކުރަން އުޅުމުގެ ތެރޭގައި އެ ދެމީހުންނާއި ފުލުހުންގެ އޮފިސަރަކަށް ވެސް އަނިޔާވެފައިވާ ކަމަށެވެ. އަނިޔާވި އެންމެނަށް ފަރުވާދީފައިވާ ކަމަށް ވެސް ފުލުހުން ބުންޏެވެ.

މި މައްސަލައާ ގުޅިގެން ހައްޔަރުކުރި ދެމީހުންގެ ބަންދާ މެދުގައި ގޮތެއް ނިންމުމަށް ކޯޓަށް ހާޒިރުކުރުމުން ފަސް ދުވަހަށް ބަންދުކުރުމަށް އަމުރުކޮށްފައިވާ ކަމަށް ފުލުހުން ބުންޏެވެ.