މިދިޔަ ހުކުރު ދުވަހުގެ ރޭ މާލެއިން ގެއްލިފައިވާ ޒުވާނާ ހޯދުމަށް ގިނަ އަދަދެއްގެ ސީސީޓީވީ ފުޓޭޖުތައް ދިރާސާކުރަމުން އަންނަ ކަމަށް ފުލުހުން މިއަދު ބުނެފި އެވެ.
ގެއްލިގެން ހޯދަމުން އަންނަނީ ގ. ގާނެޓް، ހަސަން ޔާމީން، 30 އެވެ.
މިދިޔަ ހުކުރު ދުވަހުގެ ރޭ ގެއިން ނުކުމެގެން ދިޔަ ގޮތަށް އާއިލާއަށް ގެއްލިފައިވާ ޔާމީން ހޯދުމަށް ކުރަމުން އަންނަ މަސައްކަތާ ގުޅޭ ގޮތުން ފުލުހުން މިއަދު ވަނީ ބަޔާނެއް ނެރެފަ އެވެ.
ފުލުހުންގެ ބަޔާނުގައި ބުނީ ޔާމީން ދިރިއުޅޭ ގެއިން މިދިޔަ ހުކުރު ދުވަހުގެ ރޭ 9:25 ހާއިރު ނުކުމެގެން ދިޔަ ގޮތަށް އާއިލާއަށް ޚަބަރެއް ނުވެގެން އޭނާ ގެއްލިފައިވާ ކަމުގެ ރިޕޯޓް، އޭނާގެ އާއިލާގެ ފަރާތުން މިދިޔަ ހޯމަ ދުވަހު ލިބިފައިވާ ކަމަށެވެ.
ގެއްލިގެން ހުށަހަޅާ މީހުންގެ މައުލޫމާތު ފޯމު ފުރިހަމަކޮށް، ފުލުހުންގެ ކަމާބެހޭ އިދާރާތަކަށާއި އެހެން މުއައްސަސާތަކަށް އެ މައުލޫމާތު ފޯރުކޮށްދީފައިވާނެ ކަމަށާއި ތަހުގީގު ފަށައި އަޅަން ޖެހޭ ހުރިހާ ފިޔަވަޅެއް އަޅާފައިވާ ކަމަށް ވެސް ފުލުހުންގެ ބަޔާނުގައި ބުންޏެވެ.
ފުލުހުން ބުނީ މި މައްސަލައާ ގުޅިގެން ގިނަ އަދަދެއްގެ ސީސީޓީވީ ފުޓޭޖުތައް ބަލައި ދިރާސާކުރުމުގެ މަސައްކަތް ވެސް ކުރަމުން އަންނަ ކަމަށާއި އާއިލާގެ އެއްބާރުލުމާއެކު، ޔާމީން ދިރިއުޅޭތަން ބަލައި ފާސްކޮށްފައިވާ ކަމަށެވެ.
ޔާމީން ދިރިއުޅޭ އެޕާޓްމަންޓުން ތުހުމަތުކުރެވޭ އެއްވެސް ކަމެއް ނުވަތަ ކުށުގެ އަމަލެއް ހިންގާފައިވާ ކަމުގެ އެއްވެސް ނިޝާނެއް ފެނިފައި ނުވާ ކަމަށާއި އެތަނަށް އެއްވެސް ބަދަލެއް އައިސްފައިވާ ކަމަށް ވެސް ފާހަގަކުރެވިފައި ނުވާ ކަމަށް ފުލުހުން ބުންޏެވެ.
ފުލުހުން ބުނީ ޔާމީން ގައުމުން ބޭރަށް ގޮސްފައި ނުވާކަން ވެސް ކަމާބެހޭ އިދާރާތަކުން ފުލުހުންނަށް ކަށަވަރުކޮށްދީފައިވާ ކަމަށެވެ.
ފުލުހުން ބުނީޔާމީންއާ ގުޅޭ އެއްވެސް މައުލޫމާތެއް އެނގޭ ނަމަ، އެ އިދާރާގެ ހޮޓްލައިން ނަންބަރު 3322111 އަށް ނުވަތަ ހެންވޭރު ޕޮލިސް ސްޓޭޝަންގެ ނަންބަރު 9400053 އަށް ގުޅައި މައުލޫމާތު ހިއްސާކުރުމަށް އާންމުންގެ ފަރާތުން އެދޭ ކަމަށެވެ.
