ދުވަހުން ދުވަހަށް ގިނަވަމުންދާ މަގުމަތީގެ އެކްސިޑެންޓްތަކާ ގުޅިގެން އާއްމުން ހޭލުންތެރި ކުރުވުމަށްޓަކައި ހުޅުމާލެ ފޭސް ދޭއްގެ ފުލުހުން މަގުމައްޗަށް ނުކުމެ، ވަރުގަދަ މެސެޖެއް ދޭން ފަށައިފިއެވެ. މި ހަރަކާތަކީ މަގުމަތީގެ ސަލާމަތްތެރިކަން އިތުރުކުރުމަށް ފުލުހުން ކުރާ މުހިންމު މަސައްކަތެކެވެ.

ފުލުހުން މި ހަރަކާތްތެރިވަމުން ދަނީ ހުޅުމާލޭގެ އެންމެ ބާރުބޮޑު، ފޭސް ދޭއްގެ ނިރޮޅު މަގުގައެވެ. "ލަސްވުމަށް ވުރެ ފުރާނަ މުހިންމު" މިހެން ޖަހާފައިވާ ބޯޑުތައް ހިފައިގެން، އެކްސިޑެންޓެއް ހިނގާފައިވާ ކަމަށް ދައްކައިގެން ފުލުހުން ދަނީ އާއްމުންނަށް ހޭލުންތެރިކަން ދެމުންނެވެ. މިގޮތަށް ފުލުހުން މަގުމަތީގައި ހަރަކާތްތެރިވާ ގަޑިއަކީ އާއްމުކޮށް އޮފީސްތަކާއި ސްކޫލްތަކަށް މީހުން ދާ ގަޑިއެވެ. މިއީ އެއްފަހަރާ އެތައް ސަތޭކަ ބަޔަކު މަގުތަކަށް ނުކުންނަ ވަގުތުކަމުން، މި މެސެޖް ގިނަ ބަޔަކަށް ލިބިގެންދާނެއެވެ.

ފުލުހުން އާއްމުކޮށްފައިވާ ފޮޓޯތަކާއި ވީޑިއޯތަކުން ފެނިގެން ދަނީ، މަގުމަތީގައި އެކްސިޑެންޓެއް ހިނގާފައިވާ ކަމަށް ދައްކައިގެން، "ލަސްވުމަށްވުރެ ފުރާނަ މުހިންމު!" މިހެން ޖަހާފައިވާ ޕޯސްޓަރުތައް ހިފައިގެން ފުލުހުން ތިބޭ މަންޒަރެވެ. މީގެ އިތުރުން ލައުޑް ސްޕީކަރު ބޭނުންކޮށްގެންވެސް ފުލުހުން ދަނީ މުހިންމު މެސެޖްތަކެއް ދެމުންނެވެ.

ހުޅުމާލެ ފޭސް ދޭއްގެ ފުލުހުން ފޭސްބުކްގައި ކުރި ޕޯސްޓެެއްގައި ބުނީ، ހަނދާން ބަހައްޓަންވީ ކަމަކީ އެއްވެސް އެޕޮއިންޓްމަންޓަކާއި ކްލާހެއް ނުވަތަ ބައްދަލުވުމެއްގެ އަގު ފުރާނައަށްވުރެ ބޮޑު ނުވާނެ ކަމަށެވެ. "ތިބާގެ ސަލާމަތާއި ރައްކާތެރިކަން މުހިންމު - ހަމައެކަނި ތިބާއަށް ނޫން، ވަށައިގެންވާ އެންމެންގެވެސް. އަވަހަށް ނިކުމޭ، ރައްކާތެރިކަމާއެކު ދުއްވާ!" މިހެން އެ ޕޯސްޓްގައިވެއެވެ.

ފުލުހުން މި ހަރަކާތް ފަށާފައި މިވަނީ މިފަހަކުން މާލެ ސަރަހައްދުގައި ބޮޑެތި އެކްސިޑެންޓްތަކެއް ހިނގާފައިވާ ދަނޑިވަޅެއްގައެވެ. ހާއްސަކޮށް، މާލޭގައި ޖުލައި 13 ވަނަ ދުވަހުގެ ރޭ ހިނގި ނުރައްކާތެރި އެކްސިޑެންޓްގައި 17 އަހަރުގެ ކުއްޖެއްގެ ފުރާނަވެސް ގެއްލިފައި ވެއެވެ.

މާފަންނު ބަސް ޓާމިނަލް ކައިރިން ބާރު ސްޕީޑްގައި ދުއްވާފައި ދިޔަ ސައިކަލެއް، ކަފިހިހުރަހުން މަގު ހުރަސްކުރި މީހެއްގެ ގައިގައި ޖެހި، އަދި އެތަނުން ދަތުރުކުރި ޕިކަޕެއްގައި ޖެހި މި އެކްސިޑެންޓް ހިނގީ އެރޭ 8:15 ހާއިރެވެ. އެ ތަނުން އެއް ކުއްޖަކު ޕިކަޕްގެ ދަށަށް ގޮސް ވަތް ތަން ސީސީޓީވީ ފޫޓޭޖުން ފެނެއެވެ. މި އެކްސިޑެންޓްގައި ސައިކަލު ދުއްވަން އިން އުމުރުން 17 އަހަރުގެ ކުއްޖާ ނިޔާވިއިރު، އެ ސައިކަލުގެ ފަހަތުގަައި އިން އުމުރުން 16 އަހަރުގެ ކުއްޖަކާއި، ކަފިހިހުރަސް މަތިން މަގު ހުރަސްކުރި 40 އަހަރުގެ މީހާއަށް ސީރިއަސް އަނިޔާތަކެއް ލިބުނެވެ.

ފުލުހުން އާއްމު ކުރި ތަފާސްހިސާބުތަކަށް ބަލާއިރު، މި އަހަރުގެ ޖޫން މަހުގެ ނިޔަލަށް، މާލެ ސިޓީ، ސިނަމާލެ ބްރިޖް އަދި ހައިވޭ ސަރަޙައްދުތަކުގައި ޖުމްލަ 1,101 މަގުމަތީގެ އެކްސިޑެންޓް ރިޕޯޓްކޮށްފައި ވެެއެވެ. ފުލުހުން ހާމަކުރި ގޮތުގައި، މި އަހަރުގެ ޖެނުއަރީ 1 އިން ޖޫން 30 އާ ދެމެދު ރިޕޯޓްކުރެވުނު މި ހާދިސާތަކުގެ ތެރެއިން އެންމެ ގިނައީ ސައިކަލާއި ކާރު ޖެހިގެން ހިނގި އެކްސިޑެންޓްތަކެވެ.

ހިނގާފައިވާ އެކްސިޑެންޓްތަކުގެ ނަތީޖާއަށް ބަލާއިރު، އެކްސިޑެންޓްތަކުގެ ތެރެއިން ހަ އިންސައްތަ އެކްސިޑެންޓްގައި ބޮޑެތި އަނިޔާތައް ލިބިފައިވާކަން ފާހަގަކުރެވެއެވެ. މި ހިސާބުތަކުން މަގުތަކުގައި ދުއްވާ އެއްޗެހި ދުއްވާއިރު އާއްމުން ސަމާލުކަން ދޭން ޖެހޭ މިންވަރު އިތުރުވެފައިވާކަން ދައްކައެވެ.