މި އަހަރުގެ މިހާތަނަށް ދައުލަތުގެ އާމްދަނީ 20 ބިލިއަން ރުފިޔާއަށްވުރެ އިތުރުވެފައިވާ ކަމަށް ފިނޭންސް މިނިސްޓްރީން ހާމަކޮށްފި އެވެ.
ފިނޭންސް މިނިސްޓްރީން އާއްމުކުރާ "ވީކްލީ ފިސްކަލް" ރިޕޯޓުން ދައްކާ ގޮތުން ހިލޭއެހީ އާއި އާމްދަނީގެ ގޮތުގައި މިމަހުގެ 10ވަނަ ދުވަހުގެ ނިޔަލަށް ޖުމްލަ 20.11 ބިލިއަން ރުފިޔާގެ އާމްދަނީއެއް ވަނީ ލިބިފަ އެވެ. މިއީ މިދިޔަ އަހަރުގެ އެ މުއްދަތާ އަޅާބަލާއިރު 1.6 ބިލިއަން ރުފިޔާގެ އިތުރުވުމެކެވެ.
ފިނޭންސްގެ ތަފާސްހިސާބުތަކަށް ބަލާއިރު އެންމެ ބޮޑު އާމްދަނީއެއް ލިބިފައިވަނީ ޓެކުހުންނެވެ. ޓެކުހުން 15.3 ބިލިއަން ރުފިޔާގެ އާމްދަނީއެއް ލިބުނުއިރު އެއީ އާމްދަނީގެ 76.3 ޕަސެންޓެވެ. އަދި ޓެކްސް ނޫން އާމްދަނީއަށް 4.6 ބިލިއަން ރުފިޔާ ވަނީ ލިބިފަ އެވެ.
ޓެކްސް އާމްދަނީއަށް ބަލާއިރު ޖީއެސްޓީގެ ގޮތުގައި 8.7 ބިލިއަން ރުފިޔާ، ވިޔަފާރިއާއި މުދަލުގެ ޓެކުހުން 2.8 ބިލިއަން ރުފިޔާ، އަދި އިމްޕޯޓް ޑިއުޓީއަށް 1.5 ބިލިއަން ރުފިޔާގެ އިތުރުން ގްރީން ޓެކުހުން 1.1 ބިލިއަން ރުފިޔާ ވަނީ ލިބިފަ އެވެ.
ޓެކްސް ނޫން ގޮތްގޮތުން ލިބުނު އާމްދަނީގެ ތެރޭގައި އެއާޕޯޓް ޑިވެލޮޕްމަންޓް ފީގެ ގޮތުގައި 940.8 މިލިއަން ރުފިޔާ ލިބުނު އިރު އެއީ މިދިޔަ އަހަރު މި މުއްދަތުގައި ލިބުނު އާމްދަނީ އަށްވުރެ 53.3 ޕަސެންޓު އިތުރުވުމެކެވެ. އަދި ރިސޯޓު ކުލިން އެއް ބިލިއަން ރުފިޔާ ލިބުނެވެ.
ހަރަދުތަކަށް ބަލާއިރު އެ މުއްދަތުގައި ދައުލަތުން ޖުމްލަ 18.7 ބިލިއަން ރުފިޔާ ވަނީ ހަރަދުކޮށްފަ އެވެ.
ހަރަދުގެ ބޮޑުބައެއް ހިއްސާކުރަނީ މުވައްޒަފުންގެ މުސާރަ އާއި އިދާރީ ހިންގުމައީ އޮޕަރޭޝަންތަކަށް ކުރި ހަރަދުތަކެވެ. އެ ހަރަދުތަކަށް 16.7 ބިލިއަން ރުފިޔާ ހޭދުކުރި ނަމަވެސް އެއީ މިދިޔަ އަހަރުގެ އެ މުއްދަތުގައި އެކަންކަމަށް ކުރި ހޭދައަށްވުރެ ނިސްބަތުން ދަށް އަދަދެއްކަން ފާހަގަކޮށްލެވެ އެވެ.
ތަފާސްހިސާބުތަކުން ދައްކާގޮތުން އަހަރުގެ މިހާތަނަށް ލޯނު އަދާކުރުމަށް 3.2 މިލިއަން ރުފިޔާ ހަރަދުކޮށްފައިވާއިރު ސޮވެރިން ޑިވެލޮޕްމަންޓް ފަންޑަށް އެއް މިލިއަން ރުފިޔާ ވަނީ ޓްރާންސްފާކޮށްފަ އެވެ. އަދި ޕަބްލިކް ސެކްޓަރުގެ އިންވެސްޓްމަންޓް ޕްރޮގްރާމަށް ދެ މިލިއަން ރުފިޔާ އަދި ކައުންސިލުތަކުގެ ބްލޮކް ގްރާންޓުގެ ގޮތުގައި އެއް މިލިއަން ރުފިޔާ ވަނީ ދޫކޮށްފަ އެވެ.
