އިސްލާމިކް ލައިބްރަރީތަކަށް ބޭނުންވާ ފޮތްތައް ހޯދުމަށް އިސްލާމީ ކަންތައްތަކާ ބެހޭ ވުޒާރާއިން އިއުލާނުކޮށްފިއެވެ.

އެ ވުޒާރާއިން މިއަދު ކުރި އިއުލާނުގައި ބުނެފައިވަނީ ރ. އުނގޫފާރު އިސްލާމިކް ސެންޓަރާއި، ތިނަދޫ ސިޓީ އިސްލާމިކް ސެންޓަރާއި، ހއ. ދިއްދޫ އިސްލާމިކް ސެންޓަރު އަދި ފުވައްމުލަކު ސިޓީ ގުރްއާން ސެންޓަރުގައި ގާއިމުކުރާ ލައިބްރަރީތަކަށް ބޭނުންވާ ދިވެހި ބަހުންނާއި، އިނގިރޭސި ބަހުން ހުރި އިސްލާމީ، ތައުލީމީ، އިޖުތިމާއީ، އިގްތިސާދީ، ކުޑަކުދިންގެ ފޮތްތަކާއި، އަދަބީ ފޮތްތަކާއި އަދި މިނޫންވެސް ދާއިރާތަކުގެ ފޮތްތައް ހޯދަން ބޭނުންވާ ކަމަށެވެ.

މި ދާއިރާތަކުން ފޮތްތައް ވިއްކަން ބޭނުންވާ ފަރާތްތަކުން ފޮތްތަކުގެ ނަންތަކާއި އަގުތައް ހިމެނޭގޮތަށް ޕްރޮޕޯސަލް ހުށަހެޅުމަށް ވުޒާރާއިން ވަނީ އެދިފައެވެ.

ޕްރޮޕޯސަލް ހުށަހެޅުމަށް ބޭނުންވާ ފަރާތްތަކުން މައުލޫމާތު ސާފުކުރުމަށްފަހު ވުޒާރާއަށް ގޮސް ޕްރޮޕޯސަލް ހުށަހެޅުމަށް ވަނީ އެދިފައެވެ. ވުޒާރާއިން ބުނީ ޕްރޮޕޯސަލް ހުށަހެޅުމަށް ޝައުގުވެރިވާ ފަރާތްތަކުން މި މަހުގެ 22 ވާ އަންގާރަ ދުވަހުގެ 14:00 ގެ ކުރިން ރަޖިސްޓްރީކުރަން ޖެހޭނެ ކަމަށެވެ.

ޕްރޮޕޯސަލްތައް ބަލައިގަތުން އޮންނާނީ މިމަހުގެ 31 ވާ ބުރާސްފަތި ދުވަހުގެ 11:00 ގައި ކަމަށް ވުޒާރާއިން ބުންޏެވެ. އަދި ޕްރޮޕޯސަލް ހުށަހެޅުމަށް ރަޖިސްޓްރީ ނުކުރާ ފަރާތްތަކަށް ޕްރޮޕޯސަލް ހުށަހެޅުމުގެ ފުރުސަތު ނޯންނާނެ ކަމަށް ވުޒާރާއިން ބުންޏެވެ.

އިތުރު މައުލޫމާތު ސާފުކުރުމަށް މި މަހުގެ 24 ވާ ބުރާސްފަތި ދުވަހުގެ 14:00 ކުރިން tender@islamicaffairs.gov.mv އަށް އީމެއިލް ކުރުމަށް ނުވަތަ 3020263 / 3020261 ނަންބަރަށް ގުޅުމަށް ވުޒާރާއިން ވަނީ އެދިފައެވެ.

ވުޒާރާއިން މިއަދު ވަނީ ކިންގް ސަލްމާނު މިސްކިތުގައި ގާއިމުކޮށްފައިވާ އިސްލާމީ ކުތުބުޚާނާއަށް ބޭނުންވާ އިސްލާމިކް ފައިނޭންސްގެ އިތުރުން ކުޑަކުދިންނަށް ހާއްސަ ފޮތްތައް ހަދިޔާ ކުރަން ބޭނުންވާ ފަރާތްތަކަށް ވެސް ފުރުސަތު ހުޅުވާލާފައެވެ. އެގޮތުން ފޮތް ހަދިޔާ ކުރަން ބޭނުންވާ ފަރާތްތަކުން މިމަހުގެ 31 ވާ ބުރާސްފަތި ދުވަހުގެ 14:00 ގެ ކުރިން ހަދިޔާ ކުރަން ބޭނުންވާ ފޮތްތަކާބެހޭ މައުލޫމާތު library@islamicaffairs.gov.mv އަށް މެއިލްކުރުމަށް ވުޒާރާއިން ވަނީ އެދިފައެވެ.

އެކަމާ ގުޅޭ އިތުރު މައުލޫމާތު ސާފުކުރުމަށް 3020263 / 3020262 ނަންބަރަށް ގުޅުމަށް ވުޒާރާއިން ވަނީ އެދިފައެވެ.