ޔުކްރެއިން އާއި އެކު ޞުލްޙައިގެ އެއްބަސްވުމަކަށް އައުމަށް ރަޝިޔާއަށް 50 ދުވަހުގެ މުހުލަތެއް އެމެރިކާގެ ރައީސް ޑޮނަލްޑް ޓްރަމްޕް ދެއްވައިފިއެވެ.
ނޭޓޯގެ ސެކްރެޓަރީ ޖެނެރަލް މާކް ރޫޓޭއާ އެކު ވޮޝިންޓަނުގައި ބޭއްވި މަތީ ފެންވަރުގެ ބައްދަލުވުމަކަށް ފަހު ވާހަކަ ދައްކަވަމުން ޓްރަމްޕް ވިދާޅުވީ ރަޝިއާއިން މި ގޮތަށް ޢަމަލު ނުކޮށްފި ނަމަ އެ ޤައުމުގެ ވިޔަފާރީގެ ބައިވެރިންގެ އަތުން އެމެރިކާ އަށް އެކްސްޕޯޓް ކުރާ މުދަލުން %100 ގެ ސެކަންޑަރީ ޓެރިފެއް ނަގާނެ ކަމަށެވެ.
މިގޮތަށް މިކަން ވެއްޖެ ނަމަ ރަޝިޔާގެ ތެޔޮ އެތެރެކުރާ އިންޑިއާ ފަދަ ޚާއްޞަ ވިޔަފާރީގެ ޕާޓްނަރުންނަށް ވަރަށް ބޮޑެތި އަސަރު ތަކެއް ކުރާނެއެވެ. ސަބަބަކީ އިންޑިއާގެ މުދާ ގަންނަ އެމެރިކާގެ ކުންފުނިތަކަށް ބޮޑެތި ހަރަދުތަކެއް ކުރިމަތިވެ، އެމެރިކާގެ ބާޒާރުގައި އެ އުފެއްދުންތަކުގެ ވާދަވެރިކަން ގެއްލޭނެތީއެވެ.
ޓްރަމްޕް ވިދާޅުވި ގޮތުގައި އޭނާގެ ސަރުކާރުން މިގޮތަށް ޢަމަލު ކޮށްފިނަމަ ރަޝިޔާގެ އެކްސްޕޯޓްގެ ގާތްގަނޑަކަށް ދެބައިކުޅަ އެއްބައި ދަށަށް ދާނެއެވެ. އަދި ޕޫޓިންގެ ދައުލަތަށް ވަންނަ ޢާމްދަނީގެ ތިންބައިކުޅަ އެއްބައި ހިމެނޭ ތެލާއި ގޭހުގެ އާމްދަނީ އަށް ލޮޅުން އަރައި މާލީ ގޮތުން މޮސްކޯ އެކަހެރިވާނެ ކަމަށެވެ.
