މިރޭ މާލޭގައި ހިނގި ނުރައްކާތެރި އެކްސިޑެންޓެއްގައި މަރުވީ މަޝްހޫރު ލަވަކިޔުންތެރިން ކަމަށްވާ މުހައްމަދު އަބްދުލްޣަނީ (ތޭރަވާ) އާއި މަރިޔަމް އަޝްފާގެ ދަރިފުޅު، 17 އަހަރުގެ އަލްސަން ކަމަށް މައުލޫމާތު ލިބިއްޖެ އެވެ. މި ހިތާމަވެރި އެކްސިޑެންޓް ހިނގާފައިވަނީ މިރޭ 08:10 ހާއިރު ބޮޑުތަކުރުފާނު މަގު ބަސް ޓާމިނަލް ކައިރީ ޒިބްރާ ކްރޮސްއެއްގަ އެވެ.
މޯސްމީޑިއާގައި އާންމުވަމުންދާ ވިޑިއޯއިން ދައްކާގޮތުގައި، މި އެކްސިޑެންޓް ހިނގަން މެދުވެރިވީ، ޒިބްރާ ކްރޮސްއިން މީހަކު ހުރަސް ކުރަނިކޮށް ބާރު ސްޕީޑުގައި އައި ސައިކަލެއް އެމީހާގެ ގައިގައި ޖެހިގެންނެވެ. ސައިކަލުގެ ދުވެލި ބާރުކަމުން މަގު ހުރަސްކުރި މީހާގެ ގައިގައި ޖެހުމަށްފަހު، އެމީހާއާއެކު ސައިކަލު އެރުނީ ކައިރިން ދުއްވަމުންދިޔަ ޕިކަޕަކަށެވެ. މައުލޫމާތުލިބިފައިވާ ގޮތުގައި އަލްސަން އިނީ އެކްސިޑެންޓުވި ސައިކަލުގަ އެވެ.
މި އެކްސިޑެންޓުގައި އަލްސަންގެ އިތުރުން އިތުރު ދެ މީހަކު ވެސް ވަނީ ޒަހަމްވެފައެވެ. އެއީ އުމުރުން 16 އަހަރުގެ ކުއްޖަކާއި އުމުރުން 40 އަހަރުގެ މީހެކެވެ. ފުލުހުން ބުނީ ޒަހަމްވި 16 އަހަރުގެ ކުއްޖާ ވެސް އިނީ އެކްސިޑެންޓްވި ސައިކަލުގައި ކަމަށެވެ. ދުއްވަން އިނީ އަލްސަންކަމެއް އަދި ޔަގީނެއް ނޫނެވެ.
ފުލުހުން ވަނީ މިރޭގެ އެކްސިޑެންޓުގައި އުމުރުން 17 އަހަރުގެ ކުއްޖެއް މަރުވިކަން ކަށަވަރުކޮށްދީފަ އެވެ. އަދި އެކްސިޑެންޓުގައި ހިމެނޭ އަނެއް ދެ މީހުންގެ ހާލު ވެސް ސީރިއަސް ކަމަށް ފުލުހުން ވަނީ ބުނެފައެވެ. މި އެކްސިޑެންޓާ ގުޅިގެން އިތުރަށް ބަލަންޖެހޭ ކަންކަން ފުލުހުން ދަނީ ބަލަމުންނެވެ.
