ޕާކިސްތާނުގެ މަޝްހޫރު ބަތަލާ ހުމައިރާ އަސްގަރުގެ މަރުގެ ހާދިސާއާ ގުޅޭގޮތުން އެންމެ ފަހުން ދެކެެވިފައި ވަނީ އޭނާ މަރުވެފައި ވަނީ މީގެ ގިނަ މަސްތަކެއް ކުރިން ކަމެވެ. މިގޮތުން، ޕާކިސްތާނުގެ ކަރާޗީ ސިޓީގައި ހުންނަ އޭނާ ދިރިއުޅޭ އެޕާޓްމަންޓުން މިދިޔަ ހަފްތާގައި ހުމައިރާގެ ހަށިގަނޑު ފެނުނު ނަމަވެސް، ހަގީގަތުގައި އޭނާ މަރުވީ 2024 ވަނަ އަހަރުގެ އޮކްޓޯބަރު މަހުގެ ތެރޭގައި ކަން މިހާރު ވަނީ އެނގިފައެވެ.
ރިޕޯޓެއްގައިވާ ގޮތުން ހުމައިރާ މަރުވެފައި ވަނީ 2024 ވަނަ އަހަރުގެ އޮކްޓޯބަރު މަހުގެ ތެރޭގައެވެ. މި މައުލޫމާތު ކަށަވަރުކޮށްދެއްވީ ހުމައިރާގެ އޮޓޮޕްސީ ހެދި ކަރާޗީ ޕޮލިސް ސާޖަން ޑރ ސުމްމައްޔާ ސައީދުއެވެ.
ފުލުހުން ބުނީ، ހުމައިރާ އެންމެ ފަހުން އަވަށްޓެރިންނަށް ފެނިފައި ވަނީ މިދިޔަ އަހަރުގެ ސެޕްޓެމްބަރު ނުވަތަ އޮކްޓޯބަރު މަހުގައިކަމަށެވެ.
Advertisement
ފުލުހުން އިތުރަށް ބުނީ ހުމައިރާ ދިރިއުޅެމުންދިޔަ އެޕާޓްމެންޓް ހުރި ފަންގިފިލާގައި ހުރި ހަމައެކަނި އެޕާޓްމަންޓަކީ އޭނާގެ އެޕާޓްމަންޓު ކަމަށް ވާތީ، މަރުވެފައި އޮއްވާ ކުނިވަހެއް ފެތުރިފައި ނުވާ ކަމަށެވެ. މީގެ އިތުރުން، އޭނާގެ އެޕާޓްމެންޓުގެ ކަރަންޓު ބިލްތަކަށް ފައިސާ ދައްކާފައި ނުވުމުން 2024 ވަނަ އަހަރުގެ އޮކްޓޯބަރު މަހު ކަރަންޓުވެސް ކަނޑާލާފައިވާ ކަމަށް ފުލުހުން ބުންޏެވެ.
"ހުމައިރާ މަރުވެފައި އޮންނަތާ ގާތްގަނޑަކަށް ނުވަ މަސް ވެދާނެ. އެންމެ ފަހުން ޔުޓިލިޓީ ބިލްތައް ދެއްކުމާއި 2024 ވަނަ އަހަރުގެ އޮކްޓޫބަރު މަހު ކަރަންޓް ކަނޑާލުމާ ދެމެދުގެ ދުވަސްކޮޅެއްގެ ތެރޭގައި އޭނާ މަރުވި ކަމަށް ބެލެވޭ،" ފުލުހުން ބުންޏެވެ. ހަށިގަނޑު ފެނުނު އިރު އޮތީ ވަރަށް ބޮޑަށް ކުނިވެފައެވެ. އަދި އޭނާގެ ގޭގައި ހުރި ކާނާތައް ހުރީވެސް މުއްދަތު ހަމަވެފައި ކަމަށްވެސް ރިޕޯޓުތަކުން ބުންޏެވެ.
ހުމައިރާގެ އާއިލާއިން ވަނީ އޭނާގެ މަރުވެފައިވާ ހަށިގަނޑު ބަލައިގަތުމަށް ދެކޮޅު ހަދައި އޭނާއާއި އެއްވެސް ގުޅުމެއް ނޯންނާނެ ކަމަށް ބުނެފައިއެވެ.
ހުމައިރާގެ މަސައްކަތްތަކަށް ބަލާއިރު، އޭނާ އޭއާރުވައިގެ ރިއަލިޓީ ޝޯ "ތަމާޝާ ގަރް" ގައި މަސައްކަތް ކޮށްފައި ވެއެވެ. އަދި 2015 ވަނަ އަހަރު ނެރުނު ފިލްމު "ޖަލައިބީ" ގައި ވެސް އޭނާ މަސައްކަތްކޮށްފަ އެވެ. އޭނާގެ އިންސްޓަގްރާމް ބަޔޯގައި ބުނެފައި ވަނީ އޭނާ އަކީ ހަމައެކަނި އެކްސްޓްރެސް މޮޑެލްއެއް ނޫން ކަމަށެވެ. މިގޮތުން، އޭނާއަކީ ތިއޭޓަރުގެ އާޓިސްޓެއްގެ އިތުރުން ކުރެހުންތެރިއެކެވެ. އަދި ފިޓްނަސްއަށް ޝައުގުވެރިވާ މީހެއް ކަމަށްވެސް އޭނާގެ ބަޔޯގައި ބުނެފައިވެ އެވެ. އިންސްޓަގްރާމްގައި އޭނާގެ ފޮލޯވަރުންގެ އަދަދު 713،000 އަށް ވުރެ ގިނަ އެވެ. އޭނާ އިންސްޓަގްރާމްގައި އެންމެ ފަހުން ޕޯސްޓެއް ކޮށްފައި ވަނީ ސެޕްޓެމްބަރު 30، 2024ގަ އެވެ.
