ބޮލީވުޑްގެ މަޝްހޫރު ތަރި އަކްޝޭ ކުމާރާއި ކާމިޔާބު ޑައިރެކްޓަރު ޕްރިޔަދަރުޝަން ގިނަ ދުވަސްތަކަކަށްފަހު އެކުގައި މަސައްކަތްކުރި ފިލްމު "ބޫތު ބަންގްލާ" ބޮކްސް އޮފީހުގައި އާދަޔާހިލާފު ކާމިޔާބީއެއް ހޯދައިފި އެވެ. މި ހޮރޯ-ކޮމެޑީ ފިލްމަށް ބެލުންތެރިންގެ ބޮޑު ތަރުހީބެއް ލިބެމުންދާއިރު، ފިލްމު ރިލީޒްކުރިތާ 10 ވަނައަށްވީ ދުވަހު ދުނިޔޭގެ ބޮކްސް އޮފީހުގައި މިވަނީ 150 ކްރޯޑް ރުޕީސްގެ ބޮޑު އާމްދަނީއެއް ހޯދާފަ އެވެ.

ބާލާޖީ މޯޝަން ޕިކްޗާސްއިން ހާމަކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، "ބޫތު ބަންގްލާ" އަށް މިހާތަނަށް ޖުމްލަ 150.05 ކްރޯޑް ރުޕީސް ވަނީ ލިބިފަ އެވެ. ފިލްމު ރިލީޒްކުރި ފުރަތަމަ ދުވަސްކޮޅު އާމްދަނީ ކޮންމެވެސް ވަރަކަށް މަޑުޖެހިފައި އޮތް ނަމަވެސް، ފުރަތަމަ ހަފުތާ ނިމުނުއިރު ބޭރުގެ މާރުކޭޓުތަކުން އެކަނިވެސް 3.8 މިލިއަން ޑޮލަރު ވަނީ ލިބިފަ އެވެ. އަދި ދެވަނަ ހަފުތާ ބަންދުގައި އާމްދަނީ ވަނީ ވަރަށް ބޮޑަށް މައްޗަށް ގޮސްފަ އެވެ. އެގޮތުން ވޭތުވެދިޔަ ހޮނިހިރު ދުވަހު 10.75 ކްރޯޑް އަދި އާދީއްތަ ދުވަހު 12.50 ކްރޯޑް ރުޕީސް ލިބިފައިވާއިރު، އިންޑިއާގެ މާރުކޭޓުން އެކަނިވެސް 10 ދުވަސް ތެރޭގައި 113.40 ކްރޯޑް ރުޕީސް ވަނީ ޖަމާކޮށްފަ އެވެ.

މި ކާމިޔާބީއާއެކު "ބޫތު ބަންގްލާ" މިވަނީ އަކްޝޭ ކުމާރުގެ "ސްކައި ފޯސް" އަށް ލިބުނު ޖުމްލަ އާމްދަނީ ކަމަށްވާ 149 ކްރޯޑް ރުޕީސް ފަހަތަށް ޖައްސާލާފަ އެވެ. މީގެ އިތުރުން، މިއީ ބޮލީވުޑްގެ ތާރީޚުގައި 6 ވަނައަށް އެންމެ ބޮޑު އާމްދަނީއެއް ހޯދި ހޮރޯ-ކޮމެޑީ ފިލްމެވެ. މި ލިސްޓުގައި މި ފިލްމު ވަނީ "މުންޖިއާ" (132 ކްރޯޑް) ބަލިކޮށް، ކުރިއަށް ޖެހިލާފަ އެވެ. މިހާރު މި ފިލްމަށްވުރެ ކުރީގައި އުޅެނީ "ސްޓްރީ 2" (875 ކްރޯޑް)، "ބޫލް ބުލައްޔާ 3" (424 ކްރޯޑް)، "ބޫލް ބުލައްޔާ 2" (266 ކްރޯޑް)، "ސްޓްރީ" (180 ކްރޯޑް) އަދި "ތައްމާ" (170 ކްރޯޑް) އެވެ.

ޕްރިޔަދަރުޝަން ޑައިރެކްޓްކޮށް، އަކްޝޭ ކުމާރާއި އެކްތާ ކަޕޫރު އަދި ޝޯބާ ކަޕޫރު ޕްރޮޑިއުސްކުރި މި ފިލްމުގެ ތަރިންގެ ތެރޭގައި އަކްޝޭގެ އިތުރުން ޕަރޭޝް ރާވަލް، ޖިޝޫ ސެންގުޕްތާ، ރާޖްޕަލް ޔާދަވް، ތާބޫ އަދި ވަމީގާ ގައްބީ ހިމެނެ އެވެ. މިއީ 2007 ވަނަ އަހަރުގެ "ބޫލް ބުލައްޔާ" އަށް ފަހު އަކްޝޭ އާއި ޕްރިޔަދަރުޝަން ގުޅިގެން އުފެއްދި ދެވަނަ ހޮރޯ-ކޮމެޑީ އެވެ. އަދި މިއީ "ހީރާ ޕޭރީ" އާއި "ގަރަމް މަސާލާ" ފަދަ ކާމިޔާބު ފިލްމުތަކަށްފަހު، މި ދެ ފަންނާނުން އަލުން އެކުގައި މަސައްކަތްކޮށް ބެލުންތެރިންނަށް ގެނެސްދިން ފާހަގަކޮށްލެވޭ އުފެއްދުމެކެވެ.