މާލޭގައި މިރޭ ހިނގި ނުރައްކާތެރި އެކްސިޑެންޓެއްގައި، 17 އަހަރުގެ ފިރިހެން ކުއްޖާ މަރުވެއްޖެއެވެ. މި ހާދިސާ ހިނގާފައިވަނީ މާލޭގެ މާފަންނު ބަސްޓާމިނަލް ސަރަހައްދުގައެވެ.

ފުލުހުން މައުލޫމާތު ދިން ގޮތުގައި، މި އެކްސިޑެންޓު ހިނގާފައިވަނީ ބާރު ސްޕީޑްގައި ދުއްވާފައި ދިޔަ ސައިކަލެއް، ކަފިހިހުރަހުން މަގު ހުރަސްކުރި މީހެއްގެ ގައިގައި ޖެހި، އެތަނުން ދަތުރުކުރަމުން ދިޔަ ޕިކަޕެއްގައި ޖެހިގެންނެވެ.

މި އެކްސިޑެންޓުގައި މަރުވި 17 އަހަރުގެ ކުއްޖާ އިނީ އެކްސިޑެންޓުވި ސައިކަލުގަ އެވެ. އެނގިފައިވާ ގޮތުގައި އެ ކުއްޖާއާ އެކީގައި ސައިކަލުގައި ދެން އިނީ 16 އަހަރުގެ ކުއްޖެކެވެ. މި އެކްސިޑެންޓުގައި ދެން އަނިޔާވީ މަގު ހުރަސްކުރި 40 އަހަރުގެ މީހަކަށެވެ. އެމީހުންނަށް މިހާރު ފަރުވާ ދެމުން އަންނަނީ މާލޭގެ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައެވެ.

މި ހާދިސާއާ ގުޅިގެން އާންމުވެފައިވާ ވީޑިއޯތަކުން ފެންނަ ގޮތުގައި، އެކްސިޑެންޓު ހިނގި މަގުމަތީގައި ކުޑަ ކުއްޖަކާއި މީހަކު އެއްވެސް ހަރަކާތެއް ނެތި އޮށޯވެގެން އޮތް މަންޒަރު ފެނެއެވެ. އަދި އެ ދެ މީހުންގެ ގައިން ގިނަ އަދަދެއްގެ ލޭ ފައިބާފައިވާ ތަން ވެސް ވީޑިއޯތަކުން ފެނިގެންދެއެވެ. އެކްސިޑެންޓުވި ސައިކަލާއި ހެލްމެޓްގެ ބައިތައް ވެސް މަގުމަތީގައި ބުރައިގެން ގޮސްފައިވާއިރު، އެކްސިޑެންޓުގައި ޕިކަޕަށް ވެސް ވަނީ ބޮޑެތި ގެއްލުންތަކެއް ލިބިފައެވެ.