މޯލްޑިވްސް މީޑިއާ ކައުންސިލް (އެމް.އެމް.ސީ) އިން ދޭ "12 ވަނަ ނޫސްވެރިކަމުގެ އިނާމު" ގެ ހުށަހެޅުންތައް ވަޒަންކުރުމަށްޓަކައި، ފަނޑިޔާރުންގެ ޕޫލެއް އެކުލަވާލުމަށް މި ދާއިރާގައި ތަޖުރިބާ ހުރި ފަރާތްތަކަށް ނަން ހުށަހެޅުމުގެ ފުރުސަތު ހުޅުވާލައިފި އެވެ.
މޯލްޑިވްސް މީޑިއާ ކައުންސިލުން ބުނީ މިގޮތަށް ފަނޑިޔާރުންގެ ޕޫލެއް އެކުލަވާލުމަށް ނިންމާފައިވަނީ، ނޫސްވެރިކަމުގެ އިނާމަށް ހުށަހެޅޭ އެންޓްރީތައް ހަމަހަމަކަމާއި އިންސާފުވެރިކަމާއެކު ވަޒަންކޮށް، އެންމެ އެކަށީގެންވާ ފަރާތްތަކަށް އިނާމު ދިނުމުގެ މަގުފަހިކުރުމަށްކަަމަށެވެ. އަދި މިއީ ރާއްޖޭގެ ނޫސްވެރިކަމުގެ ދާއިރާ ކުރިއެރުވުމަށް ދެމުން އަންނަ މުހިންމު އެވޯޑެއްކަަމަށް އެ ކައުސިލުން ބުންޏެވެ.
ފަނޑިޔާރުންގެ ޕޫލްގައި ހިމެނުމަށް އެދި ހުށަހަޅާ ފަރާތްތަކަކީ މީޑިއާ، ނުވަތަ ޖާނަލިޒަމް، ނުވަތަ ސޯޝަލް ސައިންސްގެ ދާއިރާއިން ދިވެހިރާއްޖޭގެ ގައުމީ ސަނަދުތަކުގެ އޮނިގަނޑުން ދަށްވެގެން ލެވެލް ހަތަރެއްގެ ސަނަދެއް ހާސިލުކޮށްފައިވުމާއެކު، ސަރުކާރުގައި، ނުވަތަ ޕަބްލިކް ނުވަތަ ޕްރައިވެޓް ސެކްޓަރުގައި، ނުވަތަ ގައުމީ ނުވަތަ ބައިނަލްއަގުވާމީ ޖަމިއްޔާ ނުވަތަ ޖަމާއަތެއްގައި މަދުވެގެން ތިން އަހަރުދުވަހު މަސައްކަތްކޮށް، ފަނޑިޔާރުކަމުގެ މަގާމަށް ކަނޑައަޅާފައިވާ މަސައްކަތާގުޅޭ ތަޖުރިބާ ލިބިފައިވާ ފަރާތްތަކަށް ވާންޖެހޭނެ ކަމަށް މީޑިއާ ކައުންސިލުން ފާހަގަކުރި އެވެ.
މީޑިއާ ކައުންސިލުން ފާހަގަކުރިގޮތުގައި، މި ޕޫލްގައި ހިމެނޭ ފަނޑިޔާރުންގެ މައިގަނޑު މަސްއޫލިއްޔަތުތަކުގެ ތެރޭގައި 12 ވަނަ ނޫސްވެރިކަމުގެ އިނާމަށް ކުރިމަތިލާ ފަރާތްތަކުގެ އެޕްލިކޭޝަންތައް ވަޒަންކުރުމާއި، އެޕްލިކޭޝަންތައް މާކްސް ދެއްވުމުގައި ނަޒާހާތްތެރިކަމާއި ތެދުވެރިކަމާއި، ހަމަހަމަކަމާއެކު ހަގީގަތާއި އެއްގޮތައް އިންސާފުވެރިކަމާއެކު މަސައްކަތްކުރުން ހިމެނޭކަމަށެވެ.
އެގޮތުން، މި މަސައްކަތަށް ކައުންސިލުން ނިންމާ ގޮތެއްގެ މަތިން އުޖޫރައެއް ދެވޭނެ ކަމަށާއި، މި ފުރުސަތަށް ކުރިމަތިލުމުގެ މުއްދަތު ޖުލައި 21 ވަނަ ދުވަހުގެ 13:00ގެ ނިޔަލަށް ހުވާލައިފައިވާކަމަށް މީޑިއާ ކައުންސިލުން ފާހަގަކުރި އެވެ.
