މޯލްޑިވްސް ބްރޯޑްކާސްޓިން ރެގިއުލޭޝަން ކޮމިޝަންގެ ވަގުތީ މެމްބަރުން މިއަދު އައްޔަނުކޮށްފިއެވެ.
މި ގާނޫނުގެ ދަށުން އުފައްދާ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން އެކުލަވާލައި މެންބަރުން ހިންގުމާއި ހަވާލުވަންދެން، ކޮމިޝަންގެ ކަންކަން ވަގުތީގޮތުން ހިންގާނީ ސިވިލް ސާވިސް ކޮމިޝަނުން އެކުލަވާލާ ފަސް މެންބަރުންގެ ވަގުތީ ކޮމިޓީއަކުން ކަމަށް ގާނޫނުގައި ބުނެފައިވެއެވެ.
ކޮމިޝަންގައި ހިމެނެނީ:
އަލީ ޒަކީ / ޑިރެކްޓަ ޖެނެރަލް، ސްޕޯޓްސް މިނިސްޓްރީ
އަހުމަދު މައުސޫމް / ޑިރެކްޓަ ޖެނެރަލް، ސިޓީސް މިނިސްޓްރީ
އާމިނަތު ނަސީރު / ޑިރެކްޓަ ޖެނެރަލް، އިސްލާމިކް މިނިސްޓްރީ
އާމިނަތު ޝާހިދާ / ޑިރެކްޓަ ޖެނެރަލް، އިކޮނޮމިކް މިނިސްޓްރީ
އިމާދު މުހައްމަދު / ޗީފް ކޯޕަރޭޓް އެގްޒެކެޓިވް، ގައުމީ އަރުޝީފު
މި ވަގުތީ ކޮމިޓީގެ ހަމައެކި މަސައްކަތަކީ، ކޮމިޝަންގެ އިދާރީ މަސައްކަތްތައް ހިންގުން އަދި މީޑިއާ ރަޖިސްޓްރީކުރުމަށް އަންނަ ހުށަހެޅުންތަކާ މެދު ގޮތް ނިންމުމެވެ.
ގާނޫނުގެ ދަށުން އެކުލަވާލާ މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން އެކުލެވިގެންވަނީ 7 މެންބަރުންގެ މައްޗަށެވެ. އެއީ ރައްޔިތުންގެ މަޖިލީހުން ކަނޑައަޅާ 3 މެންބަރުންނާއި މީޑިއާތަކުން އިންތިހާބުކުރާ 4 މެންބަރުންނެވެ.
ޤާނޫނުގައި ބުނާ ގޮތުން މި ކޮމިޝަންގެ ރައީސް އައްޔަނުކޮށް ވަކިކުރާނީ ރައްޔިތުންގެ މަޖިލީހުން ކަމަށް ވާއިރު، ކޮމިޝަންގެ ނައިބު ރައީސް އައްޔަނުކުރާނީ ކޮމިޝަނުގެ މެންބަރުންގެ ތެރެއިންނެވެ. މި ކަން ކުރާނީ ކޮމިޝަނުގެ މެންބަރުންގެ މެދުގައި ނަގާ ސިއްރު ވޯޓަކުންނެވެ.
މި ކޮމިޝަނަށް މެންބަރުން އައްޔަނު ކުރެވޭނީ ފަސް އަހަރުގެ މުއްދަތަށެވެ. އަދި ވިދިވިދިގެން ދެ ދައުރަށްވުރެ ގިނަ ދުވަހު މެންބަރުކަމުގައި ނުހުރެވޭނެ ކަމަށް ބަޔާންކޮށްފައިވެ އެވެ.
