ކަނޑައަޅުއްވާފައިވާ އުސޫލުން މީޑިއާ ފެންޑާ ބޭނުން ނުކުރާތީ، ރައީސް އޮފީހުން މިއަދު އެތަން އުވާލައިފި އެެވެ.
ރައީސް އޮފީހުން ބުނީ އެ ފެންޑާ އުވާލަން ނިންމީ އެތަން ބޭނުން ނުކުރާތީ ކަމަށެވެ. އެގޮތުން ސަރުކާރުން މިއަދު އެތަން އުވާލަން ނިންމިކަމަށް އިއުލާނު ކޮށްފައި އެވެ.
ރައީސް އޮފީހުގެ ދެކުނު ގޭޓު ކުރިމަތީގައި އޮންނަ ހުސް ބިމުގައި ކުޑަ ސިޑިބަރިއަކާ އެކު ހިޔާކޮށް ކަރަންޓް ލިބޭ ގޮތަށް މި ތަން ގާއިމްކޮށްފައިވަނީ، މިދިޔަ މެއި މަހު ފަހުކޮޅު އެވެ.
ރައީސް އޮފީހުގެ ސައިޓުން ނެރުނު ލިޔުމުގައި ބުނީ "ކަނޑައަޅާފައިވާ އުސޫލާ އެއްގޮތަށް މީޑިއާ ފެންޑާގެ ބޭނުން ހިފަމުން ނުދާތީ"، މިއަދުން ފެށިގެން އެތަން އުވާލާފައިވާ ކަމަށެވެ.
އިތުރަށް ރައީސް އޮފީހުން މީޑިއާ ފެންޑާ ހެދީ ރައީސް އޮފީހުގައި ހިނގާ ކަންކަމާއި އެ ސަރަހައްދުގައި ހިނގާ ކަންކަމުގެ ހަބަރާއި މައުލޫމާތު ހޯދައި، މީޑިއާ ކަވަރޭޖް ހަދަން ނޫސްވެރިން ތިބުމަށް ހާއްސަކޮށްގެން، ރައީސް އޮފީހުގެ ބައެއްގެ ގޮތުގައި އެތަން ހުޅުވީއްސުރެ މި ފާއިތުވި ތިން މަހެއްހާ ދުވަހު ވެސް، ކަނޑައަޅާފައިވާ އުސޫލާ އެއްގޮތަށް ބޭޭނުން ހިފަމުން ނުގެންދާކަން ފާހަގަކޮށްފައިވެ އެވެ.
އެ އުސޫލުގެ ދަށުން، މީޑިއާ ފެންޑާ ބޭނުންކުރަން ރާއްޖޭގެ މީޑިއާތަކުން ކަނޑައެޅި ނޫސްވެރިންނަށް އެތަން ބޭނުންކުރުމުގެ ރަސްމީ ހުއްދަ ދޫކޮށްފައިވީ ނަމަވެސް، އެ ހުއްދަ ހޯދާފައިނުވާ ބަޔަކު ނޫސްވެރިންގެ ނަމުގައި މީޑިއާ ފެންޑާއަށް ވަދެފައިވާ ކަމަށް އެ އިއުލާނުގައިވެ އެވެ.
