މިއަހަރު ނިމުމުގެ ކުރިން ދިވެހިރާއްޖޭގެ ހުރިހާ އިސްލާމީ މަރުކަޒެއްގައި އިސްލާމީ ކުތުބުޚާނާ ގާއިމުކޮށް ނިމޭނެކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ. ވަޒީރު މިހެން ވިދާޅުވީ، ސަލްމާން މިސްކިތުގައި އިސްލާމީ ލައިބްރަރީ ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
ލައިބްރަރީ ނުވަތަ ކުތުބުހާނާތަކަކީ އިސްލާމީ ހަޟާރަތް ކުރިއަރާ ދިއުމުގައި ވަރަށް މުހިންމު ދައުރެއް އަދާކުރި ތަންތަންކަން ފާހަގަކުރައްވަމުން ވަޒީރު ޑރ. ޝަހީމް ވިދާޅުވީ، ރާއްޖޭގައިވެސް އިސްލާމީ ކުތުބުހާނާތައް ގާއިމުކުރުމަށް މި ސަރުކާރުން ހާއްސަ އިސްކަމެއް ދެއްވާ ކަމަށެވެ. އެ ގޮތުން ރާއްޖޭގައި މިވަގުތު ހުރި އަދި މިއަހަރު މަސައްކަތް ނިމޭ ހުރިހާ އިސްލާމީ މަރުކަޒެއްގައި ކުތުބުޚާނާ އިމުކޮށް ނިމޭނެކަމަށް ވަޒީރު ވިދާޅުވި އެވެ.
މީގެ އިތުރުން، ކުތުބުޚާނާތަކަށް ފޮތް ހޯދުމުގެ މަސައްކަތް ކުރިއަށްދާކަން ހާމަކުރައްވަމުން ވަޒީރު ވިދާޅުވީ، މިހާރު 60،000 ފޮތް ހަދިޔާކުރުމަށް ހުށައެޅުމެއް ލިބިފައިވާ ކަމަށާއި، އެކަމުގެ ރަސްމީ ލިޔެކިޔުންތައް ބަދަލުކުރެވިފައިވާ ކަމަށެވެ. ސަލްމާން މިސްކިތުގައި ހުޅުވުނު އިސްލާމީ ލައިބްރަރީގައި ކުރިއަށް އޮތްތަނުގައި 15,000 އަށްވުރެ ގިނަ ފޮތް ކިޔެން ހުންނާނެކަމަށް ވެސް ވަޒީރު ވިދާޅުވި އެވެ. އަދި މިތަނުގައި ކުޑަކުދިންނަށް ހާއްސަ ކޯނަރަކާއި އިސްލާމިކް ބޭންކިން އެންޑް ފައިނެންސްއަށް ހާއްސަ ކޯނަރެއް ގާއިމުކުރެވޭނެ ކަމަށްވެސް ވަޒީރު އިތުރަށް ވިދާޅުވި އެވެ.
ސަރުކާރުން ވަނީ ހއ. ދިއްދޫއާއި ރ. އުނގޫފާރާއި ގދ. ތިނަދޫގައި އިސްލާމީ ލައިބްރަރީތައް ގާއިމުކުރުމުގެ މަސައްކަތް ފަށްޓަވާފަ އެވެ. މީގެ ތެރެއިން ދިއްދޫގައި ގާއިމުކުރާ އިސްލާމީ މަރުކަޒުގެ މަސައްކަތް ނިންމާ އަންނަ މަހު ހުޅުވުމަށް ދަނީ މަސައްކަތްކުރަމުންނެވެ.
ރާއްޖޭގެ އެކި ކަންކޮޅުތަކުގައި އިސްލާމީ ލައިބްރަރީތައް ގާއިމުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ މެނިފެސްޓޯގައި ހިމަނުއްވާފައިވާ މުހިންމު ކަމެކެވެ. މި މަސައްކަތްތައް ކުރިއަށްދަނީ ރައީސްގެ ވިސްނުންފުޅާ އެއްގޮތަށް ދިވެހިރާއްޖޭގައި އިސްލާމީ އިލްމު ފެތުރުމާއި ދީނީ ހޭލުންތެރިކަން އިތުރުކުރުމުގެ މަގުސަދުގަ އެވެ.
