ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން ދޭ ހިދުމަތްތައް ހަރުދަނާކުރުމަށް އެއާޕޯޓުގައި ހިދުމަތް ދޭ ފަރާތްތަކާއެކު އެއްބަސްވުންތަކުގައި ސޮއިކުރަން މިއަދު ފަށައިފި އެވެ.
އެ އެއާޕޯޓު ހިންގާ އެމްއޭސީއެލުން ނެރުނު ބަޔާނެއްގައި ބުނީ އެއާޕޯޓުގެ ހިދުމަތްތައް އިތުރަށް ހަރުދަނާކުރުމުގެ ގޮތުން ވީއައިއޭގައި ހިދުމަތް ދޭ އިދާރާތަކާއި ކުންފުނިތަކާއެކު އެއްބަސްވުންތަކެއް ހަދަން ފަށާފައިވާ ކަމަށެވެ.
އެ އެއްބަސްވުންތަކުގެ މަގުސަދަކީ ވީއައިއޭގެ އާ ފަސިންޖަރު ޓާމިނަލް ހުޅުވާއިރު އެއާޕޯޓުގެ އެކި ސަރަހައްދުތަކުން ދޭ ހިދުމަތްތަކުގެ ފެންވަރު މަތިކޮށް, އެއް ފެންވަރެއްގައި ބެހެއްޓުމާއި އޮޕަރޭޝަނަލް ޕްރެކްޓިސްތައް ހަރުދަނާކުރުން ކަމަށް އެމްއޭސީއެލުން ބުންޏެވެ.
ފަސިންޖަރުންނާއި މުދާ އުފުލުމުގެ ހިދުމަތްތައް ފުރިހަމަވެ، މެދުނުކެނޑި ހިދުމަތް ދިނުމަކީ ވެސް އެ އެއްބަސްވުންތަކުގެ މަގުސަދެއް ކަމަށް އެމްއޭސީއެލުން ބުންޏެވެ.
އެމްއޭސީއެލުން ބުނި ގޮތުގައި، އެ ކުންފުނިން ދަނޑުވެރިކަމާއި ދިރޭތަކެއްޗާ ބެހޭ މިނިސްޓްރީއާއެކު މިދިޔަ ބުރާސްފަތި ދުވަހު އެއްބަސްވުމެއް ހަދައިފައި ކަމަށެވެ. އެ އެއްބަސްވުމުގެ ބޭނުމަކީ ވީއައިއޭ މެދުވެރިކޮށް ގަސްގަހާގެހި އަދި ޖަނަވާރު އެތެރެކުރުމުގައި އިންޓަ އޭޖެންސީ ގުޅުން ހަރުދަނާކޮށް ކާގޯ އޮޕަރޭޝަންތައް ހަލުވިކުރުން ކަމަށް އެ ކުންފުނިން ބުންޏެވެ.
ފަސިންޖަރުން އިތުރުވެ އާ ކަނެކްޝަން އިތުރުވަމުން އަންނައިރު، ރާއްޖޭގެ ވައިގެ މައި ދޮރާށި ބަލަހައްޓާ ކުންފުނީގެ ހައިސިއްޔަތުން އެ ކުންފުނިން އަންނަނީ ވައިގެ ދަތުރުފަތުރުގެ ދާއިރާގެ ދައުރު ހަރުދަނާކުރުމަށް މަސައްކަތްތަކެއް ކުރަމުން ކަމަށް އެމްއޭސީއެލުން ބުންޏެވެ.
