މިދިޔަ މަހުގެ 12 ވަނަ ދުވަހު 265 މީހުންނާއެކު ދަތުރުކުރަމުން ދަނިކޮށް ވެއްޓި އެކަކު ފިޔަވައި އެންމެން މަރުވި އެއާ އިންޑިއާގެ ފުލައިޓަށް އެ ހާދިސާ ދިމާވާން ޖެހުނީ “ސްވިޗް އެރަރ” އެއްގެ ސަބަބުން ކަމަށް ބެލެވޭ ކަމުގައި، އެ ހާދިސާ ތަޙްޤީޤު ކުރަމުންދާ އިންޑިއާގެ އެއާކްރާފްޓް އެކްސިޑެންޓް އިންވެސްޓިގޭޝަން ބިއުރޯ (އޭއޭއައިބީ) އިން މިއަދު ބުނެފިއެވެ.

އެ ފުލައިޓުގައި ތިބީ 242 ޕަސެންޖަރުންނާއި، 23 ކުރޫންނާއެކު މުޅިއެކު 265 މީހުންނެވެ. ސަލާމަތްވީ އިންޑިއާގެ ފިރިހެނެއް އެކަންޏެވެ..

އެ ބިއުރޯއިން އާންމުކުރި ފުރަތަމަ ހޯދުންތަކުން ހާމަވާ ގޮތުގައި އިންޖީނުގެ ފިއުލް ކޮންޓްރޯލް ސްވިޗް ހުރީ "ރަން" އިން "ކަޓޯފް" ޕޮޒިޝަނަށް ބަދަލުކޮށްފައެވެ. އަދި އެ ސްވިޗް “ކަޓޯފް” ޕޮޒިޝަނަށް ބަދަލުކުރީ ރަންވޭއިން ފުލައިޓް ނައްޓައިލިތާ ސިކުންތުކޮޅެއްގެ ތެރޭގައި ކަމަށާއި، އެކަމުގެ ސަބަބުން ފުލައިޓްގެ ކޮންޓްރޯލް ގެއްލުނީ ކަމަށް ބެލެވޭ ކަމަށް އެ ޓީމުން ބުންޏެވެ.

ރަންވޭއިން ނައްޓައިލިތަ ވެއްޓުނު އެއާ އިންޑިއާގެ ފުލައިޓް: މި ހާދިސާގައި 264 މީހުން މަރުވި. / ގެޓީ އިމޭޖަސް.

ކޮކްޕިޓްގެ ވޮއިސް ރެކޯޑަރުގައި ސްވިޗް ކަނޑާލީ ކީއްވެގެންތޯ އެތަނުން ޕައިލެޓަކު ބުނި ކަމަށާއި، އެއާއެކު ދެން ހުރި ޕައިލެޓް ތިމަންނަ އެހެން ނަހަދަމޭ ބުނި ކަމަށް ރެކޯޑުވެފައި އެބަހުރި ކަމަށް ތަޙްޤީޤު ޓީމުން މިއަދު ބުންޏެވެ. އެހެންކަމުން ސްވިޗްތައް ބަދަލުކޮށްފައިވަނީ އެކްސިޑެންޓެއްގައިތޯ ނުވަތަ ގަސްތުގައިތޯ ނުވަތަ މެކޭނިކަލް މައްސަލައެއް ދިމާވެގެންތޯ މިއީ އުފެދިފައިވާ ސީރިއަސް ސުވާލުތަކެކެވެ.

ނަމަވެސް، ތަޙްޤީޤު ޓީމަށް މިހާތަނަށް އައިއިރު މެކޭނިކަލް މައްސަލައެއް ދިމާވި ކަމުގެ އެއްވެސް ނިޝާނެއް އަދި ފެނިފައި ނުވާ ކަމަށް ވެސް އެ ބިއުރޯއިން ބުންޏެވެ.