އެމެރިކާގެ ރައީސް ޑޮނަލްޑް ޓްރަމްޕް އާއި ޔުކްރޭނުގެ ރައީސް ވްލަޑިމިއާ ޒެލެންސްކީ ބައްދަލުކުރައްވަނީ: ޓްރަމްޕް ވަނީ އެމެރިކާ އިން ނޭޓޯއަށް ދޭ ހަތިޔާރުތައް ޔުކްރޭނަށް ލިބޭނެ ކަމަށް ވިދާޅުވެފަ / ގެޓީ އިމޭޖެސް.
އެމެރިކާއިން ޔުކްރޭނަށް އެހީތެރިވާނެ ކަމަށް ބުނުމާއެކު ރަޝިއާއިން ޔުކްރޭނަށް ދެމުންދާ ޑްރޯނާއި މިސައިލް ހަމަލާތައް ވަރަށް ބޮޑަށް ވަރުގަދަވެ ޔުކްރޭންގައި އިންތިހާއަށް ބިރުވެރިކަން އުފެދިއްޖެއެވެ.
މިދިޔަ ހަފްތާއިން ފެށިގެން މި ހަމަލާތައް ވަރުގަދަވެފައިވާއިރު، ޖޫން މަހު އެކަނިވެސް 5،429 ފަހަރު ރަޝިއާއިން ވަނީ ޑްރޯން ބޭނުން ކޮށްގެން ޔުކްރޭނަށް ޙަމަލާ ދީފައެވެ. މިއީ މިހާތަނަށް އެއްމަސްތެރޭ ރަޝިއާއިން ދީފައިވާ އެންމެ ގިނަ ހަމަލާތަކެވެ. މި މަހުގެ ފުރަތަމަ ނުވަ ދުވަހުގެ ތެރޭގައިވެސް ރަޝިއާއިން ވަނީ 2،000 އަށް ވުރެ ގިނަ ހަމަލާ ޔުކްރޭނަށް ދީފައެވެ.
ރަޝިއާއިން ޔުކްރޭނުގެ ވެރިރަށް ކީވްއަށް ދިން ޙަމަލާއެއްގައި އަނިޔާވި މީހަކަށް ފަރުވާދެނީ: ހުސްވި މަހުން ފެށިގެން މިހާތަނަށް ޔުކްރޭނުގެ 234 މީހުން މަރުވެފައިވާއިރު މިއީ 24 ފެބުރުއަރީ 2022 ގައި ހަނގުރާމަ ފެށި ފަހުން މިވީ 3 އަހަރުތެރޭ އެންމެ ގިނައިން މީހުން މަރުވި މައްސަރު / ފޮޓޯ: ރޮއިޓާސް.
ރަޝިއާއިން ކިތަންމެ ވަރަކަށް ޞުލްޙަ ވުމަށް މަސައްކަތް ކުރިޔަށް ޔުކްރޭނުން ގޮތްދޫކުރާކަށް ބޭނުމެއް ނުވެއެވެ. ރަޝިއާ ބޭނުންވަނީ ނޭޓޯއާއި ޔުކްރޭނު ނުގުޅޭނެ ކަމުގެ ޔަޤީންކަމެވެ. އެއާއި ޚިލާފަށް ޔުކްރޭނުގެ ސަރުކާރު ވަނީ ހުޅަނގުގެ ބަހަށް ހެއްލިފައެވެ. ހުޅަނގުން ޔުކްރޭނަށް އެހީތެރިވާނެ ކަމަށާއި، ރަޝިއާ ބަލިކޮށް އަދި ރަޝިއާ އިނދަޖައްސައިލުމަށްޓަކައި އެމެރިކާއާއި ހުޅަނގުގެ ޤައުމުތަކުން އެހީތެރިވާނެ ކަމަށް ބުނެފައި ވެއެވެ. ހުޅަނގުން މަސައްކަތްކުރަނީ އެމީހުންގެ ސިފައިން ޢަމަލ) ގޮތުން މައިދާނަށް ނުފޮނުވައި ޔުކްރޭނު މެދުވެރިކޮށް ރަޝިއާ އާއި ތަޅަފޮޅާށެވެ. އެގޮތުން މެދުނުކެނޑި ހަތިޔާރާއި ފައިސާ ދަނީ އޮއްސަމުންނެވެ. ހަނގުރާމަ ފެށިފަހުން މިހާތަނަށް އެމެރިކާއާއި ޔޫރަޕުން ޔުކްރޭނަށް 270 ބިލިއަން އެމެރިކާ ޑޮލަރު ދީފައި ވެއެވެ. ނަމަވެސް ހަނގުރާމަ ދިގުލައިގެން ދިޔައިރުވެސް ޔުކްރޭނަށް މޮޅުވެވޭގޮތެއް ނުވިއެވެ. އެއާއި ޚިލާފަށް ރަޝިއާއިން ގެންދަނީ ފަހަރަކު ތަނެއް ހިފައި ޔުކްރޭނުގެ ބިމަށް އަތްގަދަ ކުރަމުންނެވެ.
ހުޅަނގުގެ ބަހަށް ހެއްލި، ރަޝިޔާގެ ބުޑުގައި އޮވެގެން ޒެލެންސްކީގެ ސަރުކާރުން ރަޝިއާއަށް ޖެއްސުންކުރަން ފެށުމުން، ޕޫޓިންގެ ސިފައިން ވަނީ ޔުކްރޭނުގެ މުހިންމު ސަރަޙައްދުތަކެއް ވެސް ހިފާފައެވެ. އޭގެތެރޭގައި ކްރޭމިއާ އާއި ލުހާންސްކް އަދި ޑޮނެޓްސްކްގެ އިތުރުން ޒަޕަރޯޖިއާ އާއި ޚެރްސޮން ވެސް ހިމެނެއެވެ. މިއީ ގާތްގަނޑަކަށް 125000 ކިލޯމީޓަރެވެ.
މިހާރު ރަޝިއާއިން ދެމުންދާ ވަރުގަދަ ޙަމަލާތަކުގައި ޖޫން މަހުން ފެށިގެން މިހާތަނަށް ޔުކްރޭނުގެ 234 މީހުން މަރުވެފައިވާއިރު މިއީ 24 ފެބުރުއަރީ 2022 ގައި ހަނގުރާމަ ފެށި ފަހުން މިވީ 3 އަހަރުތެރޭ އެންމެ ގިނައިން މީހުން މަރުވި މައްސަރުކަން ފާހަގަ ކުރެވެއެވެ.
